- ড্ৰ’নৰ সহায়ত হাবিত লুকাই থকা আঠজন কয়দীক গ্ৰেপ্তাৰ, নিলম্বিত ৯জন কাৰাগাৰৰ প্ৰহৰী

থেনি, ২৭ অক্টোবৰ (হি.স.)। তামিলনাডুৰ থেনি জিলাৰ থেককাম্পট্টি কাৰাগাৰৰ পৰা আক্ৰমণ কৰি পলায়ন কৰা ১৭ জন কয়দীৰ ভিতৰত ১৩জনক গ্ৰেপ্তাৰ কৰিছে আৰক্ষীয়ে। মঙলবাৰে বিশেষ আৰক্ষীৰ দলে ড্ৰ’ন ব্যৱহাৰ কৰি অৰণ্যত আত্মগোপন কৰি থকা আৰু আঠজন কয়দীক আটক কৰে। ইতিমধ্যে ৫জন কয়দীক গ্ৰেপ্তাৰ কৰা হৈছিল। বাকী চাৰিজনৰ সন্ধানত আৰক্ষীৰ অভিযান অব্যাহত আছে। ইফালে কাৰাগাৰৰ পলায়নৰ সৈতে জড়িত ৯ গৰাকী নিৰাপত্তাৰক্ষীক নিলম্বন কৰা হৈছে।

সোমবাৰে নিশা থেনি জিলাৰ আন্দিপাট্টিৰ সমীপৰ থেক্কাম্পট্টি কাৰাগাৰত এজন কয়দীয়ে নিৰাপত্তাৰক্ষীক অন্যমনস্ক কৰিবলৈ জব্দ কৰাৰ অভিনয় কৰে। পলায়নৰ সময়ত কয়দীসকলে প্ৰহৰীসকলক আক্ৰমণ কৰি কাৰাগাৰৰ নিৰাপত্তা ব্যৱস্থা ভাঙি ১৭ জন কয়দী পলায়ন কৰিবলৈ সক্ষম হয়। এই ঘটনাই কাৰাগাৰ প্ৰশাসন আৰু আৰক্ষীৰ ভিতৰত আতংকৰ সৃষ্টি কৰে।

ততাতৈয়াকৈ থেনি জিলা আৰক্ষীয়ে ১৭টা বিশেষ দল গঠন কৰি পলায়ন কৰা কয়দীক আটক কৰে। কেৰালাকে ধৰি চুবুৰীয়া ৰাজ্যৰ সীমান্তত আৰক্ষীয়ে নিৰাপত্তা বৃদ্ধি কৰাৰ লগতে জিলাখনৰ পৰা পলায়ন কৰিব নোৱাৰাকৈ যান-বাহনৰ নিবিড় পৰীক্ষা আৰম্ভ কৰে। তালাচী অভিযানৰ প্ৰাৰম্ভিক পৰ্যায়ত গ্ৰেপ্তাৰ কৰা হয় ৫ জন কয়দী।

কাৰাগাৰৰ আশে-পাশে থকা হাবিত একাংশ কয়দী লুকাই থাকিব পাৰে বুলি আৰক্ষীয়ে সন্দেহ প্ৰকাশ কৰিছে। ইয়াৰ পিছতে বিশেষ দলসমূহে ড্ৰ’ন কেমেৰা ব্যৱহাৰ কৰি অনুসন্ধান অভিযান চলায়। ড্ৰ’ন কেমেৰাত বন্দী হৈছে ৮ জন কয়দী এজনৰ পিছত এজনকৈ সংকীৰ্ণ অৰণ্যৰ পথেৰে খোজ কাঢ়ি যোৱা। তেওঁলোকৰ গতিবিধি ধৰা পৰাৰ লগে লগে আৰক্ষীৰ দলে অৰণ্যত প্ৰৱেশ কৰি অস্ত্ৰ-শস্ত্ৰ ব্যৱহাৰ কৰি অঞ্চলটো ঘেৰি ধৰে আৰু আঠজন কয়দীকে গ্ৰেপ্তাৰ কৰে।

ধৃত কয়দী কেইজনক পুনৰ কাৰাগাৰলৈ লৈ যোৱা হৈছে আৰু তাতেই জেৰা অব্যাহত ৰাখিছে। আৰক্ষীয়ে এতিয়া বাকী চাৰিজন পলায়ন কৰা কয়দীৰ সন্ধানত অভিযান চলাইছে। সীমান্তৱৰ্তী অঞ্চলসমূহৰ বনাঞ্চল আৰু সম্ভাৱ্য আত্মগোপন স্থানসমূহত চোৰাংচোৱাগিৰি তীব্ৰতৰ কৰা হৈছে।

প্ৰাথমিক তথ্য অনুসৰি থেনি উপকাৰাগাৰত চাৰিটা ব্লক আছে, য’ত মুঠ ৩০ জন কয়দী আছে। ইয়াৰে ১৭ জন কয়দী সোমবাৰে নিশা তিনি স্তৰৰ নিৰাপত্তা ব্যৱস্থা ভংগ কৰি পলায়ন কৰে। পলায়ন কৰা কয়দীসকলৰ ভিতৰত আছে এজন বিশেষভাৱে সক্ষম ব্যক্তি, যাৰ কাৰাগাৰৰ পৰা পলায়ন কৰাটোৱে প্ৰশ্ন উত্থাপন কৰিছে।

ঘটনাৰ পিছতে কাৰাগাৰ প্ৰশাসনৰ নিৰাপত্তাৰ ব্যৱস্থাক লৈও প্ৰশ্ন উত্থাপন হৈছে। গাফিলতিৰ বাবে নিলম্বন কৰা হৈছে ৯ গৰাকী কাৰাগাৰৰ প্ৰহৰী। ইফালে কাৰাগাৰ বিভাগৰ আৰক্ষী সঞ্চালক প্ৰধান সন্দীপ ৰায় ৰাথোৰে কাৰাগাৰত উপস্থিত হৈ ঘটনাস্থলী পৰিদৰ্শন কৰি সমগ্ৰ ঘটনাৰ তথ্য সংগ্ৰহ কৰে।

হিন্দুস্থান সমাচাৰ / মনোজ কুমাৰ শইকীয়া