নতুন দিল্লী, ০৪ ছেপ্টেম্বৰ (হি স)। কেন্দ্ৰীয় পথ পৰিবহণ আৰু ঘাইপথ মন্ত্ৰী নীতিন গাডকাৰীয়ে পথ সুৰক্ষাক দেশৰ অগ্ৰাধিকাৰ আখ্যা দি বৃহস্পতিবাৰে কয় যে দেশত প্ৰতি বছৰে গড়ে ৪.৮০ৰ পৰা ৫ লাখ পথ দুৰ্ঘটনা সংঘটিত হয়, য’ত প্ৰায় ১.৮০ লাখ লোকৰ মৃত্যু হয়। এই দুৰ্ঘটনাবোৰৰ ফলত জিডিপিৰ ৩ শতাংশ লোকচান হয়, যিটো যিকোনো ৰোগ বা যুদ্ধতকৈ বেছি।

এফচিচিআইৰ ৭ম পথ সুৰক্ষা বঁটা আৰু চিম্পোজিয়াম ২০২৫ - ‘ভিজন জিৰ’: লাইফ ফাৰ্ষ্ট, অলৱেজ’ কাৰ্যসূচীত গাডকাৰীয়ে কয় যে বছৰি সংঘটিত হোৱা সকলো দুৰ্ঘটনাৰ ৬৬.৪ শতাংশই ১৮ৰ পৰা ৪৫ বছৰৰ ভিতৰৰ যুৱক-যুৱতীসকলৰ, যিটো দেশৰ ভৱিষ্যতৰ বাবে এক গুৰুতৰ চিন্তাৰ বিষয়। তেওঁ কয় যে প্ৰতি বছৰে ১৮ বছৰৰ তলৰ ১০ হাজাৰ শিশুৰ পথ দুৰ্ঘটনাত মৃত্যু হয়, যিটো চিন্তাৰ বিষয়। হেলমেট পৰিধান নকৰাৰ ফলত প্ৰায় ৩০ হাজাৰ লোকৰ মৃত্যু হয় আৰু ছিটবেল্ট পৰিধান নকৰাৰ ফলত প্ৰতি বছৰে ১৬ হাজাৰ লোকৰ মৃত্যু হয়। এই সংখ্যা হ্ৰাস কৰিবলৈ চৰকাৰে নতুন বাইক ক্ৰয় কৰা সকলক দুটা হেলমেট দিয়াটো বাধ্যতামূলক কৰিছে। লগতে অমিতাভ বচ্চনৰ সৈতে বাৰ্ষিক কাৰ্যসূচীৰ আয়োজন কৰি সজাগতা বিয়পাই দিয়া হৈছে।

তেওঁ কয় যে পথ সুৰক্ষাৰ প্ৰসাৰৰ বাবে শংকৰ মহাদেৱনৰ এটি গীত ২২টা ভাষালৈ অনুবাদ কৰি স্কুলীয়া ছাত্ৰ-ছাত্ৰীলৈ প্ৰেৰণ কৰা হৈছে। ইয়াৰ বাবে বৃহৎ পৰিসৰৰ ডিজিটেল অভিযানো আৰম্ভ কৰা হৈছে। বাহনৰ সুৰক্ষা শক্তিশালী কৰাৰ বাবে অটোমোবাইল ইঞ্জিনিয়াৰিঙৰ উন্নতিৰ কথাও তেওঁ উল্লেখ কৰে।

তেওঁ কয় যে অটোমোবাইল উদ্যোগৰ এই পৰিৱৰ্তনে নিখুঁততা আনিছে, যাৰ ফলত বাহন দুৰ্ঘটনা হ্ৰাস পাব বুলি আশা কৰা হৈছে। ১৬-১৮ ঘণ্টা ধৰি অবিৰতভাৱে গাড়ী চলোৱা ট্ৰাক চালকৰ সুৰক্ষাৰ কথা মনত ৰাখি তেওঁলোকৰ কেবিনত এচি বাধ্যতামূলক কৰা হৈছে। গৰম আৰু ক্লান্তিৰ ফলত হোৱা অসুস্থতা হ্ৰাস কৰিবলৈ ক্লান্তি আৰু টোপনি ধৰা পেলোৱা ব্যৱস্থাৰ কামো চলি আছে।

বাছৰ সুৰক্ষা সন্দৰ্ভত তেওঁ কয় যে আগতে বাছৰ বডি ক’ডত ত্ৰুটি আছিল, যিবোৰ উন্নত হ’বলৈ সময় লাগিছিল। এতিয়া বিশ্বমানৰ বাছৰ বডি ক’ড বাধ্যতামূলক কৰা হৈছে, যাতে যাত্ৰীসকলৰ সুৰক্ষা নিশ্চিত হয়। ৰাষ্ট্ৰীয় ঘাইপথৰ প্ৰতিটো দুৰ্ঘটনাৰ কাৰণ বিশ্লেষণ কৰি উন্নতিৰ প্ৰচেষ্টা চলোৱা হৈছে। দুৰ্ঘটনাগ্ৰস্ত লোকসকলক লগে লগে চিকিৎসালয়লৈ লৈ যোৱাসকলক উৎসাহিত কৰিবলৈ ২৫ হাজাৰ টকাৰ পুৰস্কাৰ দিয়া হৈছে আৰু প্ৰতিটো দুৰ্ঘটনাতে নূন্যতম ১.৫ লাখ টকা বা ৭ দিনৰ চিকিৎসালয়ৰ খৰচ বীমাত অন্তৰ্ভুক্ত কৰাৰ সিদ্ধান্ত লোৱা হৈছে।

গডকাৰীয়ে কয় যে সৰ্বাধিক পথ দুৰ্ঘটনা ক্ৰমে উত্তৰ প্ৰদেশ, তামিলনাডু, মহাৰাষ্ট্ৰ, মধ্যপ্ৰদেশ আৰু কৰ্ণাটকত সংঘটিত হয়। আমি সকলো উন্নতি কৰিছো, কিন্তু মানুহৰ আচৰণ সলনি কৰাত আমি সফল হোৱা নাই। বছৰি ৩০ হাজাৰ দুৰ্ঘটনা সংঘটিত হয় কেৱল এই দুৰ্ঘটনাবোৰৰ লগত জড়িত লোকসকলৰ ড্ৰাইভিং লাইচেন্স নথকাৰ বাবে।

মহাৰাষ্ট্ৰত তেওঁৰ পূৰ্বৰ এটা পথ দুৰ্ঘটনাৰ কথা মনত পেলাই গাডকাৰীয়ে কয় যে তেওঁৰ দুৰ্ঘটনাৰ তদন্তৰ সময়ত তেওঁৰ চালকজনৰ চকুৰ ছানি পৰা দেখা গৈছিল, যিটো দুৰ্ঘটনাৰ পিছত ধৰা পৰিছিল। ইয়াৰ পিছত পৰিবহণ মন্ত্ৰী হোৱাৰ সময়ত দেশজোৰা চালকৰ পৰীক্ষাত দেখা গ’ল যে দেশৰ ৪০ শতাংশ চালকৰ চকুৰ ছানি পৰা ৰোগ হৈছে, য’ত এজন মুখ্যমন্ত্ৰীৰ চালকৰ দুয়োটা চকু অন্ধ আছিল আৰু এজন কেন্দ্ৰীয় মন্ত্ৰীৰ চালকৰ এটা চকু অন্ধ আছিল। এই সমস্যাৰ সৈতে মোকাবিলা কৰিবলৈ চালকৰ চকু পৰীক্ষাক অগ্ৰাধিকাৰ দিয়া হৈছে।

চালক প্ৰশিক্ষণৰ ওপৰত গুৰুত্ব আৰোপ কৰি গাডকাৰীয়ে কয় যে দেশত ১১১ টা চালক প্ৰশিক্ষণ কেন্দ্ৰৰ অনুমোদন লাভ কৰা হৈছে, ইয়াৰে ৩৫ টা চালক প্ৰশিক্ষণ কেন্দ্ৰ আৰম্ভ কৰা হৈছে। এই পৰ্যন্ত ৯.২ লাখ চালকক প্ৰশিক্ষণ দিয়া হৈছে। তেওঁ জোৰ দি কয় যে প্ৰশিক্ষিত চালক অবিহনে পথ দুৰ্ঘটনা ৰোধ কৰাটো সম্ভৱ নহয়। পথ সুৰক্ষা শক্তিশালী কৰাৰ লগতে দেশৰ যুৱক-যুৱতীসকলৰ জীৱন ৰক্ষাৰ দিশত এই পদক্ষেপসমূহ গুৰুত্বপূৰ্ণ।

-

हिन्दुस्थान समाचार / অৰৱিন্দ