নতুন দিল্লী, ১৩ জুলাই (হি.স.)। মহাৰাষ্ট্ৰৰ ঔৰংগাবাদ (সম্ভজিনগৰ)ত ঔদ্যোগিক বিকাশৰ প্ৰসাৰৰ লক্ষ্যৰে ভাৰতীয় উদ্যোগ সন্মিলন (চিআইআই)ৰ সহযোগত ঔৰংগাবাদ ঔদ্যোগিক চহৰত (অ'ৰিক) ২০ হাজাৰ বৰ্গফুট এলেকাত এটা নতুন দক্ষতা বিকাশ কেন্দ্ৰ স্থাপন কৰা হ’ব। এই সন্দৰ্ভত অহা সপ্তাহত বুজাবুজিৰ চুক্তি স্বাক্ষৰিত হোৱাৰ সম্ভাৱনা আছে। উদ্যোগ আৰু আভ্যন্তৰীণ বাণিজ্য প্ৰসাৰ বিভাগৰ সম্পাদক অমৰদ্বীপ সিং ভাটিয়াই ছত্ৰপতি সম্ভাজিনগৰ ভ্ৰমণৰ সময়ত এই পদক্ষেপৰ বিষয়ে অৱগত কৰে।

ইয়াৰ সময়ত তেওঁ অঞ্চলটোৰ উদ্যোগিক আন্তঃগাঁথনি আৰু ষ্টাৰ্টআপ উন্নয়নৰ অগ্ৰগতিৰ পৰ্যালোচনা কৰে। সচিবগৰাকীয়ে অ’ৰিকক উদ্ভাৱন আৰু উচ্চ মূল্য সৃষ্টিৰ বিশ্বব্যাপী কেন্দ্ৰ হিচাপে গঢ়ি তোলাৰ দিশত গৱেষণা আৰু উন্নয়ন (আৰ এণ্ড ডি) কেন্দ্ৰ আৰু গ্ল’বেল কম্পিটেন্স চেণ্টাৰ (জিচিচি)ত বিনিয়োগ আকৰ্ষণ কৰাৰ প্ৰয়োজনীয়তাৰ ওপৰত গুৰুত্ব আৰোপ কৰে। এই ভ্ৰমণৰ সময়ত আয়োজিত উদ্যোগ আলোচনা অধিবেশনত চি আই আই, ফিক্কী, এছোচেম, চি এম আই এ আৰু মাচিয়াৰ দৰে ডাঙৰ উদ্যোগ সংস্থাসমূহে অংশগ্ৰহণ কৰি অঞ্চলটোৰ প্ৰয়োজনীয়তা আৰু পৰামৰ্শসমূহ দাঙি ধৰে।

ঔৰংগাবাদ-হায়দৰাবাদ-চেন্নাইৰ মাজত উন্নত সংযোগ, মেৰামতি আৰু ৰক্ষণাবেক্ষণ (এম আৰ অ’) সুবিধা, ভাণ্ডে ভাৰত টাৰ্মিনেল নিৰ্মাণ, বিডকিনত উন্নত লজিষ্টিক ব্যৱস্থা, জলনা আৰু ৱালুজৰ মাজত স্থানীয় ৰেল সেৱা, এম এইচ এ ডিৰ জৰিয়তে সুলভ মূল্যৰ গৃহ নিৰ্মাণ আৰু নিৰ্দিষ্ট ৰাসায়নিক অঞ্চলৰ উন্নয়ন আদি পৰামৰ্শ আগবঢ়ায়। ইয়াৰ উপৰিও এম এছ এম ইৰ বাবে ভূমি সংৰক্ষণ ১০%ৰ পৰা ৪০%লৈ বৃদ্ধি, ষ্টাৰ্টআপৰ বাবে ১০% মাটি সংৰক্ষণ আৰু অ’ৰিকত কোমল আন্তঃগাঁথনি আৰু দক্ষতা বিকাশ শক্তিশালী কৰাৰ দাবীও উত্থাপন হৈছিল।

সচিবৰ এই ভ্ৰমণ আৰম্ভ হয় মাৰাথৱাডা এক্সিলেটৰ ফৰ গ্ৰ’থ এণ্ড ইনকিউবেচন কাউন্সিল (মেজিক)ত য’ত তেওঁ উদীয়মান উদ্যোগী, ষ্টাৰ্টআপ প্ৰতিষ্ঠাপক আৰু ইনকিউবেটৰৰ সৈতে মত বিনিময় কৰে। তেওঁ তেওঁলোকৰ উদ্ভাৱন সম্ভাৱনাক শলাগ লৈ কয় যে চৰকাৰে টায়াৰ-২ আৰু টায়াৰ-৩ চহৰত ষ্টাৰ্টআপ ইক’চিষ্টেম শক্তিশালী কৰাৰ বাবে ষ্টাৰ্টআপ ইণ্ডিয়া, ফাণ্ড অৱ ফাণ্ডৰ দৰে আঁচনিৰ জৰিয়তে বিশেষ সহায় আগবঢ়াইছে।

ইয়াৰ পিছত সচিবগৰাকীয়ে বিডকিন ঔদ্যোগিক এলেকা পৰিদৰ্শন কৰি জে এছ ডব্লিউ গ্ৰীণ-টেক লিমিটেড, টয়োটা কিৰলস্কাৰ আৰু পানী বিশুদ্ধকৰণ প্লাণ্টৰ দৰে আন্তঃগাঁথনি ইউনিটৰ অগ্ৰগতি পৰ্যালোচনা কৰে। ইয়াৰ পিছত তেওঁ শ্বেন্দ্ৰ ঔদ্যোগিক অঞ্চলত উপস্থিত হৈ এন এল এম কে ইণ্ডিয়া, হ্যোছং টি এণ্ড ডি প্ৰাইভেট লিমিটেড আৰু কোটল ফিল্মছ প্ৰাইভেট লিমিটেড আদি উদ্যোগিক ইউনিটসমূহ পৰিদৰ্শন কৰে।উচ্চ মূল্য সৃষ্টি আৰু নিয়োগ সৃষ্টিৰ ক্ষেত্ৰত এই ইউনিটসমূহৰ অৱদানৰ শলাগ লয়, যিটো ‘উন্নত ভাৰত ২০৪৭’ৰ দৃষ্টিভংগী বাস্তৱায়িত কৰাত সহায়ক।

ইয়াৰ উপৰিও তেওঁ পানী বিশুদ্ধকৰণ প্লাণ্ট, ইন্টিগ্ৰেটেড কমাণ্ড এণ্ড কণ্ট্ৰল চেণ্টাৰ (আইচিচিচি), অত্যাধুনিক অৰিক হল আৰু অৰিক স্মাৰ্ট চিটিৰ শ্বেন্দ্ৰাৰ থ্ৰীডি চিটি মডেল পৰিদৰ্শন কৰে। অৰিক স্মাৰ্ট চিটি দুটা পৰ্যায়ত উন্নয়ন কৰা হৈছে, যাৰ মুঠ মাটিকালি ১০,০০০ একৰ (প্ৰায় ৪,০০০ হেক্টৰ) সামৰি লোৱা হৈছে। ইয়াৰে ৬০% ভূমি উদ্যোগৰ বাবে আৰু বাকী ৪০% বাণিজ্যিক, আৱাসিক, শৈক্ষিক আৰু স্বাস্থ্যসেৱাৰ সুবিধাৰ বাবে সংৰক্ষিত।

ইতিমধ্যে শ্বেন্দ্ৰ আৰু বিডকিন অঞ্চলত পানী যোগান, বিদ্যুৎ, নলা-নৰ্দমা আৰু দ্ৰুতবেগী ইন্টাৰনেটৰ দৰে আন্তঃগাঁথনি গঢ়ি তোলা হৈছে। ভূগৰ্ভস্থ বিতৰণ ব্যৱস্থাৰ জৰিয়তে সকলো উদ্যোগিক প্লটত এই সুবিধাসমূহ প্ৰৱেশ কৰিছে। ৪২% পানীৰ চাহিদা পৰিশোধিত বর্জ্য পানীৰ জৰিয়তে পূৰণ কৰা হয়। মহানগৰীত আধুনিক এছিছিএডিএ ব্যৱস্থা, চিচিটিভি চোৱাচিতা, বায়ুৰ গুণাগুণ চেন্সৰ আৰু যান-বাহন নিয়ন্ত্ৰণ ব্যৱস্থাও স্থাপন কৰা হৈছে। লগতে ই-ভূমি ব্যৱস্থাপনা ব্যৱস্থাৰ জৰিয়তে উদ্যোগিক ভূমি আবণ্টনৰ প্ৰক্ৰিয়াটো স্বচ্ছ কৰি তোলা হৈছে। অ'ৰিকৰ নিজাকৈ বিদ্যুৎ বিতৰণৰ অনুজ্ঞাপত্ৰও আছে, যাৰ বাবে বিনিয়োগকাৰীয়ে কম হাৰত বিদ্যুৎ লাভ কৰিছে।

हिन्दुस्थान समाचार / মনোজ কুমাৰ শইকীয়া