নতুন দিল্লী, ১৯ অক্টোবৰ (হি.স.)। কেন্দ্ৰীয় কৃষি, কৃষক কল্যাণ আৰু গ্ৰামোন্নয়ন মন্ত্ৰী শিৱৰাজ সিং চৌহানে সোমবাৰে নৱীকৃত কৃষি কল্যাণ পৰ্টেল উন্মোচন কৰে। এই পৰ্টেলৰ লক্ষ্য হৈছে কৃষকসকলক চৰকাৰী আঁচনি, আৰ্থিক সাহায্য, খেতিৰ সৈতে জড়িত সঠিক তথ্য পোনপটীয়াকৈ মোবাইল ফোনত প্ৰদান কৰা। ইয়াৰ ফলত কৃষকসকলে বিভিন্ন কাৰ্যালয় আৰু ৱেবছাইটত গৈ তথ্য আহৰণ কৰাৰ লগতে বিভিন্ন আঁচনিৰ বাবে আবেদন কৰাৰ প্ৰয়োজনীয়তা নাইকিয়া হ’ব।
উন্মোচনী অনুষ্ঠানত ভাষণ দি চৌহানে কয় যে প্ৰধানমন্ত্ৰী নৰেন্দ্ৰ মোদীৰ স্পষ্ট দৃষ্টিভংগী আছে যে চৰকাৰখন সকলো সময়তে মোবাইল ফোনত নাগৰিক আৰু কৃষক উভয়ৰে বাবে সুলভ হ’ব লাগে। প্ৰযুক্তি সাৰ্থক হয় তেতিয়াহে যেতিয়া ইয়াৰ সুফল পোনপটীয়াকৈ পথাৰলৈ যায় আৰু কৃষকৰ জীৱন সহজ কৰি তোলে।
তেওঁ কয় যে এই পৰ্টেল কেৱল কৃষকসকলৰ মাজতে সীমাবদ্ধ নাথাকিব, বৰঞ্চ কৃষক উৎপাদক সংস্থা (এফ পি অ’), প্ৰাথমিক কৃষি ঋণ সমিতি (পি এ চি এছ), কৃষি বিজ্ঞানী, গৱেষক, আৰু ষ্টাৰ্টআপকো একক মঞ্চত সংযোগ কৰিব।
তেওঁ বিষয়াসকলক কয় যে পৰ্টেলটোৰ সফলতা সঠিক আৰু সময়োপযোগী তথ্যৰ দ্বাৰা নিৰ্ধাৰিত হ’ব। পুৰণি বা অসম্পূৰ্ণ তথ্যই চিস্টেমৰ ওপৰত বিশ্বাসক ক্ষতিগ্ৰস্ত কৰে, গতিকে পৰ্টেলৰ সকলো তথ্য অবিৰতভাৱে আপডেইট কৰাটো অতি গুৰুত্বপূৰ্ণ। ইয়াৰ উপৰিও ভাষা আৰু প্ৰক্ৰিয়াটো যথেষ্ট সহজ কৰি ৰাখিব লাগে যাতে কম শিক্ষিত ক্ষুদ্ৰ আৰু প্ৰান্তীয় কৃষকসকলেও ইয়াক সহজে বুজিব পাৰে আৰু পৰিচালনা কৰিব পাৰে। কৃষকসকলক পৰ্টেল আৰু ডিজিটেল সঁজুলিৰে সজ্জিত কৰাৰ বাবে সমগ্ৰ দেশৰ সকলো কৃষি বিজ্ঞান কেন্দ্ৰৰ জৰিয়তে এক বিশেষ প্ৰশিক্ষণ অভিযান চলোৱা হ’ব।
এই গুৰুত্বপূৰ্ণ পদক্ষেপ সময়মতে সম্পূৰ্ণ কৰাৰ বাবে কেন্দ্ৰীয় মন্ত্ৰী শিৱৰাজ সিং চৌহানে সমগ্ৰ কাৰিকৰী দলটোক প্ৰশংসা কৰে। ইলেক্ট্ৰনিক্স আৰু তথ্য প্ৰযুক্তি মন্ত্ৰালয়ৰ ডিবিআইএম ৩.০ আৰু জিআইজিডব্লিউ ৩.০ মানদণ্ড অনুসৰি প্ৰস্তুত কৰা এই নতুন পৰ্টেলটো অতি সুৰক্ষিত, মোবাইল-বন্ধুত্বপূৰ্ণ আৰু বিশেষভাৱে সক্ষম লোকসকলৰ বাবে সম্পূৰ্ণৰূপে সুলভ। এই প্লেটফৰ্মে পিএম-কিছান, এগ্ৰিষ্টেক, আৰু পিএম ফাছাল বীমা যোজনাৰ দৰে ডাঙৰ পদক্ষেপৰ বাবে এক উমৈহতীয়া গেটৱে হিচাপে কাম কৰিব।
এই উপলক্ষে কেন্দ্ৰীয় কৃষি আৰু কৃষক কল্যাণ সম্পাদক আতিশ চন্দ্ৰ আৰু অতিৰিক্ত সম্পাদক প্ৰমোদ মেহেৰদাৰ লগতে ডিজিটেল কৃষি সংমণ্ডল, মন্ত্ৰালয় আৰু এন আই চিৰ উচ্চপদস্থ বিষয়াসকল উপস্থিত থাকে।
এই পৰ্টেলে কৃষকসকলক তথ্যৰ বাবে একক, ঐক্যবদ্ধ মঞ্চ প্ৰদান কৰিব। উদাহৰণস্বৰূপে, মন্ত্ৰালয়ৰ সকলো আঁচনি, ৰাজসাহায্য, নিয়ম, আৰু ডিজিটেল সেৱা এতিয়া এটা পৰ্টেলত উপলব্ধ, যাৰ ফলত সময় আৰু হেঁচা বহু পৰিমাণে হ্ৰাস পাইছে। অনলাইন যোগ্যতা পৰীক্ষা, প্ৰত্যক্ষ আবেদন, আৰু একাউণ্টলৈ সাহায্যৰ ধন বিতৰণে স্বচ্ছতা নিশ্চিত কৰে আৰু মধ্যভোগীৰ ভূমিকা নাইকিয়া কৰে। গ্ৰাম্য অঞ্চলৰ কথা মনত ৰাখি ইয়াক লঘু আৰু ব্যৱহাৰকাৰী অনুকূল, সাধাৰণ স্মাৰ্টফোন আৰু দুৰ্বল নেটৱৰ্কতো সহজে উপলব্ধ হোৱাকৈ ডিজাইন কৰা হৈছে।
ইয়াৰ উপৰিও সময়োপযোগী, সঠিক বতৰৰ তথ্যও প্ৰদান কৰিব। বতৰৰ পৰিস্থিতি, নতুন বৈজ্ঞানিক খেতি পদ্ধতি, বীজ আৰু সাৰ উপলব্ধতা, বজাৰৰ মূল্যৰ প্ৰামাণিক তথ্য পোনপটীয়াকৈ কৃষকৰ ওচৰলৈ যাব। ইয়াৰ উপৰিও প্ৰতিবন্ধীসকলৰ বাবেও ইয়াত প্ৰৱেশযোগ্য হ’ব। আধুনিক চৰকাৰী মানদণ্ড অনুসৰি ইয়াক এনেদৰে ডিজাইন কৰা হৈছে যাতে দৃষ্টিহীন আৰু অক্ষম ভাই-ভনীসকলেও স্ক্ৰীণ-ৰিডাৰ আৰু সহজ নেভিগেচনৰ জৰিয়তে ইয়াৰ দ্বাৰা উপকৃত হ’ব পাৰে।
হিন্দুস্থান সমাচাৰ / মনোজ কুমাৰ শইকীয়া
