মেক্সিকো চিটি, ১৩ মাৰ্চ (হি.স.)। ইউক্ৰেইনৰ টেনিছ তাৰকা এলিনা স্ভিটোলিনাই এক উজ্জ্বল প্ৰদৰ্শন আগবঢ়াই দ্বিতীয় ছিড পোলেণ্ডৰ খেলুৱৈ ইগা ছুয়াটেকক ৬-২, ৪-৬, ৬-৪ গ’লত পৰাস্ত কৰি ইণ্ডিয়ান ওৱেলছ ২০২৬ৰ ছেমিফাইনেলত প্ৰৱেশ কৰে।বিশ্বৰ প্ৰথম স্থানত থকা আৰিনা ছাবালেংকাইও কোৱাৰ্টাৰ ফাইনেলত জয়লাভ কৰি শেষৰ চাৰিটা স্থানত প্ৰৱেশ কৰে।

মেচৰ আৰম্ভণিতে ছুয়াটেকে ছন্দৰ বাহিৰত দেখা দিছিল আৰু পাঁচটা ডাবল ফল্ট কৰিছিল। ইয়াৰ সুযোগ লৈ স্ভিটোলিনাই তিনিবাৰকৈ চাৰ্ভ ভাঙি মাত্ৰ ৩৮ মিনিটতে প্ৰথম ছেটটো ৬-২ গ’লত জয়লাভ কৰে।

দ্বিতীয় ছেটত স্ভিটোলিনাই উল্লেখযোগ্য প্ৰত্যাৱৰ্তন কৰি মেচখন নিৰ্ণায়ক ছেটলৈ লৈ যায়। অৱশ্যে তৃতীয় ছেটত শ্বিট’লিনাই চাৰ্ভৰ একমাত্ৰ ব্ৰেকটো নিশ্চিত কৰি অগ্ৰগতি লাভ কৰি আত্মবিশ্বাসেৰে মেচখন জয় কৰি ছেমিফাইনেলত স্থান নিশ্চিত কৰে।

জয়ৰ পিছত স্ভিটোলিনাই কয় যে মেচখন অত্যন্ত কঠিন আছিল আৰু ছুয়াটেকে তেওঁক সদায় নিজৰ শ্ৰেষ্ঠখিনি দিবলৈ ঠেলি দিয়ে। সাত বছৰৰ মূৰত এই প্ৰতিযোগিতাৰ ছেমিফাইনেলত প্ৰৱেশ কৰি সুখ প্ৰকাশ কৰে।

মহিলাৰ একক শাখাত শীৰ্ষ ছিড আৰিনা ছাবালেংকাই ১৯ বছৰীয়া কানাডাৰ খেলুৱৈ ভিক্টোৰিয়া ম্বোকোক ৭-৬ (০), ৬-৪ গ’লত পৰাস্ত কৰি ছেমিফাইনেলত প্ৰৱেশ কৰে। প্ৰথম ছেটৰ টাইব্ৰেকত এটা পইণ্ট হেৰুৱাই জয়লাভ কৰে ছাবালেংকাই।

এতিয়া চেক গণৰাজ্যৰ লিণ্ডা নস্কোভাৰ বিৰুদ্ধে খেলিব ছাবালেংকাই। অষ্ট্ৰেলিয়াৰ কোৱালিফায়াৰ টালিয়া গিবছনক ৬-২, ৪-৬, ৬-২ গ’লত পৰাস্ত কৰি নস্কোভাই ছেমিফাইনেলত প্ৰৱেশ কৰে।

পুৰুষৰ একক শাখাত চতুৰ্থ ছিড জাৰ্মান খেলুৱৈ আলেকজেণ্ডাৰ ঝভেৰেভে ফ্ৰান্সৰ আৰ্থাৰ ফিলছক ৬-২, ৬-৩ গ’লত পৰাস্ত কৰে। এতিয়া তেওঁ মুখামুখি হ’ব বিশ্বৰ দুই নম্বৰ ইটালীৰ ইয়ানিক চিনাৰ, যিয়ে আমেৰিকাৰ লাৰ্নাৰ টিয়ানক ৬-১, ৬-২ গ’লত পৰাস্ত কৰি ছেমিফাইনেলত প্ৰৱেশ কৰে।

हिन्दुस्थान समाचार / আলোক চক্ৰৱৰ্তী