পাটনা, ০২ ছেপ্টেম্বৰ (হি.স.)। প্ৰধানমন্ত্ৰী নৰেন্দ্ৰ মোদীয়ে মঙলবাৰে দিল্লীৰ পৰা ভিডিঅ’ কনফাৰেন্সিঙৰ জৰিয়তে বিহাৰ ৰাজ্যিক জীৱিকা নিধি শাখা সমবায় সংঘ লিমিটেড বেংক উদ্বোধন কৰে। এই উপলক্ষে তেওঁ জীৱিকা নিধিলৈ ১০৫ কোটি টকাৰ ধন হস্তান্তৰ কৰে। বিহাৰৰ মুখ্যমন্ত্ৰী নীতিশ কুমাৰেও এই কাৰ্যসূচীত যোগদান কৰে।
বিহাৰৰ গ্ৰাম্য জীৱিকা কাৰ্যসূচী ‘জীৱিকা’ৰ সৈতে জড়িত মহিলাসকলক সৰল আৰু সুলভ বিত্তীয় সেৱা প্ৰদানৰ বাবে এই নতুন সমবায় প্ৰতিষ্ঠানটো সৃষ্টি কৰা হৈছে। সকলো পঞ্জীয়নভুক্ত ক্লাষ্টাৰ পৰ্যায়ৰ ইউনিয়ন এই প্ৰতিষ্ঠানৰ সদস্য হ’ব। ইয়াৰ কাৰ্য্যকলাপ সম্পূৰ্ণ ডিজিটেল হ’ব, যাৰ ফলত লেনদেনত স্বচ্ছতা আৰু দ্ৰুততা নিশ্চিত হ’ব। এই পদক্ষেপ কেন্দ্ৰ আৰু বিহাৰ চৰকাৰে যৌথভাৱে পুঁজিৰে আগবঢ়াইছে।
উদ্বোধনী ভাষণত প্ৰধানমন্ত্ৰী নৰেন্দ্ৰ মোদীয়ে কয় যে আমাৰ চৰকাৰে বিহাৰৰ মাতৃ, ভগ্নী আৰু কন্যাক সকলো ধৰণৰ সুযোগ প্ৰদানৰ বাবে কোনো প্ৰচেষ্টা বাদ দিয়া নাই। জীৱিকা নিধি সমবায় সংঘ বিহাৰৰ গ্ৰাম্য মহিলাসকলক সবলীকৰণৰ দিশত এক ঐতিহাসিক পদক্ষেপ। এই পদক্ষেপে বিত্তীয় অন্তৰ্ভুক্তিক প্ৰসাৰিত কৰিব আৰু সম্প্ৰদায়ৰ নেতৃত্বত উদ্যোগীকৰণক উৎসাহিত কৰিব।
কৃতজ্ঞতা জ্ঞাপন কৰিলে নীতিশ কুমাৰে
এই উপলক্ষে বিহাৰৰ মুখ্যমন্ত্ৰী নীতিশ কুমাৰে প্ৰধানমন্ত্ৰীক কৃতজ্ঞতা জ্ঞাপন কৰি কয় যে বিহাৰৰ জীৱনীকা ভগ্নীসকলে আজি এক আদৰ্শ দাঙি ধৰিছে। তেওঁ কয় যে আজি জীৱিকাৰ সৈতে জড়িত মহিলাসকলে কেৱল পৰিয়ালৰ উপাৰ্জন বৃদ্ধি কৰাই নহয়, সমাজলৈ পৰিৱৰ্তনৰ জোৱাৰো কঢ়িয়াই আনিছে। কেন্দ্ৰীয় চৰকাৰৰ এই পদক্ষেপে মহিলাসকলক আৰু অধিক সবলীকৰণ কৰিব।
তেওঁ কয় যে বিহাৰ চৰকাৰে সদায় মহিলা সবলীকৰণৰ ওপৰত গুৰুত্ব আৰোপ কৰি আহিছে। ২০০৫ চনত আমাৰ চৰকাৰ গঠন হোৱাৰ পিছৰে পৰা মহিলাৰ বাবে বিশেষ আঁচনি আৰম্ভ হৈছিল। ২০০৬ চনত জীৱিকা গোট গঠন হৈছিল আৰু ২০১৩ চনৰ পৰা আৰক্ষীৰ মহিলাক ৩৫ শতাংশ সংৰক্ষণ দিয়া হৈছিল। এই আঁচনিৰ বাবে ৰাজ্য চৰকাৰে ১০০০ কোটি টকাৰ অনুমোদন জনাইছে।
हिन्दुस्थान समाचार / মনোজ কুমাৰ শইকীয়া
