নতুন দিল্লী, ২৮ মে’ (হি.স.)। ভাৰত-কানাডা ব্যাপক অৰ্থনৈতিক অংশীদাৰিত্ব চুক্তি (চিইপিএ)ৰ বাবে দ্বিপাক্ষিক অৰ্থনৈতিক সংযোগ গভীৰ আৰু আলোচনা ত্বৰান্বিত কৰাৰ লক্ষ্যৰে কেন্দ্ৰীয় বাণিজ্য আৰু উদ্যোগ মন্ত্ৰী পীয়ুষ গোৱেলে বৃহস্পতিবাৰে কানাডা ভ্ৰমণৰ তিনিদিনীয়া আনুষ্ঠানিক ভ্ৰমণৰ সামৰণি মাৰে।
বাণিজ্য আৰু উদ্যোগ মন্ত্ৰালয়ে এক বিবৃতিত কয় যে গোৱলে কানাডালৈ এতিয়ালৈকে সৰ্ববৃহৎ ভাৰতীয় ব্যৱসায়িক প্ৰতিনিধি দলৰ নেতৃত্ব দিছিল, য’ত ১০০ৰো অধিক ভাৰতীয় কোম্পানীৰ প্ৰতিনিধি আছিল। বাণিজ্য আৰু উদ্যোগ মন্ত্ৰীগৰাকীয়ে টৰন্টো আৰু অট’ৱাত নীতি নিৰ্ধাৰক, বিনিয়োগকাৰী, ব্যৱসায়িক নেতা, শিক্ষাবিদ, ভাৰত-কানাডিয়ান সম্প্ৰদায়ৰ সদস্যসকলৰ সৈতে ধাৰাবাহিকভাৱে উচ্চ পৰ্যায়ৰ বৈঠক অনুষ্ঠিত কৰে।
এই ভ্ৰমণৰ প্ৰধান উদ্দেশ্য আছিল বাণিজ্য, প্ৰযুক্তি, স্বচ্ছ শক্তি, আন্তঃগাঁথনি, উদ্ভাৱন, আৰু উন্নত উৎপাদনৰ ক্ষেত্ৰত সহযোগিতা শক্তিশালী কৰা। ভাৰত আৰু কানাডাইও বৰ্তমানৰ ৮.৫ বিলিয়ন ডলাৰৰ তুলনাত ২০৩০ চনৰ ভিতৰত দ্বিপাক্ষিক বাণিজ্য ৫০ বিলিয়ন ডলাৰলৈ বৃদ্ধি কৰাৰ প্ৰতিশ্ৰুতি পুনৰবাৰ প্ৰকাশ কৰে।
এই ভ্ৰমণৰ সময়ত বাণিজ্য মন্ত্ৰীৰ প্ৰধান উদ্দেশ্য আছিল চলি থকা চিইপিএ আলোচনা ত্বৰান্বিত কৰা আৰু প্ৰযুক্তি, উৎপাদন, আৰু স্বচ্ছ শক্তিৰ ক্ষেত্ৰত সম্পৰ্ক শক্তিশালী কৰা। গোৱালে বিনিয়োগ আৰু সহযোগিতাৰ প্ৰসাৰৰ বাবে শিক্ষাবিদ, অন্টাৰিঅ’ৰ প্ৰধানমন্ত্ৰী আৰু ব্যৱসায়িক নেতাসকলৰ সৈতে আলোচনা কৰে।
এই ভ্ৰমণৰ সময়ত গোৱেলে টৰন্টোত শিক্ষাবিদ, উদ্ভাৱন, চৰকাৰ, ব্যৱসায়িক পৰিষদ, প্ৰতিষ্ঠানিক বিনিয়োগকাৰী, আৰু ভাৰতীয় প্ৰব্ৰজনকাৰীসকলৰ সৈতে কেইবাখনো গুৰুত্বপূৰ্ণ আৰু প্ৰভাৱশালী বৈঠক অনুষ্ঠিত কৰে। এই বৈঠকসমূহে ভাৰত-কানাডা অৰ্থনৈতিক অংশীদাৰিত্বৰ চলি থকা গতিবেগক আৰু অধিক শক্তিশালী কৰি তুলিছিল আৰু বিনিয়োগ, প্ৰযুক্তি সহযোগিতা, আৰু দীৰ্ঘম্যাদী অংশীদাৰিত্বৰ বাবে ভাৰতৰ এক আগশাৰীৰ বিশ্বব্যাপী গন্তব্যস্থান হিচাপে উত্থানৰ ওপৰত গুৰুত্ব আৰোপ কৰিছিল।
হিন্দুস্থান সমাচাৰ / মনোজ কুমাৰ শইকীয়া
