নতুন দিল্লী, ০৯ জানুৱাৰী (হি.স.)। ক’ল ইণ্ডিয়াৰ সহযোগী প্ৰতিষ্ঠান ভাৰত ককিং ক’ল লিমিটেডৰ ১,০৭১.১১ কোটি টকাৰ আই পি অ’ আজি চাবস্ক্ৰিপচনৰ বাবে মুকলি কৰা হয়। ১৩ জানুৱাৰীলৈকে নিবিদা দিব পাৰিব। ইছ্যু বন্ধ হোৱাৰ পিছত ১৪ জানুৱাৰীত শ্বেয়াৰ আবণ্টন কৰা হ’ব, ১৫ নৱেম্বৰত আবণ্টিত শ্বেয়াৰ ডিমেট একাউণ্টত জমা কৰা হ’ব। ১৬ জানুৱাৰীত কোম্পানীটোৰ শ্বেয়াৰ বিএছই আৰু এনএছইত তালিকাভুক্ত হোৱাৰ সম্ভাৱনা আছে। এই আই পি অ’ ২০২৬ চনৰ প্ৰথম মেইনবৰ্ড ছেগমেণ্টৰ আই পি অ’। দুপৰীয়া ১:৩০ বজালৈকে কোম্পানীটোৰ আই পি অ’ ৫.৪২ বাৰ চাবস্ক্ৰাইব কৰা হৈছিল।
এই আই পি অ’ত নিবিদাৰ বাবে মূল্যৰ বেণ্ড ২১ টকাৰ পৰা ২৩ টকা প্ৰতি শ্বেয়াৰত নিৰ্ধাৰণ কৰা হৈছে, আনহাতে লটৰ আকাৰ ৬০০ টা শ্বেয়াৰ। খুচুৰা বিনিয়োগকাৰীয়ে নূন্যতম ১টা লট অৰ্থাৎ ৬০০ টা শ্বেয়াৰৰ বাবে নিবিদা দিব পাৰিব, যাৰ বাবে তেওঁলোকে ১৩,৮০০ টকা বিনিয়োগ কৰিব লাগিব। একেদৰে খুচুৰা বিনিয়োগকাৰীয়ে সৰ্বাধিক ১৪টা লট অৰ্থাৎ ৮,৪০০ টা শ্বেয়াৰৰ বাবে নিবিদা দিব পাৰিব, যাৰ বাবে তেওঁলোকে ১,৯৩,২০০ টকা বিনিয়োগ কৰিব লাগিব। এই আই পি অ’ৰ অধীনত অফাৰ ফৰ চেল উইণ্ড’ৰ জৰিয়তে ১০ টকাৰ মুদ্ৰা মূল্যৰ মুঠ ৪৬.৫৭ কোটি শ্বেয়াৰ বিক্ৰী কৰা হৈছে।
আই পি অ’ মুকলি হোৱাৰ এদিন পূৰ্বে ৮ জানুৱাৰী বৃহস্পতিবাৰে বি চি চি এলে এংকৰ বিনিয়োগকাৰীৰ পৰা ২৭৩.১৩ কোটি টকা সংগ্ৰহ কৰে। এংকৰ বুকত সৰ্বাধিক বিনিয়োগকাৰী আছিল দেশৰ সৰ্ববৃহৎ জীৱন বীমা কোম্পানী ভাৰতীয় জীৱন বীমা নিগম (এল আই চি)। এল আই চিয়ে ₹৭৮ কোটি বিনিয়োগেৰে বি চি চি এলৰ ৩৩.৯ মিলিয়ন শ্বেয়াৰ অধিগ্ৰহণ কৰে। নিপ্পন লাইফ ইণ্ডিয়া মিউচুৱেল ফাণ্ডে ৩ কোটি ২৬ লাখ শ্বেয়াৰ লাভ কৰিবলৈ ৭৫ কোটি টকা বিনিয়োগ কৰাৰ বিপৰীতে বন্ধন মিউচুৱেল ফাণ্ডে ৩ কোটি ২৬ লাখ শ্বেয়াৰ লাভ কৰিবলৈ ৭৫ কোটি টকা বিনিয়োগ কৰে। এই তিনিজন এংকৰ বিনিয়োগকাৰীৰ উপৰিও ইউটিআই মিউচুৱেল ফাণ্ড, ছ’চাইটি জেনেৰেল, চিট্ৰিন ফাণ্ড, ৰাজস্থান গ্ল’বেল ছিকিউৰিটিজ, এম-৭ গ্ল’বেল ফাণ্ড, কপথাল মৰিচাছ ইনভেষ্টমেণ্ট, আৰু মেবেংক ছিকিউৰিটিজৰ দৰে বিশিষ্ট নামেও এংকৰ বুকত অংশগ্ৰহণ কৰিছে।
এই আই পি অ’ত ইছ্যু মূল্যৰ ৪২.৫০ শতাংশ এংকৰ বিনিয়োগকাৰীকে ধৰি অৰ্হতাসম্পন্ন প্ৰতিষ্ঠানিক ক্ৰেতা (কিউ আই বি)ৰ বাবে সংৰক্ষিত কৰা হৈছে। তদুপৰি ২৯.৭৫ শতাংশ খুচুৰা বিনিয়োগকাৰীৰ বাবে, ১২.৭৫ শতাংশ অপ্ৰতিষ্ঠানিক বিনিয়োগকাৰীৰ বাবে (এন আই আই), ৫ শতাংশ কৰ্মচাৰীৰ বাবে আৰু ১০ শতাংশ বৰ্তমানৰ শ্বেয়াৰহোল্ডাৰৰ বাবে সংৰক্ষিত। এই বিষয়টোৰ বাবে আইডিবিআই কেপিটেল মাৰ্কেটছ চাৰ্ভিচেছ লিমিটেডক বুক ৰানিং লিড মেনেজাৰ হিচাপে নিযুক্তি দিয়াৰ বিপৰীতে কেফিন টেকন’লজিছ লিমিটেডক পঞ্জীয়ক হিচাপে নিযুক্তি দিয়া হৈছে।
কোম্পানীটোৰ বিত্তীয় অৱস্থাৰ সন্দৰ্ভত, মূলধনী বজাৰ নিয়ন্ত্ৰক ছেবিত দাখিল কৰা খচৰা ৰেড হেৰিং প্ৰস্পেক্টচ (ডি আৰ এইচ পি)ত দাবী কৰা অনুসৰি, কোম্পানীটোৰ বিত্তীয় দিশটো উঠা-নমা হৈ আহিছে। ২০২২-২৩ বিত্তীয় বৰ্ষত কোম্পানীটোৰ নিকা লাভৰ পৰিমাণ আছিল ৬৬৪.৭৮ কোটি টকা, যিটো পৰৱৰ্তী বিত্তীয় বৰ্ষত ২০২৩-২৪ চনত ১,৫৬৪.৪৬ কোটি টকালৈ বৃদ্ধি পাইছিল। ২০২৪-২৫ বিত্তীয় বৰ্ষত লাভ হ্ৰাস পাই এই বছৰ ₹১,২৪০.১৯ কোটি নিকা লাভ হৈছে। চলিত বিত্তীয় বৰ্ষৰ প্ৰথমাৰ্ধত অৰ্থাৎ ২০২৫ চনৰ এপ্ৰিলৰ পৰা ৩০ ছেপ্টেম্বৰলৈকে কোম্পানীটোৱে ইতিমধ্যে ১২৩.৮৮ কোটি টকাৰ নিকা লাভ লাভ কৰিছে।
এই সময়ছোৱাত কোম্পানীটোৰ ৰাজহৰো সামান্য উঠা-নমা হয়। ২০২২-২৩ বিত্তীয় বৰ্ষত ই মুঠ ১৩,০১৮.৫৭ কোটি টকাৰ ৰাজহ লাভ কৰে, যিটো ২০২৩-২৪ বিত্তীয় বৰ্ষত ১৪,৬৫২.৫৩ কোটি টকালৈ বৃদ্ধি পায় আৰু ২০২৪-২৫ বিত্তীয় বৰ্ষত সামান্য হ্ৰাস পাই ১৪,৪০১.৬৩ কোটি টকা হয়। চলিত বিত্তীয় বৰ্ষৰ প্ৰথমাৰ্ধত অৰ্থাৎ ২০২৫ চনৰ এপ্ৰিলৰ পৰা ৩০ ছেপ্টেম্বৰলৈকে কোম্পানীটোৱে ৬,৩১১.৫১ কোটি ₹ ৰাজহ লাভ কৰিছে। এই সময়ছোৱাত কোম্পানীটোৰ মজুত আৰু উদ্বৃত্তও বৃদ্ধি পায়। ২০২৩-২৪ বিত্তীয় বৰ্ষত ই ৬৬৪.৭২ কোটি টকাত আছিল, যিটো ২০২৪-২৫ চনত ১,৮০৫.৭৩ কোটি টকালৈ বৃদ্ধি পাইছিল। চলিত বিত্তীয় বৰ্ষৰ প্ৰথমাৰ্ধত অৰ্থাৎ ২০২৫ চনৰ এপ্ৰিলৰ পৰা ৩০ ছেপ্টেম্বৰলৈকে ই আছিল ১,০০৬.৫২ কোটি ₹। কোম্পানীটোৰ ঋণৰ বোজাৰ সন্দৰ্ভত ২০২৫ চনৰ ৩০ ছেপ্টেম্বৰলৈকে ইয়াৰ ঋণ আছিল ১,৫৫৯.১৩ কোটি ₹।
২০২২-২৩ চনত সুত, কৰ, মূল্য হ্ৰাস আৰু ক্ষয়সাধনৰ পূৰ্বে আয় (ইবিআইটিডিএ) আছিল ৮৯১.৩১ কোটি ₹, যিটো ২০২৩-২৪ চনত ২,৪৯৩.৮৯ কোটি ₹লৈ বৃদ্ধি পাইছে। একেদৰে ২০২৪-২৫ চনত কোম্পানীটোৰ ইবিআইটিডিএ ২,৩৫৬.০৬ কোটি ₹ হয়। চলিত বিত্তীয় বৰ্ষৰ প্ৰথমাৰ্ধ ২০২৫ চনৰ ৩০ ছেপ্টেম্বৰলৈকে ইয়াৰ মূল্য আছিল ৪৫৯.৯৩ কোটি টকা।
हिन्दुस्थान समाचार / অৰৱিন্দ
