নতুন দিল্লী, ৩০ জুন (হি.স.)। শেহতীয়াকৈ ভাৰতীয় নেশ্যনেল ৰাইফল এছ’চিয়েশ্যনে (এনআৰএআই) দেশৰ প্ৰথমটো শ্বুটিং লীগ অৱ ইণ্ডিয়া (এছএলআই) ঘোষণা কৰাৰ পিছতে সমগ্ৰ দেশতে এই শ্বুটিং ক্ৰীড়াক লৈ এক উৎসাহৰ পৰিৱেশ সৃষ্টি হৈছে। এই নতুন পদক্ষেপক লৈ ক্ৰীড়া জগতত চৰ্চা চলি আছে।

এই লীগৰ প্ৰথম সংস্কৰণক লৈ সন্তোষ প্ৰকাশ কৰি ভাৰতীয় আন্তঃৰাষ্ট্ৰীয় শ্বুটাৰ শ্ৰিয়ানকা সাধানীয়ে এক আনুষ্ঠানিক বিবৃতিত কয় যে, মই অতিশয় উৎসাহিত। আমি সকলোৱে দীৰ্ঘদিন ধৰি শ্বুটিং লীগ এখন গঢ়িব বিচাৰিছিলো আৰু এতিয়া ই কেনেকৈ আগবাঢ়িছে সেয়া চাবলৈ আকৰ্ষণীয় হ'ব। এইটো সকলোৰে বাবে এক সুন্দৰ সুযোগ। এছএলআইয়ে যুৱক-যুৱতীসকলক এই খেলবিধ গ্ৰহণ কৰিবলৈ অনুপ্ৰাণিত কৰিব। শ্ৰিয়ানকাই বিশ্বাস কৰে যে এই লীগে খেলুৱৈসকলৰ স্বীকৃতি লাভ আৰু খেলবিধক জনপ্ৰিয় কৰি তোলাত গুৰুত্বপূৰ্ণ ভূমিকা পালন কৰিব।

তেখেতে কয় যে, এয়া ক্ৰীড়াটোৰ বাবে আৰু আমাৰ বাবে এক ডাঙৰ সুযোগ। আমাৰ ওচৰত ইমানবোৰ ভাল, আন্তঃৰাষ্ট্ৰীয় পৰ্যায়ৰ শ্বুটাৰ আছে যিসকলে এই লীগৰ অংশ হ'বলৈ গৈ আছে। ভাৰতীয় শ্বুটিং দলৰ স্তৰ এতিয়া অতি উচ্চ হৈ পৰিছে। মই বিচাৰো যে তেওঁলোকে বিশ্ব পৰ্যায়ত স্বীকৃতি লাভ কৰক। মানুহে এই খেলখনত কিমান নিখুঁততা, কঠোৰ পৰিশ্ৰম আৰু দক্ষতা সোমাই থাকে সেই কথা জানিব লাগে। তেখেতে কয় যে, এছএলআইয়ে মানুহক খেলুৱৈসকলে কেনেকৈ প্ৰস্তুতি চলায়, তেওঁলোকৰ প্ৰশিক্ষণ পদ্ধতি কি আৰু প্ৰতিযোগিতাসমূহৰ ফৰ্মেট কি সেই বিষয়ে বুজিবলৈ সহায় কৰিব। এই লীগে মানুহক খেলুৱৈসকলক গভীৰভাৱে চিনি পোৱাৰ সুযোগ দিব আৰু ইয়াৰ দ্বাৰা খেলবিধক এক নতুন পৰিচয় দিয়া হ'ব।

সাধাৰণ দৰ্শকৰ বাবে শ্বুটিং কেনেদৰে অধিক আকৰ্ষণীয় কৰি তুলিব পাৰি সেই বিষয়েও বুজাই দিয়ে ৩০ বছৰীয়া শ্ৰিয়ানকাই। শ্বুটাৰৰ দৈনন্দিন জীৱনৰ সৈতে জড়িত কথাবোৰ আমি দেখুৱাব পাৰো, কাৰণ মানুহে ইয়াৰ সৈতে সংযুক্ত অনুভৱ কৰে। যেনে খেলুৱৈসকলে আজৰি সময়ত কি কৰে বা তেওঁলোকৰ জীৱনৰ আভাস দিয়ে - ই দৰ্শকক সংযোগ আৰু অনুপ্ৰাণিত কৰিব। যদি ইয়াক আকৰ্ষণীয় আৰু মনোৰঞ্জনমূলকভাৱে উপস্থাপন কৰা হয়, তেন্তে মানুহে ইয়াক বহুত ভাল পাব। ক্ৰীড়াৰ সামাজিক প্ৰভাৱ সন্দৰ্ভত তেওঁ কয়, যদি আমি ক্ৰীড়াক আমাৰ সংস্কৃতিৰ অংশ হিচাপে গঢ়ি তুলিব পাৰো, তেন্তে সমাজে ইয়াৰ পৰা বহুখিনি লাভৱান হ'ব। যুৱক-যুৱতীসকলৰ শক্তিক ইতিবাচক দিশত ব্যৱহাৰ কৰা হ'ব। ক্ৰীড়াই এজন ব্যক্তিৰ চৰিত্ৰ আৰু ব্যক্তিত্ব বৃদ্ধি কৰে। ই সমাজ গঢ়াৰ বাবে এক উৎকৃষ্ট মাধ্যম।

হিন্দুস্থান সমাচাৰ / মনোজ কুমাৰ শইকীয়া