কাঠমাণ্ডু, ০৩ অক্টোবৰ (হি.স.)। উৎসৱ বা জৰুৰীকালীন অৱস্থাত যাত্ৰীৰ পৰা স্বেচ্ছাচাৰী বিমান ভাড়া ল’লে নেপালৰ বিমান সংস্থাই কঠোৰ আইনী আৰু আৰ্থিক ব্যৱস্থা গ্ৰহণ কৰিবলৈ ওলাইছে।
নেপাল অসামৰিক বিমান পৰিবহণ কৰ্তৃপক্ষ আইন সংশোধন আৰু সংহতিৰ বাবে ফেডাৰেল সংসদত উত্থাপন কৰা এখন বিধেয়কত অনুমোদিত ভাড়াতকৈ অধিক মূল্য লোৱা বিমান সংস্থাসমূহৰ ওপৰত ১৫ লাখ নেপালী টকা পৰ্যন্ত জৰিমনা বিহাৰ প্ৰস্তাৱ কৰা হৈছে।
যাত্ৰীসকলৰ পৰা অতিৰিক্ত ধন লোৱাৰ প্ৰৱণতাক নিৰুৎসাহিত কৰিবলৈ বিধেয়কখনৰ ৪৭ নং ধাৰাত বিমান ভাড়াৰ অনিয়মক গুৰুতৰ অপৰাধ হিচাপে শ্ৰেণীভুক্ত কৰা হৈছে।
অনুমোদিত বিমান ভাড়াতকৈ অধিক হাৰত বিমান চলাচল কৰাটো আইনৰ অধীনত অপৰাধ বুলি গণ্য কৰা হ’ব।
যদিহে এনে অপৰাধ প্ৰমাণিত হয় তেন্তে বিমান সংস্থাসমূহে যথেষ্ট আৰ্থিক জৰিমনা ভৰিব লাগিব। বিধেয়কখনৰ ধাৰা ৪৮(১)(খ)ৰ অধীনত অনুমোদিত ভাড়াতকৈ অধিক ধন লোৱা যিকোনো বিমান সংস্থা বা ব্যক্তিৰ ওপৰত ৫ লাখৰ পৰা ১ লাখ ৫০ হাজাৰ নেপালী টকাৰ ভিতৰত জৰিমনা বিহাৰ বাবে সঞ্চালক প্ৰধানে কৰ্তৃত্ব লাভ কৰিছে।
ইতিমধ্যে জৰিমনা আদায় দিয়াৰ পিছতো যাত্ৰীৰ পৰা বাৰে বাৰে অতিৰিক্ত ধন লোৱা বিমান সংস্থাসমূহে কঠোৰ ব্যৱস্থাৰ সন্মুখীন হ’ব লাগিব। বিধেয়কখনত উল্লেখ আছে যে পূৰ্বতে শাস্তি পোৱা যিকোনো ব্যক্তি বা সত্তাই একেটা অপৰাধ পুনৰাবৃত্তি কৰিলে পূৰ্বৰ শাস্তিতকৈ দুগুণ জৰিমনা বিহা হ’ব।
এই আইন কাৰ্যকৰী হোৱাৰ পিছত ঘূৰ্ণীবতাহ, বেয়া বতৰ, প্ৰাকৃতিক দুৰ্যোগৰ সময়ত যাত্ৰীসকলে টিকটৰ উচ্চ মূল্য আৰু ইচ্ছাকৃত বিমান ভাড়াৰ পৰা সকাহ পোৱাৰ সম্ভাৱনা আছে আৰু টিকটৰ ক’লা বিপণন ৰোধ কৰা হ’ব।
হিন্দুস্থান সমাচাৰ / মনোজ কুমাৰ শইকীয়া
