আমষ্টেলভিন (নেদাৰলেণ্ডছ), ১৫ আগষ্ট (হি.স.)। ভাৰতীয় পুৰুষ হকী দলটোৱে শনিবাৰে আমষ্টেলভিনৰ ৱেগনাৰ ষ্টেডিয়ামত ৱেলছক ৩-১ গ’লত পৰাস্ত কৰি এফ আই এইচ পুৰুষ হকী বিশ্বকাপ ২০২৬ৰ শক্তিশালী আৰম্ভণি কৰে। অধিনায়ক হৰমনপ্ৰীত সিঙে দুটা গ’ল দিয়াৰ বিপৰীতে সঞ্জয়ে এটা গ’ল সংযোজন কৰে।

ভাৰতে আৰম্ভণিৰে পৰা চাপ বজাই ৰাখিছিল। দলটোৰ তিনিওটা গ’ল পেনাল্টি কৰ্ণাৰত আহিছিল। সঞ্জয়ে পেনাল্টি কৰ্ণাৰক ৰূপান্তৰিত কৰি প্ৰথম কোৱাৰ্টাৰত ভাৰতক অগ্ৰগতি প্ৰদান কৰে। ইয়াৰ পাছতে অধিনায়ক হৰমনপ্ৰীতে সুন্দৰ ড্ৰেগ-ফ্লিকেৰে আৰু দুটা গ’ল দিয়ে। তেওঁলোকৰ দুয়োটা গ’লে ভাৰতৰ অগ্ৰগতি অধিক শক্তিশালী কৰি তুলিলে আৰু দলটোৱে খেলখনত নিজৰ দখল অক্ষুণ্ণ ৰাখিলে।

চতুৰ্থ কোৱাৰ্টাৰত ৱেলছৰ হৈ ছেম ৱেলছে ঘাটি হ্ৰাস কৰিছিল যদিও ইয়াৰ পিছত ভাৰতীয় দলটোৱে আৰু কোনো সুযোগ নিদিলে আৰু মেচখন ৩-১ গ’লত জয়লাভ কৰে।

এইটো মাত্ৰ ৱেলছৰ দ্বিতীয়টো হকী বিশ্বকাপ। এই বিজয়ৰ জৰিয়তে ভাৰতে পুল ডি অভিযানৰ সুদৃঢ় আৰম্ভণি কৰে। ভাৰতৰ পৰৱৰ্তী খেল ১৭ আগষ্টত ইংলেণ্ডৰ বিৰুদ্ধে হ’ব। এই মেচখনো ৱেগনাৰ ষ্টেডিয়ামত অনুষ্ঠিত হ’ব।

হিন্দুস্থান সমাচাৰ / মনোজ কুমাৰ শইকীয়া