নতুন দিল্লী, ২৭ অক্টোবৰ (হি.স.)। প্ৰধানমন্ত্ৰী নৰেন্দ্ৰ মোদীয়ে মঙলবাৰে কয় যে ভাৰত এতিয়া বিজ্ঞান আৰু প্ৰযুক্তিৰ ক্ষেত্ৰত বিশ্বৰ সাফল্যসমূহ গ্ৰহণ কৰাত সীমাবদ্ধ হৈ থকা নাই, বৰঞ্চ নতুন প্ৰযুক্তিৰ বিকাশ, ইয়াৰ দিশ গঢ় দিয়া, বিশ্বজনীন সমস্যাৰ সমাধানৰ সামৰ্থ্য অৰ্জন কৰাৰ লক্ষ্যৰে আগবাঢ়িছে। তেওঁ কয় যে ভাৰতে ভৱিষ্যতৰ প্ৰযুক্তিবিদ্যাৰ বিকাশৰ ক্ষেত্ৰত বিশ্বক গ্ৰহণ, উদ্ভাৱন আৰু নেতৃত্ব দিবলৈ সাজু হ’ব লাগিব।

ভাৰত মণ্ডপমত অনুষ্ঠিত ইমাৰ্জিং ছায়েন্স, টেকন’লজি এণ্ড ইনোভেচন কনক্লেভ (ইএছটিআইচি) ২০২৬ উদ্বোধন কৰাৰ পিছত ভাষণত প্ৰধানমন্ত্ৰীয়ে কয় যে ভাৰতীয় যুৱক-যুৱতীসকলৰ দক্ষতা, আত্মবিশ্বাস, আৰু উদ্ভাৱনৰ প্ৰতি থকা উৎসাহে দেশৰ ভৱিষ্যত উজ্জ্বল কৰি তোলে। দশক দশক আগতে ভাৰতত বিজ্ঞান আৰু প্ৰযুক্তিৰ অৰ্থ আছিল বিশ্বব্যাপী বিকশিত প্ৰযুক্তি গ্ৰহণ বা উন্নত কৰা, কিন্তু একবিংশ শতিকাৰ ভাৰতে এক নতুন চিন্তা আৰু আত্মবিশ্বাসেৰে আগবাঢ়িছে।

ক’ভিড-১৯ মহামাৰীৰ উদাহৰণ দি প্ৰধানমন্ত্ৰীয়ে কয় যে যেতিয়া বিশ্বৰ বহু দেশ ভেকচিন উপলব্ধতাৰ ক্ষেত্ৰত প্ৰত্যাহ্বানৰ সন্মুখীন হৈছিল, তেতিয়া ভাৰতে নিজাকৈ ভেকচিন প্ৰস্তুত কৰিছিল, গণ টিকাকৰণৰ কাম কৰিছিল, আৰু আন দেশৰ বাবে ভেকচিন উপলব্ধ কৰিছিল। তেওঁ কয় যে ইয়াৰ দ্বাৰা একবিংশ শতিকাত ভাৰতৰ আত্মবিশ্বাসৰ উদাহৰণ।

মোদীয়ে উল্লেখ কৰে যে ভাৰতে প্ৰথম প্ৰচেষ্টাতে মংগল গ্ৰহত উপনীত হোৱা আৰু চন্দ্ৰৰ দক্ষিণ মেৰুত অৱতৰণ কৰাৰ দৰে মাইলৰ খুঁটি অৰ্জন কৰিছে। ভাৰতে পাৰমাণৱিক শক্তি, মহাকাশ, কৃত্ৰিম বুদ্ধিমত্তা (এআই), আৰু অৰ্ধপৰিবাহী আদি ক্ষেত্ৰত নিজৰ সামৰ্থ্য আৰু আত্মবিশ্বাস অহৰহ শক্তিশালী কৰি আছে।

পাৰমাণৱিক শক্তিৰ ক্ষেত্ৰত ভাৰতৰ অগ্ৰগতিৰ কথা উল্লেখ কৰি প্ৰধানমন্ত্ৰীয়ে কয় যে উন্নত ভাৰত নিৰ্মাণৰ বাবে বৃহৎ পৰিসৰৰ পাৰমাণৱিক শক্তিৰ প্ৰয়োজন হ’ব। পাৰমাণৱিক ইন্ধন আমদানিৰ ওপৰত নিৰ্ভৰশীলতাই শক্তি সুৰক্ষাৰ বাবে প্ৰত্যাহ্বানৰ সৃষ্টি কৰিছে, আৰু সেয়েহে ভাৰতে নিজাকৈ দ্ৰুত প্ৰজননকাৰী ৰিয়েক্টৰ প্ৰযুক্তি বিকশিত কৰি আছে। তেওঁ ব্যাখ্যা কৰে যে কেইমাহমানৰ আগতে দেশখনৰ ৫০০ মেগাৱাটৰ প্ৰ’ট’টাইপ ফাষ্ট ব্ৰীডাৰ ৰিয়েক্টৰে প্ৰথমবাৰৰ বাবে নিয়ন্ত্ৰিত পাৰমাণৱিক বিভাজন লাভ কৰিছিল, যিটো দীৰ্ঘম্যাদী শক্তিৰ স্বাৱলম্বীতাৰ দিশত এক উল্লেখযোগ্য সফলতা।

মোদীয়ে কয় যে ভাৰতৰ এটা ডাঙৰ শক্তি নিহিত হৈ আছে পৰিসৰত সমাধান বিকশিত কৰি সাধাৰণ জনতাৰ বাবে সুলভ কৰি তোলাৰ ক্ষমতাত। দেশৰ ডিজিটেল ৰাজহুৱা আন্তঃগাঁথনি আৰু ৫জি প্ৰযুক্তি ইয়াৰ প্ৰধান উদাহৰণ। ভাৰতে ব্যাপকভাৱে বিতৰণ কৰিব পৰা আৰু বাস্তৱ সমস্যা সমাধান কৰিব পৰা সুৰক্ষিত প্ৰযুক্তিগত সমাধান বিকশিত কৰাৰ দিশত আগবাঢ়িছে।

প্ৰধানমন্ত্ৰীয়ে কয় যে বিজ্ঞান আৰু প্ৰযুক্তিক প্ৰায়ে ক্ষমতাৰ প্ৰদৰ্শন বা সংঘাতৰ মাধ্যম হিচাপে দেখা যায় যদিও ভাৰতে বিশ্বাস কৰে যে ইয়াৰ উদ্দেশ্য মানৱতাৰ সেৱা হ’ব লাগে। কোনো প্ৰযুক্তিৰ সফলতা কেৱল ইয়াৰ উন্নত ক্ষমতাৰ দ্বাৰা নিৰ্ধাৰিত নহয়, বৰঞ্চ ই বাস্তৱ জীৱনৰ সমস্যাসমূহ কিমানখিনি সমাধান কৰে তাৰ ওপৰত নিৰ্ভৰ কৰে। পৰীক্ষাগাৰত বিকশিত কৰা প্ৰযুক্তিয়ে যেতিয়া মাটিত কাৰ্যকৰী কৰি সাধাৰণ নাগৰিকৰ জীৱন উন্নত কৰে তেতিয়াই বিজ্ঞানৰ প্ৰকৃত সফলতা।

গৱেষণাক এখন দেশৰ প্ৰযুক্তিগত সামৰ্থ্য আৰু আত্মনিৰ্ভৰশীলতাৰ ভেটি বুলি অভিহিত কৰি মোদীয়ে কয় যে গৱেষণাৰ জৰিয়তেহে এখন দেশে নিজৰ সমস্যাৰ সমাধান বিচাৰি উলিওৱাৰ ক্ষমতা লাভ কৰে আৰু জটিল প্ৰযুক্তিবিদ্যাত আত্মনিৰ্ভৰশীল হয়। বিজ্ঞানৰ বিজয়, গৱেষণাৰ বিজয় মন্ত্ৰৰ উদ্ধৃতি দি তেওঁ কয় যে দেশৰ গৱেষণা পৰিৱেশ তন্ত্ৰক নিৰন্তৰ শক্তিশালী কৰি তোলা হৈছে আৰু উন্নত ভাৰতৰ লক্ষ্যত উপনীত হ'বলৈ ৰাষ্ট্ৰীয় গৱেষণা ন্যাসক ত্বৰান্বিত কৰা হৈছে।

প্ৰধানমন্ত্ৰীয়ে কয় যে যোৱা বছৰ গৱেষণা, উন্নয়ন, আৰু উদ্ভাৱনৰ বাবে এই মঞ্চৰ পৰাই ১ লাখ কোটি টকাৰ প্ৰতিশ্ৰুতি দিয়া হৈছিল আৰু ইয়াৰ ফলাফল এতিয়া দৃশ্যমান হৈছে। যোৱা এটা বছৰত পৰীক্ষাগাৰত বিকশিত আৰু বাণিজ্যিকীকৰণৰ বাবে সাজু প্ৰযুক্তিসমূহ বজাৰলৈ অনাৰ বাবে প্ৰায় ১২,০০০ কোটি টকাৰ প্ৰতিশ্ৰুতি দিয়া হৈছে। ব্যক্তিগত বিনিয়োগকাৰীয়েও এই পদক্ষেপত অংশগ্ৰহণ কৰিছে। চৰকাৰৰ প্ৰতিশ্ৰুতিৰ সৈতে মিল থকা ₹১২,০০০ কোটি বিনিয়োগ কৰাৰ প্ৰতিশ্ৰুতি দিছে। ইয়াৰ ফলত গৱেষণা, উন্নয়ন, আৰু উদ্ভাৱনৰ বাবে মুঠ প্ৰতিশ্ৰুতি এবছৰত ২৪,০০০ কোটি ₹ হৈছে।

মোদীয়ে উল্লেখ কৰে যে ভাৰতৰ গৱেষণা পৰিৱেশ তন্ত্ৰ অহৰহ সম্প্ৰসাৰিত হৈ আছে। এদশক পূৰ্বে বছৰি ১০ হাজাৰতকৈও কম পেটেণ্ট আবেদন দাখিল কৰা হৈছিল, আনহাতে যোৱা বছৰ এই সংখ্যা ১.৫ লাখলৈ বৃদ্ধি পাইছিল। তেওঁ ইয়াক গৱেষণা আৰু উদ্ভাৱনৰ প্ৰতি ক্ৰমাৎ বৃদ্ধি পোৱা আগ্ৰহ আৰু দেশত পৰিৱৰ্তিত বৈজ্ঞানিক সংস্কৃতিৰ লক্ষণ বুলি অভিহিত কৰে।

প্ৰধানমন্ত্ৰীয়ে কয় যে বিজ্ঞানী আৰু গৱেষণা প্ৰতিষ্ঠানসমূহ কেৱল আজিৰ প্ৰয়োজনীয়তাৰ বাবেই নহয়, ভৱিষ্যতৰ প্ৰত্যাহ্বানৰ বাবেও সাজু হ’ব লাগিব। অৰ্ধপৰিবাহী, কোৱাণ্টাম প্ৰযুক্তি, জৈৱ প্ৰযুক্তি, উন্নত সামগ্ৰী, ৰবটিক্স, মহাকাশ, স্বচ্ছ শক্তি, আৰু পৰৱৰ্তী প্ৰজন্মৰ যোগাযোগ প্ৰযুক্তি এনে ক্ষেত্ৰ যিয়ে ভৱিষ্যতক গঢ় দিব। এই ক্ষেত্ৰসমূহত গৱেষণা আৰু উদ্ভাৱনক প্ৰসাৰিত কৰাটো ভাৰতৰ প্ৰযুক্তিগত সামৰ্থ্য আৰু আত্মনিৰ্ভৰশীলতাক শক্তিশালী কৰাৰ বাবে অতি গুৰুত্বপূৰ্ণ।

মোদীয়ে উল্লেখ কৰে যে ভাৰতীয় ষ্টাৰ্টআপ আৰু কোম্পানীসমূহে বিভিন্ন উদীয়মান প্ৰযুক্তিৰ ক্ষেত্ৰত থলুৱা সমাধান বিকশিত কৰি আছে। এটা ষ্টাৰ্টআপে মগজুৰ কাৰ্যকলাপ বুজিবলৈ সহায় কৰা ৱেয়াৰেবল ইইজি (ইলেক্ট্ৰ’এনচেফেল’গ্ৰাফী) প্ৰযুক্তিৰ ওপৰত কাম কৰি আছে। ভাৰতীয় কোম্পানীসমূহে থলুৱা বেতাঁৰ আৰু উপগ্ৰহ যোগাযোগ সমাধান বিকশিত কৰি আছে। পুষ্টিৰ ক্ষেত্ৰত নিৰ্দিষ্ট খাদ্যৰ প্ৰয়োজনীয়তা পূৰণ কৰা সামগ্ৰীসমূহ বিকশিত কৰা হৈছে, আনহাতে ছেমিকণ্ডাক্টৰ খণ্ডত নতুন প্ৰযুক্তিৰ ওপৰতো কাম কৰা হৈছে। তেওঁ অৱগত কৰে যে ভাৰতত ইস্পাত উদ্যোগৰ পৰা ওলোৱা আৱৰ্জনা সামগ্ৰী 'ষ্টীল স্লেগ ৰ ব্যৱহাৰৰ সমাধান বিচাৰি উলিওৱাৰ বাবেও গৱেষণা চলি আছে।

মহাকাশ খণ্ডৰ সাফল্যৰ কথা উল্লেখ কৰি প্ৰধানমন্ত্ৰীয়ে কয় যে এই বছৰ এটা ভাৰতীয় মহাকাশ ষ্টাৰ্টআপে থলুৱা ৰকেটৰ সহায়ত প্ৰথম প্ৰচেষ্টাত এটা উপগ্ৰহ কক্ষপথত স্থাপন কৰিছে। ভাৰতে উপগ্ৰহ ডক কৰাৰ ক্ষমতাও আহৰণ কৰিছে। তেওঁ কয় যে ভাৰতীয় ষ্টাৰ্টআপসমূহে মহাকাশ বিজ্ঞানৰ ক্ষেত্ৰত নতুন সমাধান আগবঢ়াই আছে আৰু যুৱ বিজ্ঞানী তথা উদ্যোগীসকলৰ অংশগ্ৰহণ বৃদ্ধি পাইছে।

প্ৰধানমন্ত্ৰীয়ে কয় যে ভাৰতে এই বছৰ এআই ইম্পেক্ট সন্মিলন আয়োজন কৰিছিল আৰু ইয়াৰ এআই আৰ্হিও উপস্থাপন কৰিছিল। স্বদেশীভাৱে নিৰ্মিত ছেমিকণ্ডাক্টৰ চিপৰ প্ৰথম বেচ বিদেশলৈ আহিবলৈ আৰম্ভ কৰিছে। তেওঁ কয় যে বেটাৰি সংৰক্ষণৰ ক্ষেত্ৰতো ভাৰতে দেশত উপলব্ধ খাৰুৱা তেলৰ ওপৰত ভিত্তি কৰি ইয়াৰ ক্ষমতা বিকাশৰ বাবে কাম কৰি আছে।

প্ৰধানমন্ত্ৰীগৰাকীয়ে কয় যে ভাৰত হৈছে বিশ্বৰ সৰ্ববৃহৎ যুৱ দেশ আৰু ইয়াত নতুন কিবা এটা কৰাৰ প্ৰতিভাৰ লগতে সংকল্পও আছে। দেশখনে এনে এটা প্ৰজন্মৰ সৃষ্টি কৰিব লাগিব যিয়ে কেৱল অংশগ্ৰহণ কৰাই নহয় বৰঞ্চ উদীয়মান বিজ্ঞান আৰু প্ৰযুক্তি খণ্ডতো নেতৃত্ব দিয়ে। তেওঁ যুৱপ্ৰজন্মক আত্মবিশ্বাসৰে আগবাঢ়ি যাবলৈ আহ্বান জনাই কয় যে তেওঁলোকৰ সংকল্প হ 'ব লাগে, আমি এইটো কৰিব পাৰোঁ

--------

হিন্দুস্থান সমাচাৰ / মনোজ কুমাৰ শইকীয়া