মুম্বাই, ০২ নৱেম্বৰ (হি.স.)। বলীউড অভিনেতা শ্বাহৰুখ খানৰ বান্দ্ৰা বাসগৃহ ‘মন্নত’ৰ বাহিৰত তেওঁৰ ৬১ সংখ্যক জন্মদিনত অনুৰাগীৰ সমাগম হ’বলৈ আৰম্ভ কৰে। নিজৰ প্ৰিয় অভিনেতাৰ আভাস পাবলৈ পুৱাৰ পৰাই বৃহৎ সংখ্যক অনুৰাগী আহিবলৈ ধৰিলে।

বৃহৎ জনসমাগমৰ পৰিপ্ৰেক্ষিতত মুম্বাই আৰক্ষীয়ে কটকটীয়া নিৰাপত্তা ব্যৱস্থা গঢ়ি তোলে । বাসগৃহৰ বাহিৰত আৰক্ষীৰ নিয়োগ বৃদ্ধি কৰাৰ লগতে বেৰিকেড আৰু কাষেৰে পাৰ হৈ যোৱা বাহনসমূহ পৰীক্ষা কৰা হয়। আৰক্ষী বিষয়াসকলে অহৰহ ভিৰ নিয়ন্ত্ৰণ আৰু অঞ্চলটোত আইন-শৃংখলা বজাই ৰখাৰ কামত ব্যস্ত আছিল।

শ্বাহৰুখ খানৰ জন্মদিন প্ৰতি বছৰে তেওঁৰ অনুৰাগীৰ বাবে এক উৎসাহৰ দিন । এই বিশেষ অনুষ্ঠানত দেশৰ বিভিন্ন প্ৰান্তৰ পৰা অনুৰাগীসকলে ‘মন্নত’ৰ বাহিৰত সমবেত হৈ অভিনেতাগৰাকীক জন্মদিনৰ শুভেচ্ছা জনায় । শ্বাহৰুখ খানেও প্ৰায়ে নিজৰ বেলকনিত বা বাহিৰত অনুৰাগীক সম্ভাষণ জনাবলৈ ওলাই আহি তেওঁলোকৰ মৰমৰ বাবে কৃতজ্ঞতা প্ৰকাশ কৰে । বিপুল জনসমাগমৰ আগতীয়াকৈ অনুমান কৰি আৰক্ষীয়ে আগতীয়াকৈ নিৰাপত্তাৰ ব্যাপক ব্যৱস্থা কৰিলে ।

ইফালে শ্বাহৰুখ খানৰ আগন্তুক ছবি “কিং”ক লৈও উৎসাহৰ পৰিৱেশৰ সৃষ্টি হৈছে। সিদ্ধাৰ্থ আনন্দৰ পৰিচালনাৰে নিৰ্মিত এই ছবিখন অহা ২৪ ডিচেম্বৰত বিশ্বৰ চিনেমাগৃহত মুক্তি পাব। ইয়াৰ প্ৰযোজক হৈছে ৰেড চিলিজ এণ্টাৰটেইনমেণ্ট আৰু মাৰ্ফ্লিক্স পিকচাৰ্ছ। ছবিখনৰ আন্তঃৰাষ্ট্ৰীয় বিতৰণৰ সন্দৰ্ভত ৰেড চিলিজ এণ্টাৰটেইনমেণ্টৰ চিইঅ’ ভেংকি মহীশূৰে কয় যে ফাৰ্ছে ছবিখনৰ বহিঃৰাজ্যত বিতৰণৰ কাম চম্ভালিব। তেওঁ আশা প্ৰকাশ কৰে যে কোম্পানীটোৰ বিশ্বব্যাপী প্ৰসাৰ আৰু বজাৰৰ বুজাবুজিয়ে ছবিখনক আন্তঃৰাষ্ট্ৰীয় দৰ্শকৰ মাজলৈ যোৱাত সহায় কৰিব।

--------------

হিন্দুস্থান সমাচাৰ / অৰৱিন্দ