দিল্লী, ০৬ জুলাই (হি.স.): আৰ্জেণ্টিনাৰ সাৰ্থক ভ্ৰমণৰ সামৰণি মাৰি ব্ৰাজিলৰ ৰাষ্ট্ৰপতি লুইজ ইনাছিঅ’ লুলা দা চিলভাৰ আমন্ত্ৰণত ব্ৰাজিলৰ ৰিঅ’ ডি জেনেইৰ’ত ১৭ সংখ্যক ব্ৰিকছ সন্মিলনত অংশগ্ৰহণৰ বাবে উপস্থিত হৈছে প্ৰধানমন্ত্ৰী মোডী। ব্ৰাজিলৰ সৈতে সম্পৰ্ক শক্তিশালী আৰু বিশ্বৰ নেতাসকলৰ সৈতে জড়িত হোৱাৰ বাবে দুটা খণ্ডৰ ভ্ৰমণৰ আৰম্ভণিতে তেওঁ গালিয়াও আন্তঃৰাষ্ট্ৰীয় বিমানবন্দৰত অৱতৰণ কৰে।

এক্সত প্ৰধানমন্ত্ৰী মোদীয়ে পোষ্ট কৰিছিল: “ব্ৰাজিলৰ ৰিঅ’ ডি জেনেইৰ’ত অৱতৰণ কৰিলোঁ, য’ত মই ব্ৰিকছ শীৰ্ষ সন্মিলনত অংশগ্ৰহণ কৰিম আৰু তাৰ পিছত ৰাষ্ট্ৰপতি লুলাৰ আমন্ত্ৰণত ৰাজ্যিক ভ্ৰমণৰ বাবে ইয়াৰ ৰাজধানী ব্ৰাজিলিয়ালৈ যাম। এই ভ্ৰমণৰ সময়ত বৈঠক আৰু পাৰস্পৰিক ক্ৰিয়াৰ এক উৎপাদনশীল পৰিক্ৰমাৰ বাবে আগ্ৰহী।”

বৈদেশিক পৰিক্ৰমা মন্ত্ৰালয়ৰ মুখপাত্ৰ ৰণধীৰ জয়ছোৱালে এক্সৰ ওপৰত কৰা এক পোষ্টত কয় যে, ব্ৰিকছৰ অংশীদাৰিত্বৰ প্ৰতি প্ৰতিশ্ৰুতিবদ্ধ! ১৭ সংখ্যক ব্ৰিকছ শীৰ্ষ সন্মিলনৰ বাবে ব্ৰাজিলৰ ৰিঅ' ডি জেনেইৰ'ত অৱতৰণ কৰে প্ৰধানমন্ত্ৰী নৰেন্দ্ৰ মোডী ( @narendramodi। #BRICS2025)।

১৭ সংখ্যক ব্ৰিকছ নেতা সন্মিলনত তেওঁ শান্তি, নিৰাপত্তা, বহুপক্ষীয়তাবাদ, কৃত্ৰিম বুদ্ধিমত্তা, জলবায়ু কাৰ্য্য, স্বাস্থ্য, আৰু অৰ্থনৈতিক বিষয়ৰ দৰে জটিল বিশ্বজনীন বিষয়সমূহৰ ওপৰত চৰ্চা কৰিব। ইয়াৰ উপৰিও শীৰ্ষ সন্মিলনৰ সময়ত প্ৰধানমন্ত্ৰী মোদীয়ে দ্বিপাক্ষিক বৈঠকত লিপ্ত হোৱাৰ সম্ভাৱনা আছে। ব্ৰাজিলিয়াত তেওঁ ৰাষ্ট্ৰপতি লুলাৰ সৈতে কৌশলগত অংশীদাৰিত্ব সম্প্ৰসাৰণৰ বিষয়ে আলোচনা কৰিব, বাণিজ্য, প্ৰতিৰক্ষা, শক্তি, মহাকাশ, প্ৰযুক্তি, কৃষি, স্বাস্থ্য, আৰু মানুহৰ মাজত সংযোগৰ ওপৰত গুৰুত্ব আৰোপ কৰিব।

এয়া মোডীৰ চতুৰ্থবাৰলৈ ব্ৰাজিল ভ্ৰমণ আৰু ব্ৰিকছ শীৰ্ষ সন্মিলনত ১২ সংখ্যক অংশগ্ৰহণ। তেওঁৰ পূৰ্বৰ উপস্থিতিসমূহৰ ভিতৰত ২০২০ চনৰ অক্টোবৰত ভাৰ্চুৱেল শীৰ্ষ সন্মিলন আৰু ইয়াৰ পূৰ্বে জোহান্সবাৰ্গ আৰু গোৱাৰ দৰে স্থানত অনুষ্ঠিত হোৱা বৈঠকসমূহো অন্তৰ্ভুক্ত। ব্ৰিকছে ১১খন উল্লেখযোগ্য উদীয়মান অৰ্থনীতিক একত্ৰিত কৰিছে, যিয়ে বিশ্বৰ জনসংখ্যাৰ প্ৰায় ৪৯.৫%, বিশ্বৰ জিডিপিৰ প্ৰায় ৪০% আৰু বিশ্ব বাণিজ্যৰ প্ৰায় ২৬% অংশ গ্ৰহণ কৰে। ইয়াৰ পূৰ্বে ভাৰতে ২০২১ চনৰ ছেপ্টেম্বৰ আৰু ২০১৬ চনৰ অক্টোবৰ মাহত ব্ৰিকছৰ অধ্যক্ষতা কৰিছিল, ইয়াৰ সভাপতিত্বৰ সময়ছোৱাত ১৫০টাতকৈও অধিক অনুষ্ঠান আয়োজন কৰিছিল।

ব্ৰাজিলৰ পূৰ্বে,প্ৰধানমন্ত্ৰী মোডীয়ে ঘানা, ট্ৰিনিদাদ এণ্ড ট’বেগো, আৰু আৰ্জেণ্টিনা ভ্ৰমণ কৰিছিল, পিছৰটো আছিল ৫৭ বছৰৰ ভিতৰত ভাৰতৰ প্ৰধানমন্ত্ৰীৰ প্ৰথমটো দ্বিপাক্ষিক ভ্ৰমণ। ব্ৰাজিলৰ পিছত তেওঁৰ পাঁচখন দেশৰ ভ্ৰমণৰ অন্তিম অৱস্থান হ’ব ৯ জুলাইত নামিবিয়া আৰু তাত তেওঁ সংসদত ভাষণ দিব।

হিন্দুস্থান সমাচাৰ / মনোজ কুমাৰ শইকীয়া