গোলাঘাট, ০৩এপ্ৰিল (হি.স.)। ৰাজ্যৰ জাতীয় জীৱনত ধ্বজা বহন কৰি অহা অন্যতম জাতীয় সংগঠন অসম জাতীয়তাবাদী যুৱ ছাত্ৰ পৰিষদৰ এক বিংশতিতম কেন্দ্ৰীয় দ্বি বাৰ্ষিক অধিবেশন খন কাইলৈৰ পৰা গোলাঘাটৰ সমন্বয় ক্ষেত্ৰত বৰ্ণাঢ্য কায্যসুচীৰে তিনিদিনীয়াকৈ অনুষ্ঠিত হব ৷ অধিবেশনক লৈ বৰ্তমান গোলাঘাটত উখল মাখল পৰিবেশ ৷

ডিঙিত গামোছা , হাতত ছয় দফীয়া দাবী পত্ৰ লৈ ৪১৫ কিলোমিটাৰ পথ পদব্ৰজে আহিছে দুজন যুৱক ৷ লক্ষ্যস্থান গোলাঘাটৰ অধিবেশন ৷ ধেমাজী জিলাৰ বৰদলনীৰ পৰা মনজিৎ দত্ত আৰু ডেনিম চুতীয়াই পদব্ৰজে আহি উপস্থিত হৈছেহি গোলাঘাটত ৷ জাতীয়তাবাদী যুৱ ছাত্ৰ পৰিষদৰ এই সদস্য দুজনৰ উদ্দেশ্য ৰাইজৰ মাজত সংগঠনৰ ছয়দফীয়া দাবী প্ৰচাৰ আৰু সজাগতা কৰা৷

ইফালে কাইলৈৰ পৰা হব লগীয়া কেন্দ্ৰীয় অধিবেশনৰ বাবে ৰাজ্যৰ বিভিন্ন জিলাৰ ৫ হাজাৰ প্ৰতিনিধিক আদৰিবলৈ সাজু হৈছে আদৰনী সমিতি ৷ বিশাল পেণ্ডেল, মঞ্চৰ লগতে চহৰ খনৰ বিভিন্ন প্ৰান্তত সজাই পৰাই তুলিছে৷ ইতিমধ্যে প্ৰস্তুতিৰ ৯০ শতাংশ কাম সম্পূৰ্ণ হৈছে ৷ কাইলৈ পতাকা উত্তোলন, শ্বহীদ তৰ্পনৰে অধিবেশনৰ কাৰ্য্যসুচী আৰম্ভ হব ৷ দ্বিতীয় দিনা ৰাজ্যৰ কেইবা গৰাকীও শিল্পীৰ উপস্থিতিত বৰ্ণাঢ্য সাংস্কৃতিক শোভাযাত্ৰা বাহিৰ কৰা হব ৷ যত ৮০ টাৰো অধিক জাতি জনগোষ্ঠীৰ কৃষ্টি সংস্কৃতি প্ৰতিফলিত হব ৷ এই অধিবেশনতে আগন্তুক দুটা বৰ্ষৰ বাবে নতুন কেন্দ্ৰীয় সমিতি গঠন হব ৷ এই অধিবেশনতে সংগঠনটোৰ আগন্তুক কাৰ্য্যপন্থা গ্ৰহন কৰা হব ৷

হিন্দুস্থান সমাচাৰ / প্ৰকাশ ডেকা