নতুন দিল্লী, ২০ জুন (হি.স.)। এফ আই এইচ হকী প্ৰ’ লীগ ২০২৪-২৫ৰ অন্তিম পৰ্যায়ত ভাৰতৰ পুৰুষ আৰু মহিলা হকী দলে বেলজিয়ামৰ বিৰুদ্ধে খেলিব। বিশ্বকাপৰ অৰ্হতাৰ আশাৰে ইউৰোপ ভ্ৰমণলৈ যোৱা ভাৰতীয় দলসমূহৰ প্ৰদৰ্শন আশা কৰা ধৰণে নাছিল। এতিয়া বাকী দুখন মেচত দলসমূহে সন্মানজনক জয়ৰে অভিযানৰ অন্ত পেলোৱাৰ বাবে চকু ৰাখিছে।

একেৰাহে ৬ বাৰ পৰাজয়ৰ অন্তত এতিয়া ভাৰতীয় পুৰুষ হকী দলে বৰ্তমান যুগৰ অন্যতম শক্তিশালী দল বেলজিয়ামৰ বিৰুদ্ধে খেলিব। শেহতীয়াকৈ বেলজিয়ামে স্পেইনক ৬-৩ গ’লত পৰাস্ত কৰিছিল যদিও তাৰ পূৰ্বে একেটা দলৰ হাতত ১-২ গ’লত পৰাস্ত হৈছিল। বৰ্তমান পইণ্ট তালিকাত বেলজিয়াম তৃতীয় স্থানত থকাৰ বিপৰীতে ভাৰত অষ্টম স্থানলৈ পিছলি গৈছে।

ভাৰতীয় দলৰ উপ-অধিনায়ক হাৰ্দিক সিঙে কয়, ফল আমাৰ পক্ষত হোৱা নাই, কিন্তু আমি যে বেয়া হকী খেলিছো এনে নহয়। আচল কষ্টটো হ'ল যেতিয়া আপুনি ভাল খেলে কিন্তু ফলাফল নাপায়। এই দুখন মেচত আমাৰ লক্ষ্য হ'ব ৰক্ষণভাগ শক্তিশালী কৰা আৰু গ'ল দিয়াৰ সুযোগ সৃষ্টি কৰা।

ভাৰতীয় মহিলা দলৰ অধিনায়ক ছালিমা টেটে কয় যে বিশ্বৰ তিনি নম্বৰ দল বেলজিয়ামৰ বিৰুদ্ধে খেলৰ বাবে তেওঁৰ দল সাজু হৈছে। অষ্ট্ৰেলিয়াৰ বিৰুদ্ধে খেলখন আৰু পেনাল্টি শ্বুটআউটলৈ যোৱা আৰ্জেণ্টিনাৰ বিৰুদ্ধে খেলখন দুয়োখনেই আমাৰ বাবে শিক্ষণ আছিল। শেষবাৰৰ বাবে বেলজিয়ামৰ বিৰুদ্ধে আমি তেওঁলোকক সহজ জয় দিয়া নাছিলো। এইবাৰো আমি একে আত্মবিশ্বাস আৰু প্ৰস্তুতিৰে যাম।

অহা ২১ আৰু ২২ জুনত এণ্টৱাৰ্পত বেলজিয়ামৰ বিৰুদ্ধে ভাৰতীয় পুৰুষ আৰু মহিলা হকী দলে ডাবল হেডাৰ খেলিব। এই মেচসমূহ হ’ব ভাৰতৰ বাবে প্ৰ’ লীগত নিজৰ অভিযানৰ উন্নত অন্ত দিয়াৰ অন্তিম সুযোগ।

হিন্দুস্থান সমাচাৰ / মনোজ কুমাৰ শইকীয়া