অনুপম খেৰৰ পৰিচালনাৰ উদ্যোগ ‘তনভি দ্য গ্ৰেট’ ১৮ জুলাইত ছবিগৃহত মুক্তি লাভ কৰে। ছবিখনে সমালোচকৰ ভাল সঁহাৰি লাভ কৰাৰ লগতে দৰ্শকে ইয়াৰ কাহিনী আৰু অভিনেতাসকলৰ অভিনয়কো প্ৰশংসা কৰে। কিন্তু ছবিখনে বক্স অফিচত আশা কৰা ধৰণে প্ৰদৰ্শন কৰিব নোৱাৰিলে। ইফালে ছবিখনৰ সপক্ষে এটা ভাল খবৰ আহিছে। ‘তনভি দ্য গ্ৰেট’ক মধ্যপ্ৰদেশ চৰকাৰে কৰমুক্ত ঘোষণা কৰিছে। এই সিদ্ধান্তই ৰাজ্যত ছবিখনলৈ অধিক দৰ্শক লাভ কৰিব আৰু ইয়াৰ উপাৰ্জন বৃদ্ধি পাব পাৰে বুলি ধাৰণা কৰা হৈছে।
মধ্যপ্ৰদেশৰ মুখ্যমন্ত্ৰী ড০ মোহন যাদৱে ৰাজ্যত ‘তনভি দ্য গ্ৰেট’ক কৰমুক্ত কৰাৰ কথা ঘোষণা কৰিছে। এই ছবিখন চাবলৈ জনসাধাৰণক আহ্বান জনাই তেওঁ কয়, এইখন কেৱল এখন ছবি নহয়, বৰঞ্চ এক প্ৰেৰণাদায়ক বাৰ্তা। অনুপম খেৰ আৰু সকলো অভিনেতাক আন্তৰিক অভিনন্দন। ৰাজ্যত এই ছবিখনক কৰমুক্ত কৰা হৈছে।
একে সময়তে অনুপম খেৰেও মুখ্যমন্ত্ৰী মোহন যাদৱৰ প্ৰতি আন্তৰিক কৃতজ্ঞতা প্ৰকাশ কৰি এই সিদ্ধান্তক ছবিখনৰ বাবে এক ডাঙৰ সকাহ বুলি অভিহিত কৰে। তেওঁ কয় যে এই সমৰ্থনৰ দ্বাৰা ছবিখনে অধিক লোকৰ মাজলৈ যাব আৰু ইয়াৰ বাৰ্তা অধিক শক্তিশালীভাৱে অনুৰণিত হ’ব।
‘তনভি দ্য গ্ৰেট’ ছবিখনৰ কথা ক’বলৈ গ’লে অটিজিম স্পেকট্ৰম ডিছঅৰ্ডাৰৰ সৈতে যুঁজি থকা ২১ বছৰীয়া তনভি ৰাইনাৰ প্ৰেৰণাদায়ক কাহিনী। এই চৰিত্ৰটো অতি গুৰুত্বসহকাৰে অভিনয় কৰিছে শুভংগী দত্তই। অনুপম খেৰকো ছবিখনত এক গুৰুত্বপূৰ্ণ চৰিত্ৰত দেখা গৈছে। ইয়াৰ উপৰিও জেকী শ্ৰফ, পল্লৱ যোছি, বোমান ইৰানী আৰু কৰণ টেকাৰৰ দৰে অভিজ্ঞ অভিনেতাও এই স্পৰ্শকাতৰ কাহিনীৰ অংশ।
বক্স অফিচৰ ট্ৰেকাৰ ছাকনিলকৰ মতে, ‘তনভি দ্য গ্ৰেট’ এতিয়ালৈকে মুঠ ১.৮৩ কোটি টকা সংগ্ৰহ কৰিছে। যদিও উপাৰ্জন সীমিত আছিল যদিও ছবিখনে দৰ্শক আৰু সমালোচকৰ প্ৰশংসা লাভ কৰিছে।
हिन्दुस्थान समाचार / আলোক চক্ৰৱৰ্তী
