- কৰ্মশালাৰ দ্বিতীয় দিনা সোমবাৰে উপ-ৰাষ্ট্ৰপতি নিৰ্বাচনত ভোটদানৰ ওপৰত প্ৰশিক্ষণ
নতুন দিল্লী, ০৭ ছেপ্টেম্বৰ (হি.স.)। উপ-ৰাষ্ট্ৰপতি নিৰ্বাচনৰ পূৰ্বে দেওবাৰে ভাৰতীয় জনতা পাৰ্টি (বিজেপি)ৰ সাংসদসকলৰ বাবে দুদিনীয়া সাংসদ কৰ্মশালা আৰম্ভ হয়। সংসদ চৌহদত আয়োজিত এই কৰ্মশালাত প্ৰধানমন্ত্ৰী নৰেন্দ্ৰ মোদীয়েও অংশ লৈছিল আৰু তেওঁক দলীয় কৰ্মীৰ সৈতে পিছৰ আসনত বহি থকা দেখা গৈছিল।
দেওবাৰে প্ৰধানমন্ত্ৰীয়ে কৰ্মশালাৰ ছবি টুইট কৰি কয় যে তেওঁ ‘দিল্লীত সাংসদ কৰ্মশালা’ত অংশগ্ৰহণ কৰিছিল। সমগ্ৰ ভাৰতৰ সাংসদ সহকৰ্মী আৰু অন্যান্য জ্যেষ্ঠ নেতাসকলে বিভিন্ন বিষয়ত মূল্যৱান মত বিনিময় কৰে।
সূত্ৰ অনুসৰি কৰ্মশালাৰ প্ৰথম দিনাই উপ-ৰাষ্ট্ৰপতি নিৰ্বাচনৰ প্ৰস্তুতিৰ বিষয়ে আলোচনা কৰা হয়। জি এছ টি সংস্কাৰৰ বাবে প্ৰধানমন্ত্ৰী মোডীক অভিনন্দন জনালে সাংসদসকলে। কৰ্মশালাৰ দ্বিতীয় দিনা অৰ্থাৎ সোমবাৰে উপ-ৰাষ্ট্ৰপতি নিৰ্বাচনত ভোটদানৰ ওপৰত প্ৰশিক্ষণ দিয়া হ’ব। প্ৰশিক্ষণ অধিবেশনত সাংসদসকলক বেলট কাগজত শুদ্ধকৈ চিহ্নিত কৰা, নিৰ্বাচনী বিষয়াই প্ৰদান কৰা কলম ব্যৱহাৰ কৰি বেলট কাগজখন শুদ্ধকৈ ভাঁজ কৰি বাকচৰ ভিতৰত থোৱাৰ বিষয়ে অৱগত কৰা হ’ব যাতে ভোট অবৈধ নহয়। এন ডি এৰ সমগ্ৰ কেন্দ্ৰবিন্দু ক্ৰছ ভোটিং বন্ধ কৰা আৰু অবৈধ ভোট হ্ৰাস কৰা।
সাংসদ ৰবি কিষাণ আৰু ড° মেধা কুলকাৰ্ণীয়ে এক্সত প্ৰধানমন্ত্ৰী নৰেন্দ্ৰ মোডীৰ ছবি শ্বেয়াৰ কৰে। ডাঃ কুলকাৰ্ণীয়ে তেওঁৰ বাৰ্তাত কয় যে আজি দিল্লীত ভাৰতীয় জনতা পাৰ্টিৰ সাংসদসকলৰ কৰ্মশালাৰ সময়ত প্ৰধানমন্ত্ৰী নৰেন্দ্ৰ মোদীয়ে এজন সাধাৰণ সাংসদৰ দৰে পিছফালে বহিল। নাছিল কোনো ভেম, কোনো পদৰ গৌৰৱ আৰু নাছিল কোনো বিশেষাধিকাৰ। এয়া সাধাৰণ মুহূৰ্ত নহয় বৰঞ্চ এক শক্তিশালী বাৰ্তা, যিটো আমাৰ প্ৰধান সেৱক নৰেন্দ্ৰ মোদীয়ে আজি আমাৰ সকলোকে দিছে।
উল্লেখযোগ্য যে অহা ৯ ছেপ্টেম্বৰত উপ-ৰাষ্ট্ৰপতি নিৰ্বাচন আৰু সেইদিনা ভোটগণনাও হ’ব। এন ডি এয়ে মহাৰাষ্ট্ৰৰ ৰাজ্যপাল চি পি ৰাধাকৃষ্ণনক উপ-ৰাষ্ট্ৰপতি পদৰ প্ৰাৰ্থী হিচাপে গঢ়ি তুলিছে। তেওঁ ভাৰত মিত্ৰজোঁটৰ প্ৰাৰ্থী তথা অৱসৰপ্ৰাপ্ত উচ্চতম ন্যায়ালয়ৰ ন্যায়াধীশ বি সুদৰ্শন ৰেড্ডীৰ বিৰুদ্ধে মুখামুখি হ’ব।
हिन्दुस्थान समाचार / অৰৱিন্দ
