নতুন দিল্লী, ৩০ আগষ্ট (হি.স.)। কেন্দ্ৰীয় ইলেক্ট্ৰনিকছ আৰু তথ্য প্ৰযুক্তি মন্ত্ৰী অশ্বিনী বৈষ্ণৱে শনিবাৰে নয়ডাত মোবাইল ডিভাইচৰ বাবে দেশৰ প্ৰথমটো টেম্পাৰড গ্লাছ নিৰ্মাণ ইউনিট উদ্বোধন কৰে। অপ্টিমাছ ইলেক্ট্ৰনিক্স আৰু আমেৰিকাৰ কৰ্নিং ইনকৰ্পৰেটেডৰ যৌথ উদ্যোগ হিচাপে ইয়াক স্থাপন কৰা হৈছে। এই ইউনিটে ‘ইঞ্জিনিয়াৰ বাই কৰ্নিং’ ব্ৰেণ্ডৰ অধীনত উচ্চমানৰ সামগ্ৰী নিৰ্মাণ কৰিব আৰু ইয়াক ঘৰুৱা আৰু আন্তঃৰাষ্ট্ৰীয় বজাৰলৈ যোগান ধৰিব।

এই উপলক্ষে মন্ত্ৰীগৰাকীয়ে কয় যে টেম্পাৰড গ্লাছ মোবাইল ফোনসমূহৰ এক গুৰুত্বপূৰ্ণ আনুষংগিক বস্তু আৰু ইয়াৰ থলুৱা উৎপাদন স্বাৱলম্বী ভাৰত আৰু ‘মেক ইন ইণ্ডিয়া’ অভিযানৰ দিশত এক গুৰুত্বপূৰ্ণ পদক্ষেপ। পৰ্যায়ক্ৰমে ভাৰতে মোবাইল ফোনত ব্যৱহৃত সকলো উপাদান প্ৰস্তুত কৰি আছে। ইয়াৰ ভিতৰত আছে চিপ, কভাৰ গ্লাছ, লেপটপ আৰু চাৰ্ভাৰৰ সঁজুলি। তেওঁ কয় যে অতি সোনকালে ভাৰতত নিৰ্মিত চিপ বজাৰলৈ আহিব।

তেওঁ কয় যে বিগত ১১ বছৰত ভাৰতৰ ইলেক্ট্ৰনিকছ উৎপাদন ছয়গুণ বৃদ্ধি পাই ১১.৫ লাখ কোটি টকা হৈছে। ইয়াৰে ৩ লাখ কোটিতকৈ অধিক টকা ৰপ্তানি কৰা হৈছে আৰু ২৫ লাখৰো অধিক লোকে প্ৰত্যক্ষ আৰু পৰোক্ষভাৱে কৰ্মসংস্থাপন লাভ কৰিছে। তেওঁ জোৰ দি কয় যে ভাৰতৰ আটাইতকৈ ডাঙৰ শক্তি হৈছে ইয়াৰ ডিজাইন খণ্ড আৰু চৰকাৰে গৱেষণা আৰু উন্নয়নক উৎসাহিত কৰি যাব। উদাহৰণ দি তেওঁ কয় যে আই আই টি মাদ্ৰাজৰ সৈতে জড়িত এটা ষ্টাৰ্টআপে ভাৰতৰ প্ৰথমটো মাইক্ৰ’কণ্ট্ৰ’লাৰ প্ৰস্তুত কৰিছে, যিটো অতি সোনকালে ভাৰতীয় সামগ্ৰীত ব্যৱহাৰ কৰা হ’ব।

এই উপলক্ষে অপ্টিমাছ ইনফ্ৰাকম লিমিটেডৰ অধ্যক্ষ অশোক কুমাৰ গুপ্তাই কয় যে ভাৰত বিশ্বৰ সৰ্ববৃহৎ মোবাইল বজাৰ, তথাপিও এতিয়ালৈকে ই টেম্পাৰড গ্লাছৰ বাবে আমদানিৰ ওপৰত নিৰ্ভৰশীল। এতিয়া ভাৰত আৰু বিশ্বজুৰি উচ্চমানৰ সামগ্ৰী উপলব্ধ কৰা হ’ব। ভাৰতীয় মোবাইল গ্ৰাহকে ‘মেক ইন ইণ্ডিয়া’ টেম্পাৰড গ্লাছ ব্যৱহাৰ কৰিব লাগে। একে সময়তে ইণ্ডিয়া চেলুলাৰ এণ্ড ইলেক্ট্ৰনিকছ এছ’চিয়েশ্যনৰ সভাপতি পংকজ মহেন্দ্ৰুৱে কয় যে এই খণ্ডটো শ্ৰমিক নিবিড় আৰু ভাৰতৰ বাবে বৃহৎ নিয়োগ আৰু ৰপ্তানিৰ সুযোগ প্ৰদান কৰে।

এই ইউনিটত প্ৰাৰম্ভিকভাৱে ৭০ কোটি টকা বিনিয়োগ কৰা হৈছে। প্ৰথম পৰ্যায়ত বছৰি ২.৫ কোটি ইউনিট উৎপাদন ক্ষমতা হ’ব আৰু ৬০০ৰো অধিক লোকে কৰ্মসংস্থাপন লাভ কৰিব। দ্বিতীয় পৰ্যায়ত ৮০০ কোটি টকাৰ অতিৰিক্ত বিনিয়োগেৰে বছৰি ২০ কোটি ইউনিটলৈ সামৰ্থ্য বৃদ্ধি কৰি ৪৫০০ৰো অধিক প্ৰত্যক্ষ চাকৰিৰ সৃষ্টি হ’ব। উল্লেখযোগ্য যে ভাৰতীয় টেম্পাৰড গ্লাছৰ বজাৰখন ৫০ কোটিতকৈও অধিক, যাৰ খুচুৰা মূল্য প্ৰায় ২০ হাজাৰ কোটি টকা। বিশ্ব বজাৰৰ আকাৰ ৬০ বিলিয়ন ডলাৰতকৈও অধিক।

हिन्दुस्थान समाचार / মনোজ কুমাৰ শইকীয়া