আজমেৰ, ০১ এপ্ৰিল (হি.স.)। ৰাজস্থানৰ বেৱাৰৰ বাৰিয়া অঞ্চলৰ এচিড ফেক্টৰীৰ গুদামত ৰখাই থোৱা টেংকাৰৰ পৰা নাইট্ৰ’জেন গেছ নিৰ্গত হোৱাৰ ফলত কোম্পানীটোৰ মালিককে ধৰি তিনিজন লোকৰ মৃত্যু হয়। আনহাতে তিনিজন লোকৰ অৱস্থা এতিয়াও সংকটজনক। দুৰ্ঘটনাটোত ক্ষতিগ্ৰস্ত ৬০ জনতকৈ অধিক লোকক বেৱাৰ আৰু আজমেৰৰ চৰকাৰী চিকিৎসালয়ত ভৰ্তি কৰোৱা হৈছে। গেছৰ প্ৰভাৱত বহু পোহনীয়া জন্তু আৰু বিপথগামী কুকুৰৰো মৃত্যু হৈছে।

সোমবাৰে নিশা বেৱাৰ থানাৰ বদিয়া অঞ্চলত অৱস্থিত সুনীল ট্ৰেডিং কোম্পানীত সংঘটিত হয় এই ঘটনা। গোটেই নিশাটো গেছ নিয়ন্ত্ৰণ কৰিবলৈ চেষ্টা কৰি থকা কোম্পানীটোৰ স্বত্বাধিকাৰী সুনীল সিংঘলৰ এই দুৰ্ঘটনাত মৃত্যু হয়। এই সময়ছোৱাত তেওঁৰ স্বাস্থ্যৰ অৱনতি ঘটে। ইয়াৰ পিছত তেওঁক আজমেৰলৈ প্ৰেৰণ কৰা হয়। সোমবাৰে নিশাই তেওঁৰ মৃত্যু হয়। মঙলবাৰে পুৱা আন এগৰাকী ভুক্তভোগী নৰেন্দ্ৰ সোলংকিৰো চিকিৎসাৰ সময়ত মৃত্যু হয়। জে এল এন হাস্পতালত এতিয়াও দুজন লোক আই চি ইউত আছে আৰু এজন গেছ ট্ৰেজেডীৰ ভুক্তভোগী সাধাৰণ ৱাৰ্ডত চিকিৎসাধীন হৈ আছে।

তথ্য অনুসৰি কোম্পানীটোৰ গুদামত ৰখাই থোৱা এখন টেংকাৰৰ পৰা নাইট্ৰ’জেন গেছ নিৰ্গত হয়। লিকেজ ইমানেই দ্ৰুত আছিল যে কেইছেকেণ্ডমানৰ ভিতৰতে গেছটো চাৰিওফালৰ আৱাসিক অঞ্চললৈ বিয়পি পৰিছিল। ঘৰৰ ভিতৰত উপস্থিত থকা লোকসকলো ইয়াৰ দ্বাৰা প্ৰভাৱিত হৈছিল। শ্বাসৰুদ্ধ হোৱাৰ উপৰিও চকুত জ্বলা-পোৰাৰ সংবেদনও ভুগিছিল। ঘটনাস্থলীত উপস্থিত হোৱা আৰক্ষী আৰু প্ৰশাসনৰ বিষয়াই নিহতক চিকিৎসালয়লৈ লৈ যায়। তথ্য লাভ কৰাৰ লগে লগে আৰক্ষী, প্ৰশাসন আৰু অগ্নিনিৰ্বাপক বাহিনীৰ দল সেই স্থানত উপস্থিত হয় আৰু নিশাৰ ভিতৰতে গেছ নিৰ্গত হোৱাটো নিয়ন্ত্ৰণলৈ অনা হয়। সতৰ্কতামূলক ব্যৱস্থা হিচাপে কাৰখানাটোৰ আশে-পাশে থকা অঞ্চলটো খালী কৰা হয়। এতিয়াও স্থানীয় ৰাইজৰ মাজত আতংকৰ পৰিবেশ বিৰাজ কৰি আছে। কালেক্টৰ ডাঃ মহেন্দ্ৰ খাদগাৱটে ফেক্টৰীটো ছীল কৰিবলৈ নিৰ্দেশ দিছে। তৎকালীনভাৱে কাৰ্যকৰী হোৱাকৈ গোচৰ পঞ্জীয়ন কৰিবলৈ আৰক্ষীক নিৰ্দেশ দিয়া বুলিও তেওঁ কয়।

हिन्दुस्थान समाचार / মনোজ কুমাৰ শইকীয়া