নতুন দিল্লী, ০১ জুলাই (হি.স.)। কেন্দ্ৰীয় কেবিনেটে মঙলবাৰে দেশৰ গৱেষণা আৰু উদ্ভাৱন পৰিৱেশ তন্ত্ৰক শক্তিশালী কৰাৰ লক্ষ্যৰে এক লাখ কোটি টকাৰ পুঁজিৰে গৱেষণা উন্নয়ন আৰু উদ্ভাৱন আঁচনিত অনুমোদন জনায়। প্ৰধানমন্ত্ৰী নৰেন্দ্ৰ মোডীৰ অধ্যক্ষতাত অনুষ্ঠিত কেন্দ্ৰীয় কেবিনেট বৈঠকত এই সন্দৰ্ভত এটা প্ৰস্তাৱ অনুমোদন কৰা হয়।

গৱেষণা উন্নয়ন আৰু উদ্ভাৱন (আৰ ডি আই) আঁচনিৰ লক্ষ্য হৈছে ব্যক্তিগত খণ্ডৰ বিনিয়োগক প্ৰসাৰিত কৰিবলৈ কম বা শূন্য সুতৰ হাৰত দীৰ্ঘম্যাদী বিত্তীয় সাহায্য প্ৰদান কৰা। ব্যক্তিগত খণ্ডৰ বিত্তীয় সাহায্যৰ ক্ষেত্ৰত থকা বাধা আৰু প্ৰত্যাহ্বানসমূহ দূৰ কৰিবলৈ এই আঁচনিখন ৰচনা কৰা হৈছে। ইয়াৰ লক্ষ্য হৈছে উদ্ভাৱনৰ সুবিধা, প্ৰযুক্তি গ্ৰহণক প্ৰসাৰিত আৰু প্ৰতিযোগিতামূলক ক্ষমতা বৃদ্ধিৰ বাবে উদীয়মান আৰু কৌশলগত খণ্ডসমূহৰ উন্নয়নৰ বাবে মূলধন প্ৰদান কৰা।

কেন্দ্ৰীয় তথ্য আৰু সম্প্ৰচাৰ মন্ত্ৰী অশ্বিনী বৈষ্ণৱে সংবাদমেলত কয় যে উদীয়মান ক্ষেত্ৰত গৱেষণা, উন্নয়ন আৰু উদ্ভাৱন (আৰ ডি আই)ক উৎসাহিত কৰা আৰু ব্যক্তিগত খণ্ডৰ অৰ্থনৈতিক সুৰক্ষাৰ বাবে এই আঁচনিৰ মূল উদ্দেশ্য। ইয়াৰ লগতে প্ৰযুক্তিৰ ক্ষেত্ৰত উচ্চ পৰ্যায়ৰ পৰিৱৰ্তনশীল প্ৰকল্পৰ বাবে পুঁজিৰ ব্যৱস্থা কৰা আৰু গুৰুত্বপূৰ্ণ প্ৰযুক্তিসমূহ অধিগ্ৰহণত সহায় কৰা। ইয়াৰ লগতে ডিপ-টেক ফাণ্ড অৱ ফাণ্ড স্থাপনৰ ক্ষেত্ৰতো সুবিধা হ’ব লাগে।

প্ৰধানমন্ত্ৰীৰ অধ্যক্ষতাত গভৰ্নিং ব’ৰ্ড অৱ ৰিচাৰ্চ নেচনেল ৰিচাৰ্চ ফাউণ্ডেশ্যনে আৰ ডি আই আঁচনিখনক বহল কৌশলগত দিশ প্ৰদান কৰিব বুলি তেওঁ অৱগত কৰে। এএনআৰএফৰ কাৰ্যবাহী পৰিষদে (ইচি) আঁচনিৰ নিৰ্দেশনা অনুমোদন কৰি দ্বিতীয় পৰ্যায়ৰ পুঁজি পৰিচালক আৰু উদীয়মান অঞ্চলত প্ৰকল্পৰ পৰিসৰ আৰু প্ৰকাৰৰ পৰামৰ্শ দিব। কেবিনেট সচিবৰ নেতৃত্বত এটা ক্ষমতাশালী সচিব গোট (ইজিঅ’এছ) আঁচনিখনৰ পৰিবৰ্তন, ক্ষেত্ৰ আৰু প্ৰকল্পৰ প্ৰকাৰৰ পৰিৱৰ্তনৰ অনুমোদন দিয়াৰ উপৰিও আঁচনিখনৰ কাম-কাজৰ পৰ্যালোচনা কৰাৰ লগতে দ্বিতীয় পৰ্যায়ৰ পুঁজি পৰিচালকসকলৰ দায়িত্ব ল’ব।

আৰ ডি আই আঁচনি ৰূপায়ণৰ বাবে বিজ্ঞান আৰু প্ৰযুক্তি বিভাগে ন’ডেল বিভাগ হিচাপে কাম কৰিব। আৰ ডি আই আঁচনিৰ জৰিয়তে দুটা স্তৰৰ পুঁজিৰ ব্যৱস্থা থাকিব। প্ৰথম পৰ্যায়ত এএনআৰএফৰ ভিতৰত বিশেষ উদ্দেশ্যৰ পুঁজি (এছপিএফ) গঠন কৰা হ’ব, যিয়ে পুঁজিৰ ৰক্ষক হিচাপে কাম কৰিব। এছ পি এফৰ পৰা বিভিন্ন দ্বিতীয় স্তৰৰ ফাণ্ড মেনেজাৰলৈ ধন আবণ্টন দিয়া হ’ব। ই মূলতঃ দীৰ্ঘম্যাদী ৰেহাইমূলক ঋণৰ ৰূপত হ’ব। দ্বিতীয় স্তৰৰ পুঁজি পৰিচালকে অনুসন্ধান আৰু বিকাশ প্ৰকল্পৰ বাবে পুঁজি সাধাৰণতে কম বা শূন্য সুতৰ হাৰত দীৰ্ঘম্যাদী ঋণৰ ৰূপত হ’ব। বিশেষকৈ ষ্টাৰ্টআপৰ ক্ষেত্ৰত ইকুইটিৰ ৰূপতো পুঁজি অনুমোদিত হ’ব পাৰে।

হিন্দুস্থান সমাচাৰ / মনোজ কুমাৰ শইকীয়া