শেহতীয়াকৈ পৰিচালক আদিত্য ধৰৰ ছবি ধুৰন্ধৰই বক্স অফিচত ব্যতিক্ৰমীভাৱে ভাল প্ৰদৰ্শন কৰি হিন্দী চিনেমাত নতুন অভিলেখ গঢ়িবলৈ সক্ষম হয়। ছবিখনৰ সফলতাৰ পিছতে ইয়াৰ ছিকুৱেল ধুৰন্ধৰ: দ্য ৰিভেঞ্জ এতিয়া মুক্তিৰ বাবে সাজু হৈছে, ১৯ মাৰ্চত ছবিগৃহত মুক্তি পাব।
ইফালে, বাতৰি অনুসৰি এই ছিকুৱেলৰ পিছত আদিত্যই হয়তো দীৰ্ঘদিনীয়া অভিলাষী প্ৰকল্পৰ কাম আৰম্ভ কৰিব, যাৰ বাবে তেওঁ দক্ষিণৰ ছুপাৰষ্টাৰ আল্লু অৰ্জুনৰ সৈতে সহযোগিতা কৰাৰ পৰিকল্পনা কৰিছে।
খবৰ অনুসৰি এই প্ৰকল্প সন্দৰ্ভত আদিত্য ধৰ আৰু আল্লু অৰ্জুনৰ মাজত ইতিমধ্যে আলোচনা আৰম্ভ হৈছে। খবৰ পোৱা গৈছে যে আদিত্যই কেইবছৰমান আগতে আল্লু অৰ্জুনৰ আগত এই কাহিনী বৰ্ণনা কৰিছিল, আৰু এতিয়া দুয়োৰে মাজত পুনৰ এবাৰ আলোচনা তীব্ৰতৰ হৈ পৰিছে। সূত্ৰসমূহে জনোৱা মতে, এই সম্ভাৱ্য সহযোগিতাৰ বাবে দুয়োজন অভিনেতা অতিশয় উৎসাহিত যদিও আনুষ্ঠানিক ঘোষণা এতিয়াও বাকী আছে।
পৌৰাণিক কাহিনীৰ পৰা অনুপ্ৰাণিত এক গ্ৰেণ্ড কাহিনীৰ আধাৰত নিৰ্মাণ হ’ব পাৰে বুলি চৰ্চা চলিছে, আৰু ইয়াক গ্ৰেণ্ড স্কেলত নিৰ্মাণ কৰাৰ পৰিকল্পনা কৰা হৈছে। অনুমান কৰা হৈছে যে ধুৰন্ধৰ: দ্য ৰিভেঞ্জ মুক্তি পোৱাৰ পিছতে মেকাৰসকলে এই নতুন প্ৰজেক্টটো ঘোষণা কৰিব পাৰে। বৰ্তমান আল্লু অৰ্জুন আগন্তুক ছবি AA23 আৰু AA22xA6ত ব্যস্ত যদিও আদিত্য ধৰৰ সৈতে সম্ভাৱ্য সহযোগিতাই ইতিমধ্যে চলচ্চিত্ৰ মহলত এক হুলস্থুলৰ সৃষ্টি কৰিছে।
हिन्दुस्थान समाचार / আলোক চক্ৰৱৰ্তী
