নতুন দিল্লী, ০২ অক্টোবৰ (হি.স.)। এছিয়ান গেমছৰ সামৰণি অনুষ্ঠানত ভাৰতৰ পতাকা বাহক হিচাপে নিৰ্বাচিত হৈছে ভাৰতীয় ট্ৰেপ শ্বুটাৰ নীৰু ধান্দা। অহা ৪ অক্টোবৰত মিজুহো পাৰ্ক এথলেটিক ষ্টেডিয়ামত অনুষ্ঠিত হ’ব সামৰণি অনুষ্ঠান।

এছিয়ান গেমছত নীৰুৱে ব্যতিক্ৰমীভাৱে ভাল প্ৰদৰ্শন কৰি দুটা স্বৰ্ণ আৰু এটা ৰূপৰ পদক লাভ কৰিছে। এই মহাদেশীয় প্ৰতিযোগিতাত ভাৰতৰ আগশাৰীৰ পদক বিজয়ীৰ ভিতৰত অন্যতম। মহিলাৰ ট্ৰেপ ব্যক্তিগত ইভেণ্টত স্বৰ্ণ পদক লাভ কৰি নীৰুৱে ইতিহাস ৰচনা কৰে, এছিয়ান গেমছত ব্যক্তিগত ট্ৰেপ শ্বুটিং ইভেণ্টত সোণৰ পদক লাভ কৰা প্ৰথমগৰাকী ভাৰতীয় মহিলা হিচাপে পৰিগণিত হয়। ইয়াৰ পিছতে আছিমা আহলাৱত আৰু মনীষা কীৰৰ সৈতে মহিলাৰ দলীয় ফান্দত ৰূপৰ পদক অৰ্জন কৰে। ইয়াৰ পিছতে নীৰুৱে কাইনান চেনাইৰ সৈতে মিলি মিক্সড টিম ট্ৰেপ ইভেণ্টত স্বৰ্ণ পদক লাভ কৰে।

নেশ্যনেল ৰাইফল এছ’চিয়েশ্যন অৱ ইণ্ডিয়াৰ সভাপতি কালিকেশ নাৰায়ণ সিং দেও পতাকাবাহী হিচাপে নিৰুৰ বাছনি সন্দৰ্ভত এক আনুষ্ঠানিক বিবৃতিত কয় যে, এছিয়ান গেমছৰ সামৰণি অনুষ্ঠানত ভাৰতীয় পতাকা কঢ়িয়াই অনাটো নিৰুৰ বাবে এক বৃহৎ সন্মান। এই গেমছত তেওঁ অতি গৌৰৱেৰে ভাৰতক প্ৰতিনিধিত্ব কৰিছে, আৰু এয়া তেওঁৰ ঐতিহাসিক প্ৰদৰ্শনৰ এক উপযুক্ত স্বীকৃতি। মহিলাৰ ফান্দত ভাৰতৰ প্ৰথমটো ব্যক্তিগত স্বৰ্ণ পদক লাভ কৰাৰ পৰা আৰম্ভ কৰি আৰু দুটা পদক লাভ কৰালৈকে নীৰুৱে দেশক উদযাপনৰ বহু কাৰণ দিছে। এতিয়া তেওঁক ৰাষ্ট্ৰীয় পতাকা লৈ ভাৰতীয় দলটোক নেতৃত্ব দিয়াটো শ্বুটিঙৰ বাবে আৰু সামগ্ৰিকভাৱে ভাৰতৰ বাবে এক অতি বিশেষ মুহূৰ্ত হ’ব।’

ভাৰতীয় নেশ্যনেল ৰাইফল এছ’চিয়েশ্যনৰ সচিব প্ৰধান পৱন কুমাৰ সিঙে কয় যে, এছিয়ান গেমছৰ সামৰণি অনুষ্ঠানত ৰাষ্ট্ৰীয় পতাকা কঢ়িয়াই অনাটো এগৰাকী ক্ৰীড়াবিদে লাভ কৰিব পৰা অন্যতম সৰ্বোচ্চ সন্মান। নিজৰ প্ৰদৰ্শন, স্থিৰতা আৰু জাপানত ভাৰতক প্ৰতিনিধিত্ব কৰা ধৰণেৰে নীৰুৱে এই সন্মান লাভ কৰিছে। এই গেমছত তেওঁৰ যাত্ৰা অসাধাৰণ আৰু আমি আনন্দিত যে তেওঁ সামৰণি অনুষ্ঠানত ত্ৰিৰংগ কঢ়িয়াই অনা ভাৰতীয় দলটোক নেতৃত্ব দিয়াৰ সুযোগ পাব।

পতাকাবাহী হিচাপে নিৰুৰ নিৰ্বাচনে তেওঁৰ তাৰকাময় এছিয়ান গেমছ অভিযানৰ আন এক মাইলৰ খুঁটি চিহ্নিত কৰিছে। তেওঁৰ ব্যক্তিগত স্বৰ্ণ পদক লাভ কৰি এছিয়ান গেমছত ট্ৰেপ শ্বুটিঙত ব্যক্তিগত স্বৰ্ণ পদকৰ বাবে ভাৰতৰ দীৰ্ঘদিনীয়া অপেক্ষাৰ অন্ত পৰিল। ইয়াৰ পিছত তেওঁ দল আৰু মিক্সড টিম ইভেণ্টত আৰু দুটা পদক লাভ কৰি এছিয়ান গেমছৰ পদকৰ সংখ্যা তিনিটালৈ বৃদ্ধি কৰে।

হিন্দুস্থান সমাচাৰ / মনোজ কুমাৰ শইকীয়া