লণ্ডন, ০২ এপ্ৰিল (হি.স.)। ইংলেণ্ড আৰু ৱেলছ ক্ৰিকেট ব’ৰ্ডে মঙলবাৰে ইংলেণ্ড মহিলা ক্ৰিকেট দলৰ নতুন মুখ্য প্ৰশিক্ষক হিচাপে নিযুক্তি দিয়ে চাৰ্লেট এডৱাৰ্ডছক। ইংলেণ্ডৰ প্ৰাক্তন অধিনায়ক এডৱাৰ্ডে নিজৰ দেশৰ হৈ ৩০০ৰো অধিক মেচ খেলিছে আৰু ২০ বছৰীয়া ক্ৰিকেট কেৰিয়াৰত পাঁচবাৰকৈ দুখন বিশ্বকাপ আৰু এছেছ ট্ৰফী লাভ কৰিছে।

২০১৭ চনত অৱসৰ লোৱাৰ পিছৰে পৰা এডৱাৰ্ডে ইংলেণ্ডৰ ঘৰুৱা ক্ৰিকেট আৰু বিশ্বব্যাপী টি-২০ লীগত প্ৰশিক্ষকতা কৰি আহিছে। চাউদাৰ্ণ ভাইপাৰছ, দ্য হাণ্ড্ৰেডত চাউদাৰ্ণ ব্ৰেভ, মহিলা বিগ বেছ লীগত ছিডনী ছিক্সাৰছ আৰু মহিলা প্ৰিমিয়াৰ লীগত মুম্বাই ইণ্ডিয়ানছৰ সৈতে সফলতা লাভ কৰিছে।

নিযুক্তিৰ বাবে সুখ প্ৰকাশ কৰি এডৱাৰ্ডে কয়, ইংলেণ্ডৰ মহিলা ক্ৰিকেট দলৰ নেতৃত্বৰ অংশ হ'বলৈ পাই মই পুনৰ ৰোমাঞ্চিত হৈছো। এই দলটোক আগুৱাই নি সফলতাৰ দিশত আগবঢ়াই নিয়াটো মোৰ বাবে গৌৰৱৰ বিষয়। পুনৰ তিনিটা সিংহ (ইংলেণ্ডৰ জাতীয় দলৰ ল'গ') পিন্ধাটো মোৰ বাবে বিশ্বৰ সৰ্ববৃহৎ সন্মান। ইংলেণ্ডৰ অধিনায়কত্ব মোৰ জীৱনৰ এক গুৰুত্বপূৰ্ণ অংশ হৈ আহিছে আৰু মই সদায় এই দল আৰু ইয়াৰ উত্তৰাধিকাৰৰ প্ৰতি উৎসৰ্গিত হৈ থাকিম। প্ৰতিভাৱান খেলুৱৈৰ এটা ডাঙৰ গোট আছে, আৰু মই তেওঁলোকৰ সৈতে কাম কৰি তেওঁলোকক ব্যক্তিগত আৰু দলীয় পৰ্যায়ত আগুৱাই নিবলৈ উৎসাহিত হৈছো।'

আমাৰ সন্মুখত ঘৰুৱা দুখন শৃংখলাৰ ক্ষীপ্ৰ প্ৰত্যাহ্বান আছে, তাৰ পিছত চলিত বৰ্ষৰ শেষৰ ফালে ভাৰতত অনুষ্ঠিত হ'ব আইচিচি মহিলা বিশ্বকাপ। অহা বছৰ ইংলেণ্ডত আইচিচি মহিলা টি-২০ বিশ্বকাপ অনুষ্ঠিত হ'ব, তাৰ পিছত ২০২৮ চনৰ লছ এঞ্জেলছ অলিম্পিকত মহিলা ক্ৰিকেটৰ প্ৰথমবাৰৰ বাবে অংশগ্ৰহণ হ'ব। মই এই দলৰ সৈতে ট্ৰফী জয় কৰি ইয়াক আগুৱাই নিয়াৰ বাবে আগ্ৰহী।

ইংলেণ্ড মহিলা ক্ৰিকেটৰ ইচিবিৰ উপ-চিইঅ’ তথা পৰিচালন সঞ্চালক ক্লেয়াৰ কনৰে কয় যে যেতিয়া আমি এই পদৰ মাপকাঠী নিৰ্ধাৰণ কৰিলোঁ তেতিয়া সোনকালে স্পষ্ট হৈ পৰিল যে চাৰ্লট এডৱাৰ্ডছ হৈছে শ্ৰেষ্ঠ প্ৰাৰ্থী।

তেওঁ লগতে কয়, এই দলটোক সফলতালৈ লৈ যোৱাৰ অভিজ্ঞতা, আবেগ আৰু বিশেষজ্ঞতা তেওঁৰ আছে। এজন মুখ্য প্ৰশিক্ষক হিচাপে তেওঁ বিভিন্ন দলৰ সৈতে অসাধাৰণ ফলাফল আগবঢ়াইছে। এয়া তেওঁৰ ধাৰাবাহিক প্ৰচেষ্টা আৰু উচ্চ মানদণ্ডৰ প্ৰমাণ। তেওঁ এজন প্ৰমাণিত বিজয়ী যিয়ে খেলুৱৈ হিচাপে আৰু এতিয়া প্ৰশিক্ষক হিচাপে ধাৰাবাহিক সফলতা লাভ কৰিছে।

বৰ্তমান হেম্পশ্বাৰৰ পৰা ইচিবিত যোগদান কৰিছে চাৰ্লট এডৱাৰ্ডে। ইংলেণ্ড মহিলা দলৰ মুখ্য প্ৰশিক্ষক হিচাপে তেওঁৰ প্ৰথমখন মেচ ২১ মে’ত কেণ্টাৰবেৰীত ৱেষ্ট ইণ্ডিজৰ বিৰুদ্ধে হ’ব। শীঘ্ৰে ঘোষণা কৰা হ’ব ইংলেণ্ড মহিলা দলৰ নতুন অধিনায়ক।

हिन्दुस्थान समाचार / মনোজ কুমাৰ শইকীয়া