বিৰুধুনগৰ, ০১ জুলাই (হি.স.)। তামিলনাডুৰ বিৰুধুনগৰ জিলাত চলি থকা গোকুলাছ ফটকা কাৰখানাত মঙলবাৰে পুৱা হঠাৎ বিস্ফোৰণ সংঘটিত হয়। সত্তুৰৰ সমীপৰ চিন্নাক্কমনপট্টিত এই দুৰ্ঘটনাত ৭ জন লোকৰ মৃত্যু হোৱাৰ বিপৰীতে আন বহু শ্ৰমিক গুৰুতৰভাৱে আহত হয়। আহতসকলক চিকিৎসাৰ বাবে শিৱকাশিৰ চৰকাৰী চিকিৎসালয়ত ভৰ্তি কৰোৱা হৈছে। দুৰ্ঘটনাৰ পিছতে আৰক্ষী আৰু অগ্নিনিৰ্বাপক বাহিনীৰ দল উপস্থিত হয়। সাহায্য আৰু উদ্ধাৰৰ কাম চলি আছে।

তামিলনাডুৰ বিৰুধুনগৰ জিলাৰ চিন্নাক্কমনপট্টিত ফটকা কাৰখানাত বিস্ফোৰণৰ ফলত ৭ জন লোকৰ মৃত্যু হয়। এই দুৰ্ঘটনাত আন বহু শ্ৰমিক আহত হৈছে, তেওঁলোকক শিৱকাশিৰ চৰকাৰী চিকিৎসালয়ত ভৰ্তি কৰা হৈছে। বিস্ফোৰণ ইমানেই বৃহৎ আছিল যে চৌহদৰ আঠটা কোঠা জ্বলি ছাই হৈ পৰে। তাত মাটি সমতল হৈ পৰিছিল। পুৱা প্ৰায় ৮:৩০ বজাত শ্ৰমিকসকলে ক্ৰেকাৰ তৈয়াৰ কৰিবলৈ ব্যৱহাৰ কৰা ৰাসায়নিক দ্ৰব্য মিহলি কৰি থকাৰ সময়তে হঠাতে বিস্ফোৰণ ঘটে আৰু চাৰিওফালৰ অট্টালিকা ভাঙি বহু লোক ধ্বংসাৱশেষৰ তলত আবদ্ধ হৈ পৰে।

আৰক্ষীৰ মতে, ফটকা কাৰখানাটো কমল কুমাৰৰ দ্বাৰা পৰিচালিত। তেওঁৰ নাগপুৰৰ পেট্ৰলিয়াম এণ্ড এক্সপ্ল’ছিভছ ছেফটি অৰ্গেনাইজেশ্যন (পিইএছঅ’)ৰ অনুজ্ঞাপত্ৰ আছে। ৫০টাতকৈও অধিক কোঠা থকা এই ইউনিটত বৃহৎ সংখ্যক কৰ্মচাৰীয়ে কাম কৰে।

আৰক্ষীয়ে জনোৱা মতে, বিস্ফোৰণৰ পিছত সংঘটিত হোৱা বৃহৎ অগ্নিকাণ্ডই সমগ্ৰ ইউনিটটোক আগুৰি ধৰে। দুৰ্ঘটনাত বহু লোকো আহত হয়। একে সময়তে বিস্ফোৰণৰ পিছত ফেক্টৰীৰ পৰা ওলাই অহা ধোঁৱা আৰু ফটকা ফাটি যোৱাৰ শব্দ বহু দূৰৈৰ পৰা শুনা গৈছিল। ঘটনাৰ পিছতে আৰক্ষী, অগ্নিনিৰ্বাপক বাহিনী আৰু উদ্ধাৰ সেৱাৰ লোকে খৰখেদাকৈ সেই স্থানত উপস্থিত হয়। লগে লগে আহত লোকসকলক চিকিৎসালয়লৈ লৈ যায়।

স্থানীয় আৰক্ষীয়ে বিস্ফোৰণৰ তদন্ত অব্যাহত ৰাখিছে। আৰক্ষীয়ে ফটকা কাৰখানাৰ মেনেজাৰ আৰু বিক্ৰেতাকো গ্ৰেপ্তাৰ কৰিছে। অগ্নিনিৰ্বাপক বাহিনীৰ বিষয়াগৰাকীয়ে জানিবলৈ দিয়া মতে, বিস্ফোৰণৰ পিছত আৰম্ভ হোৱা অগ্নিকাণ্ড নিয়ন্ত্ৰণ কৰিবলৈ সক্ষম হৈছে। সেই ঠাইৰ পৰা ধ্বংসাৱশেষ আঁতৰোৱাৰ কাম চলি আছে।

হিন্দুস্থান সমাচাৰ / মনোজ কুমাৰ শইকীয়া