নতুন দিল্লী, ২৫ জুলাই (হি.স.)। ভাৰতীয় বেগী বলাৰ যশ ঠাকুৰে জিম্বাবুৱে ভ্ৰমণৰ বাবে ভাৰতীয় টি-২০ দলত নিৰ্বাচিত হোৱাটো তেওঁৰ কেৰিয়াৰৰ আটাইতকৈ স্মৰণীয় মুহূৰ্ত বুলি অভিহিত কৰে। তেওঁ কয় যে দেশৰ হৈ খেলাটো প্ৰতিজন ক্ৰিকেটাৰৰ সপোন আৰু ভাৰতীয় জাৰ্চি পিন্ধাটো বছৰ বছৰ ধৰি কৰা কঠোৰ পৰিশ্ৰমৰ শিখৰ।

ভাৰতীয় টি-২০ৰ অধিনায়ক শ্ৰেয়াছ আয়াৰৰ অধিনায়কত্বক প্ৰশংসা কৰি তেওঁক “বলাৰৰ অধিনায়ক” বুলি অভিহিত কৰে। বিদৰ্ভা আৰু পঞ্জাৱ কিংছৰ বেষ্ট বলাৰ যশ ঠাকুৰক প্ৰথমবাৰৰ বাবে জিম্বাবুৱে ভ্ৰমণৰ বাবে ভাৰতীয় দলত অন্তৰ্ভুক্ত কৰা হৈছে। তেওঁৰ লগতে অশোক শৰ্মাকো জাতীয় দলত অন্তৰ্ভুক্ত কৰা হৈছিল। অৱশ্যে ভাৰতত অভিষেক ঘটোৱাৰ সুযোগ এতিয়াও পোৱা নাই যশে।

জিঅ’ষ্টাৰৰ সৈতে হোৱা বাৰ্তালাপত যশে কয় যে নাগপুৰ পোৱাৰ লগে লগে তেওঁ নিজৰ বাছনিৰ বিষয়ে জানিব পাৰিছিল। তেওঁ কয়, মোৰ বিদৰ্ভৰ সতীৰ্থ হৰ্ষ ডুবে আৰু মই মাত্ৰ নাগপুৰত উপস্থিত হৈছিলো। আমি আমাৰ লাগেজ লৈ ওলাই আহি আছিলো যেতিয়া আমাক ফোন আৰু মেছেজ আহিবলৈ ধৰিলে। বন্ধুসকলে আমাক অভিনন্দন জনাই ফোন কৰি ক'লে যে মোক ভাৰতীয় দলৰ বাবে নিৰ্বাচিত কৰা হৈছে। প্ৰথমতে মোৰ কোনো ধাৰণা নাছিল। যেতিয়া মই অনলাইনত চেক কৰিলোঁ, তেতিয়া মই নিশ্চিত হৈছিলো যে মোক জিম্বাবুৱে ভ্ৰমণৰ বাবে নিৰ্বাচিত কৰা হৈছে। অনুভৱটো শব্দৰ বাহিৰত।

যশে কয় যে তেওঁ নিজৰ কেৰিয়াৰৰ প্ৰতিটো স্তৰতে কঠোৰ পৰিশ্ৰম কৰিছে। ১৯ বছৰ অনুৰ্ধ ক্ৰিকেটৰ পৰা আৰম্ভ কৰি ৰঞ্জি ট্ৰফী, দুলীপ ট্ৰফী, আই পি এল, ইণ্ডিয়া এ, আৰু এতিয়া ভাৰতীয় দললৈ, ই সহজ হোৱা নাই। তেওঁ প্ৰতিটো স্তৰতে প্ৰত্যাহ্বানৰ সন্মুখীন হৈছিল যদিও সেইবোৰ অতিক্ৰম কৰি আজি ভাৰতীয় দলত স্থান পোৱাটো তেওঁৰ বাবে গৌৰৱৰ বিষয়। ঘৰুৱা ক্ৰিকেটত যশৰ প্ৰদৰ্শন উৎকৃষ্ট।

যোৱা ছিজনৰ চৈয়দ মুস্তাক আলী ট্ৰফীত তেওঁ ৭খন মেচত ১৮টা উইকেটৰে সৰ্বাধিক উইকেট দখলকাৰীৰ ভিতৰত তৃতীয় স্থান দখল কৰিছিল। এই সময়ছোৱাত তেওঁৰ সৰ্বোত্তম প্ৰদৰ্শন আছিল ১৬ ৰানত ৫ উইকেট। ইয়াৰ পিছতে তেওঁ বিদৰ্ভৰ প্ৰথম বিজয় হাজাৰে ট্ৰফী খিতাপত গুৰুত্বপূৰ্ণ ভূমিকা পালন কৰিছিল, ৯খন মেচত ১৯টা উইকেট দখল কৰিছিল।

ফাইনেলত সৌৰাষ্ট্ৰৰ বিৰুদ্ধেও তেওঁ উজ্জ্বল বলিং কৰে। শ্ৰেয়াছ আয়াৰৰ সৈতে থকা সম্পৰ্কৰ সন্দৰ্ভত যশে কয় যে আই পি এলত পঞ্জাব কিংছৰ হৈ খেলি থকাৰ সময়তে তেওঁলোকে ভাল বুজাবুজি গঢ়ি তুলিছিল।

তেওঁ কয়, শ্ৰেয়াছ আয়েৰে মোৰ শক্তি ভালদৰে জানে। তেওঁ জানে মই ক'ত আটাইতকৈ ফলপ্ৰসূ হ'ব পাৰো - পাৱাৰপ্লে, মিডল অভাৰ, বা ডেথ অভাৰত। আমি আই পি এলৰ সময়ত মেচৰ কৌশলৰ বিষয়ে কেইবাবাৰো আলোচনা কৰিছিলো। এতিয়া, ভাৰতীয় দলত তেওঁৰ অধিনায়কত্বৰ অধীনত খেলাৰ সুযোগ পাইছো, যিয়ে আমাৰ সম্পৰ্ক আৰু অধিক শক্তিশালী কৰিব।

শ্ৰেয়াছৰ অধিনায়কত্বৰ শৈলীক প্ৰশংসা কৰি যশে কয়, তেওঁ এজন অতি শান্ত অধিনায়ক। বলাৰসকলে ৰান দি হওক বা ভাল প্ৰদৰ্শন কৰক, তেওঁ কেতিয়াও ধৈৰ্য্য হেৰুৱাব নোৱাৰে। তেওঁ নিজৰ ধাৰণা বলাৰৰ ওপৰত জাপি নিদিয়ে; তাৰ পৰিৱৰ্তে তেওঁ প্ৰথমে তেওঁলোকৰ পৰিকল্পনা সুধি তাৰ পিছত পৰামৰ্শ আগবঢ়ায়। সেইবাবেই মই তেওঁক বলাৰৰ অধিনায়ক বুলি গণ্য কৰোঁ, কাৰণ তেওঁ নিজৰ বলাৰক সম্পূৰ্ণৰূপে বিশ্বাস কৰে আৰু দিয়ে। -----------

হিন্দুস্থান সমাচাৰ / অৰৱিন্দ