নতুন দিল্লী, ০৮ জানুৱাৰী (হি.স.)। মধ্যপ্ৰদেশৰ ইন্দোৰ জিলাৰ ভগীৰথপুৰা অঞ্চলত দূষিত পানী খোৱাৰ ফলত ১৮ জনতকৈ অধিক লোকৰ মৃত্যু হোৱাৰ পিছতে চৰকাৰৰ স্বচ্ছ ভাৰত অভিযান আৰু হৰ ঘৰ জাল যোজনাক লৈ প্ৰশ্ন উত্থাপন কৰিছে কংগ্ৰেছৰ সংবাদ বিভাগৰ মুৰব্বী পৱন খেৰাই। তেওঁ কয় যে ইন্দোৰে একেৰাহে ৯ বাৰ স্বচ্ছ ভাৰত অভিযানত প্ৰথম স্থান লাভ কৰিছে যদিও এই ঘটনাই স্বচ্ছ ভাৰত অভিযান আৰু হৰ ঘৰ জল যোজনাৰ ত্ৰুটি উদঙাই দিছে।
বৃহস্পতিবাৰে কংগ্ৰেছৰ মুখ্য কাৰ্যালয়ত এখন সংবাদমেলত খেৰাই কয় যে ইন্দোৰত পাইপলাইন সলনিৰ চুক্তি ২০২২ চনৰ ২২ জুলাইত অনুমোদন জনোৱা হৈছিল যদিও ইয়াৰ কোনো কাম কৰা হোৱা নাই। কংগ্ৰেছ নেতাগৰাকীয়ে কয় যে গুজৰাটৰ গান্ধীনগৰত টাইফয়েড আক্ৰান্তৰ সংখ্যা দ্ৰুতগতিত বৃদ্ধি পাইছে যদিও এই বিষয়ত কোনো আলোচনা হোৱা নাই। তেওঁ দিল্লীৰ জল প্ৰদূষণৰ কথাও উল্লেখ কৰি কয় যে আম আদমী পাৰ্টি শাসনত থকাৰ সময়ত পানী ক’লা আছিল, কিন্তু এই চৰকাৰখন ক্ষমতালৈ অহাৰ পিছত পানী হালধীয়া হৈ পৰিছে।
আন্তঃৰাষ্ট্ৰীয় বহনক্ষমতা কেন্দ্ৰৰ প্ৰতিবেদনৰ উদ্ধৃতি দি খেদাই কয় যে ভাৰতৰ ৭০ শতাংশ পানী দূষিত। ইয়াৰ পিছতো বিজেপি চৰকাৰে প্ৰকৃত বিষয়ৰ পৰা জনসাধাৰণৰ দৃষ্টি আঁতৰাই ৰাখিছে। হৰ ঘৰ জল যোজনাত হাজাৰ হাজাৰ কোটি টকা খৰচ হৈছিল যদিও ই হৰ ঘৰ জল যোজনাতকৈ হৰ ঘৰ ময়লা আঁচনি বুলি প্ৰমাণিত হৈছে।
কংগ্ৰেছ নেতাজনে অভিযোগ উত্থাপন কৰে যে মানুহৰ ঘৰলৈ যোৱা পানী নলা-নৰ্দমাৰে দূষিত হৈছে, আৰু ইয়াৰ বাবে চৰকাৰ পোনপটীয়াকৈ দায়ী। ইয়াৰ বাবে ধন এছিয়ান ডেভেলপমেণ্ট বেংকে আগবঢ়াইছিল যদিও প্ৰশ্নটো ৰৈ গৈছে যে সেই ধন ক’লৈ গ’ল?
हिन्दुस्थान समाचार / মনোজ কুমাৰ শইকীয়া
