নতুন দিল্লী, ০৯ ফেব্ৰুৱাৰী (হি.স.)। দেশত সোমবাৰৰ পৰা ১৩ ফেব্ৰুৱাৰীলৈ ই-আৱৰ্জনা নিয়ন্ত্ৰণ আৰু পুনঃব্যৱহাৰৰ ওপৰত আন্তঃৰাষ্ট্ৰীয় অধ্যয়নৰ বাবে ছখন দেশৰ প্ৰতিনিধি ভাৰতত উপস্থিত হৈছে। আন্তঃৰাষ্ট্ৰীয় দূৰসংযোগ সংঘ (আই টি ইউ) আৰু দূৰসংযোগ বিভাগৰ উদ্যোগত এই কাৰ্যসূচী গ্ৰহণ কৰা হৈছে।
কেন্দ্ৰীয় যোগাযোগ মন্ত্ৰালয়ৰ মতে, এই কাৰ্যসূচীত কলম্বিয়া, ডমিনিকান ৰিপাব্লিক, ভাৰত, মালয়েছিয়া, নাইজেৰিয়া আৰু দক্ষিণ আফ্ৰিকাৰ প্ৰতিনিধি অন্তৰ্ভুক্ত। প্ৰথম দিনটোত প্ৰায় ৪০ জন অংশগ্ৰহণকাৰী উপস্থিত আছিল।
যোগাযোগ মন্ত্ৰালয়ে জনোৱা মতে, এই কাৰ্যসূচীত ৯ ফেব্ৰুৱাৰীৰ পৰা ১১ ফেব্ৰুৱাৰীলৈ কাৰিকৰী কৰ্মশালা অনুষ্ঠিত হ’ব। ইয়াত ই-আৱৰ্জনা আইন, উৎপাদকৰ দায়িত্ব আৰু ডিজিটেল নিৰীক্ষণ ব্যৱস্থাৰ বিষয়ে আলোচনা কৰা হ’ব। ইলেক্ট্ৰনিকছ আৰু টেলিকমিউনিকেচন খণ্ডত চক্ৰ মডেলৰ ওপৰতো গুৰুত্ব দিয়া হ’ব।
ডিজিটেল যোগাযোগ আয়োগৰ সদস্য ৰুদ্ৰ নাৰায়ণ পালাই ই-আৱৰ্জনা পুনঃব্যৱহাৰৰ ক্ষেত্ৰত ভাৰত বিশ্বৰ আগশাৰীৰ দেশ হ’ব পাৰে বুলি উল্লেখ কৰে। তেওঁ লগতে কয় যে সঠিক ব্যৱস্থাপনাই সেউজ চাকৰিৰ সৃষ্টি কৰিব আৰু কেঁচামালৰ নাটনি হ্ৰাস কৰিব।
কলম্বিয়াৰ ৰাষ্ট্ৰদূত ড০ ভিক্টৰ হুগো ইচেভেৰী জাৰামিলোৱে কয় যে এই ভ্ৰমণ কেৱল কাৰিকৰী অনুষ্ঠান নহয়। ই দেশসমূহৰ মাজত আস্থা আৰু দীৰ্ঘম্যাদী সহযোগিতাৰ এক মঞ্চ।
দূৰসংযোগ বিভাগৰ উপদেষ্টা সুভেন্দু তিৱাৰীয়ে কয় যে উদ্যোগৰ অংশগ্ৰহণ অতি প্ৰয়োজনীয়, লগতে শক্তিশালী নিয়ম। তেওঁ আধুনিক পুনঃব্যৱহাৰৰ আন্তঃগাঁথনিত বিনিয়োগৰ ওপৰত গুৰুত্ব আৰোপ কৰে।
১২ ফেব্ৰুৱাৰীত প্ৰতিনিধিসকলে ৰাজস্থানৰ আলৱাৰত থকা ই-ৱেষ্ট ৰিচাইক্লিং ইউনিট এটা পৰিদৰ্শন কৰিব। ১৩ ফেব্ৰুৱাৰীত আই টি ইউৰ আঞ্চলিক কাৰ্যালয় আৰু উদ্ভাৱন কেন্দ্ৰ ভ্ৰমণ কৰা হ’ব।
এই অধ্যয়ন ভ্ৰমণ ২০২৫ চনৰ অক্টোবৰ মাহত কলম্বিয়াত প্ৰথম বিনিময়ৰ পিছত কৰা হৈছে।পৰৱৰ্তী অধ্যয়ন ভ্ৰমণ ২০২৬ চনৰ এপ্ৰিল মাহত দক্ষিণ আফ্ৰিকাত হ’ব।
উল্লেখযোগ্য যে বিশ্বজুৰি প্ৰতি বছৰে ৬.২ কোটি টন ই-আৱৰ্জনা উৎপন্ন হয়। এই আৱৰ্জনাসমূহৰ মাত্ৰ ২২.৩ শতাংশহে আনুষ্ঠানিকভাৱে সংগ্ৰহ আৰু পুনঃব্যৱহাৰ কৰা হয়।
हिन्दुस्थान समाचार
