লখিমপুৰ, ০৩ এপ্ৰিল (হি.স.)। লখিমপুৰ জিলাৰ অসম-অৰুণাচল সীমাৰ বান্দৰদেৱাত তিনি মৎস্য ব্যৱসায়ীক এজন অৰুণাচলীয়ে ব্যৱসায়ী স্থলীতে চোকা অস্ত্ৰৰে আক্ৰমণ কৰি এক অভাৱনীয় পৰিস্থিতিৰ সৃষ্টি কৰে।জানিব পৰা মতে, কালি বিয়লী প্ৰায় ৭ বজাত এজন অৰুণাচলীয়ে বান্দৰদেৱাৰ স্থায়ী মাছৰ বজাৰত মাছ ক্ৰয় কৰিবলৈ আহি মাছৰ টকা নিদিয়াকৈ মাছ লবলৈ বিচৰাত তৰ্ক- বিৰ্তকত লিপ্ত হৈ তিনিজনকৈ মাছ বেপাৰীক দা’ৰে ঘপিয়াই আহত কৰে ৷আহত কেইজন হ’ল ক্ৰমে যোৰহাট বড়ী গাঁৱৰ অৰুণ হাজৰিকাৰ , ৰাজু দাস আৰু উৎপল দাস ৷ বান্দৰদেৱা কাৰ্চিছাৰ নিৱাসী পাছাং নিয়া নামৰ অৰুণাচলী লোকজনে অৰুণ হাজৰিকাৰ মুৰ আৰু হাতত ঘপিয়াই গুৰুতৰ ভাবে আহত কৰে ৷আহত মাছ বেপাৰী হাজৰিকা সংকটজনক অৱস্থাত নাহৰলাগুন চিকিতসা মহাবিদ্য়ালয়ত চিকিৎসাধীন হৈ আছে ৷স্থানীয় শতাধিক ব্যৱসায়ী ৰাজপথলৈ ওলাই আহি অসমৰ মাটিৰে অৰুণাচলৰ যান বাহন চলাচল বন্ধ কৰিবলৈ পথ অৱৰোধ কৰাত অৰুণাচলৰ কৰ্ম্মৰত চি আৰ পি এফ বাহিনীয়ে অসমৰ মাটিত অৱৰোধকাৰীক লাঠি চালনা কৰাৰ লগতে ব্যৱসায়ীক মাৰপিট কৰাত অঞ্চলটোৰ পৰিস্থিতি নিশা ৯ বজালৈকে অধিক উত্তপ্ত হৈ পৰে। পৰৱৰ্তী সময়ত অসম আৰক্ষীয়ে আহি পৰিস্থিতি নিয়ন্ত্ৰণ কৰে। অৰুণাচল প্ৰদেশৰ বান্দৰদেৱা থানাৰ আৰক্ষীয়ে অপৰাধী পাছাং নিয়াক আটক কৰি নিজৰ জিম্মাত ৰাখিছে ৷
হিন্দুস্থান সমাচাৰ / কিশোৰ মিশ্ৰ
