নতুন দিল্লী, ১৩ নৱেম্বৰ (হি.স.)। কেন্দ্ৰীয় চৰকাৰেদেশৰ পৰা পলাতক হৈ থকা অবৈধ কাৰ্যকলাপ (প্ৰতিৰোধ) আইনৰ অধীনত বিতৰ্কিত ইছলামিক প্ৰচাৰক জাকিৰ নাইকৰ ইছলামিক ৰিচাৰ্চ ফাউণ্ডেশ্যন (আই আৰ এফ)ৰ ওপৰত ৫ বছৰৰ বাবে নিষেধাজ্ঞা বৃদ্ধি কৰিছে । বৰ্তমানৰ নিষেধাজ্ঞাৰ ম্যাদ ২০২৬ চনৰ ১৪ নৱেম্বৰত শেষ হ’বলগীয়া আছিল। শুকুৰবাৰে গৃহ মন্ত্ৰালয়ে এক অধিসূচনা জাৰি কৰি আই আৰ এফক অবৈধ সংগঠন বুলি ঘোষণা কৰে।
গৃহ মন্ত্ৰালয়ে এক্স-পোষ্টত উল্লেখ কৰিছে যে এই সিদ্ধান্ত প্ৰধানমন্ত্ৰী নৰেন্দ্ৰ মোডীৰ সন্ত্ৰাসবাদ আৰু ৰাষ্ট্ৰীয় বিৰোধী কাৰ্যকলাপৰ প্ৰতি শূন্য সহনশীলতাৰ দৃষ্টিভংগী অনুসৰি লোৱা হৈছে। জাকিৰ নাইকৰ নেতৃত্বত গঠিত সংগঠনটোৱে সাম্প্ৰদায়িক ঘৃণা উচটনি দিয়া আৰু সন্ত্ৰাসবাদৰ প্ৰচাৰকে ধৰি ভাৰত বিৰোধী কাৰ্যকলাপৰ সৈতে জড়িত হৈ পৰিছে।
অধিসূচনা অনুসৰি কেন্দ্ৰীয় চৰকাৰে পূৰ্বে ২০১৬ চনৰ ১৭ নৱেম্বৰ আৰু ২০২১ চনৰ ১৫ নৱেম্বৰত আই আৰ এফক অবৈধ সংস্থা হিচাপে ঘোষণা কৰিছিল। অবৈধ কাৰ্যকলাপ (প্ৰতিৰোধ) আইনৰ অধীনত গঠন কৰা ন্যায়াধিকৰণেও এই নিষেধাজ্ঞাসমূহ নিশ্চিত কৰিছিল। বৰ্তমানৰ নিষেধাজ্ঞাৰ সময়সীমা ২০২৬ চনৰ ১৪ নৱেম্বৰত শেষ হ’বলৈ গৈ আছিল।
গৃহ মন্ত্ৰালয়ে অধিসূচনাখনত উল্লেখ কৰিছে যে চৰকাৰৰ মতামত অনুসৰি আই আৰ এফ আৰু ইয়াৰ সদস্যসকলে বিশেষকৈ সংগঠনটোৰ প্ৰতিষ্ঠাপক তথা সভাপতি ড০ জাকিৰ আব্দুল কৰিম নাইকে ধৰ্মীয় ভিত্তিত বিভিন্ন সম্প্ৰদায়ৰ মাজত শত্ৰুতা আৰু ঘৃণাৰ প্ৰচাৰ কৰি আহিছে। জাকিৰ নাইকৰ ভাষণ আৰু বক্তব্যই বিভিন্ন ধৰ্মীয় সম্প্ৰদায়ৰ মাজত শত্ৰুতা আৰু ঘৃণাক প্ৰসাৰিত কৰিছিল। এই ভাষণসমূহে ভাৰতৰ লগতে বিদেশৰ বিশেষ ধৰ্মৰ যুৱক-যুৱতীসকলক সন্ত্ৰাসবাদী কাৰ্যকলাপত লিপ্ত হ’বলৈ উচটনি দিছিল।
অধিসূচনাখনত উল্লেখ কৰা হৈছে যে যদি সংগঠনটোৰ কাৰ্যকলাপ ৰোধ কৰা নহয় তেন্তে ই নিজৰ পলায়ন কৰা কৰ্মীসকলক পুনৰ সংগঠিত কৰিব পাৰে, সাম্প্ৰদায়িক ঘৃণা বিয়পাব পাৰে, বিচ্ছিন্নতাক প্ৰসাৰিত কৰিব পাৰে। ইউএপিএৰ ধাৰা ৩ৰ উপ-ধাৰা (১) আৰু (৩)ৰ অধীনত আইআৰএফক অবৈধ সংস্থা হিচাপে ঘোষণা কৰি চৰকাৰে নিষেধাজ্ঞাৰ সময়সীমা পাঁচ বছৰ নিৰ্ধাৰণ কৰিছে।
হিন্দুস্থান সমাচাৰ / মনোজ কুমাৰ শইকীয়া
