কাঠমাণ্ডু, ০৮ জানুৱাৰী (হি.স.)। অৱশেষত পেট্ৰ’লৰ সৈতে ইথানল মিহলি কৰাৰ প্ৰক্ৰিয়াটো আগুৱাই লৈ গৈছে নেপাল চৰকাৰ। প্ৰায় দুটা দশক ধৰি নীতিগত আলোচনা চলি থকাৰ পিছতো এই প্ৰক্ৰিয়াটো কাৰ্যকৰী হোৱা নাছিল। বুধবাৰৰ কেবিনেট বৈঠকত ইথানল ব্লেণ্ডিং অৰ্ডাৰ ২০৮২ (পেট্ৰ’ল ব্লেণ্ডিং অৰ্ডাৰ)ত অনুমোদন জনোৱা হয়, যাৰ ফলত ব্যৱহাৰিক ৰূপায়ণৰ পথ মুকলি হয়।

নেপাল তেল নিগমৰ কাৰ্যবাহী সঞ্চালক ড০ চণ্ডিকা প্ৰসাদ ভাটৰ মতে এই অনুমোদন দুটা দশক ধৰি বাকী আছিল। বৰ্তমান গেজেটত প্ৰকাশিত এই আদেশ জাৰি কৰাৰ ফলত ইয়াৰ কাৰ্যকৰীকৰণৰ বাবে এক শক্তিশালী ভেটি স্থাপন কৰা হৈছে। নিগমটোৱে এই সিদ্ধান্তত উপনীত হৈছে যে জৈৱ ইন্ধন (ইথানল) আৰু খনিজ ইন্ধন (পেট্ৰ’ল) মিহলাই দেশৰ অৰ্থনীতি, পৰিৱেশ, আৰু থলুৱা উদ্যোগৰ বাবে বহুমুখী সুবিধা লাভ কৰিব। কাৰ্যবাহী সঞ্চালক ভাটে ইথানলক “জৈৱ ইন্ধন” আৰু পেট্ৰ’লক “খনিজ ইন্ধন” বুলি অভিহিত কৰি কয় যে এই মিশ্ৰণে পৰিৱেশৰ ওপৰত ইতিবাচক প্ৰভাৱ পেলাব।

এই পৰিকল্পনাক পৰিৱেশ সুৰক্ষা আৰু আন্তঃৰাষ্ট্ৰীয় মঞ্চত ২০৪৫ চনৰ ভিতৰত নিকা শূন্য কাৰ্বন নিৰ্গমন লাভৰ বাবে নেপালৰ দায়বদ্ধতাক অত্যন্ত সহায়ক বুলি প্ৰশংসা কৰা হৈছে।

অৰ্থনৈতিক দৃষ্টিকোণৰ পৰা এই পৰিকল্পনাই নেপালৰ বাণিজ্যিক ঘাটি হ্ৰাস কৰাত সহায় কৰিব। বৰ্তমান নেপালৰ ১০০% পেট্ৰল ভাৰতৰ পৰা আমদানি কৰা হয়। নিগমৰ পৰিকল্পনা অনুসৰি পেট্ৰ’লত ১০% ইথানল যোগ কৰিলে প্ৰত্যক্ষভাৱে পেট্ৰ’লৰ আমদানি ১০% হ্ৰাস পাব। ড০ ভট্টই কয় যে ইয়াৰ ফলত পেট্ৰ’ল ক্ৰয়ৰ বাবে বিদেশত ব্যয় কৰা যথেষ্ট পৰিমাণৰ ধন ৰাহি হ’ব আৰু বৈদেশিক মুদ্ৰাৰ মজুত উন্নত হ’ব।

তেওঁ লগতে কয়, ইথানল উদ্যোগ স্থাপন কৰিবলৈ প্ৰায় দুই বিলিয়ন টকাৰ বিনিয়োগৰ প্ৰয়োজন হ'ব। এটা উদ্যোগে ৩০০ৰ পৰা ৫০০ লোকক প্ৰত্যক্ষভাৱে কৰ্মসংস্থাপন প্ৰদান কৰিব পাৰে, যিয়ে চাকৰি সৃষ্টিত যথেষ্ট অৰিহণা যোগাব।

हिन्दुस्थान समाचार / মনোজ কুমাৰ শইকীয়া