গুৱাহাটী, ০১ এপ্ৰিল (হি.স.)। বাংলাদেশৰ অন্তৱৰ্তীকালীন চৰকাৰৰ মুৰব্বী মহম্মদ ইউনুছে উত্তৰ পূৱৰ যোগাযোগ স্থিতিক লৈ দিয়া বক্তব্যক তীব্ৰ গৰিহণা দিছে অসমৰ মুখ্যমন্ত্ৰী ড০ হিমন্ত বিশ্ব শৰ্মাই। এই বক্তব্যত ইউনুছে উত্তৰ-পূব ভাৰতৰ সাতখন ৰাজ্যক ‘ভূমি আবদ্ধ’ আৰু বাংলাদেশক তেওঁলোকৰ সাগৰীয় পথৰ ৰক্ষক বুলি অভিহিত কৰিছে। ইয়াক আপত্তিজনক আৰু অগ্ৰাহ্য বুলি অভিহিত কৰে মুখ্যমন্ত্ৰীয়ে।

মঙলবাৰে মুখ্যমন্ত্ৰীয়ে ছ’চিয়েল মিডিয়াত মহম্মদ ইউনুছৰ এই বক্তব্যক লৈ তীব্ৰ প্ৰতিক্ৰিয়া প্ৰকাশ কৰে। মুখ্যমন্ত্রী ড০ শর্মাই কয় যে এই বিবৃতিটোৱে ভাৰতৰ কৌশলগত ‘চিকেন নেক’ কৰিডৰৰ সংবেদনশীলতাক প্রতিফলিত কৰিছে ৷ ঐতিহাসিকভাৱে দেশৰ ভিতৰৰ একাংশ উপাদানেও এই কৰিড’ৰ ভাঙি উত্তৰ-পূবক মূল ভূখণ্ডৰ পৰা পৃথক কৰাৰ কথা কৈছে, যিটো নিৰাপত্তাজনিত চিন্তনীয় বিষয় ৷ তেওঁ অঞ্চলটোত শক্তিশালী ৰে’ল আৰু পথ নেটৱৰ্ক গঢ়ি তোলাৰ প্ৰয়োজনীয়তাৰ ওপৰত গুৰুত্ব আৰোপ কৰে। তেওঁ কয় যে চিকেন নেক কৰিডৰ আৰু ইয়াৰ আশে-পাশে উন্নত সংযোগৰ বাবে নতুন আন্তঃগাঁথনি নিৰ্মাণ কৰাটো প্ৰয়োজনীয়। ইয়াৰ উপৰিও বিকল্প পথসমূহো অন্বেষণ কৰিব লাগিব যিয়ে এই কৰিডৰৰ ওপৰত নিৰ্ভৰশীলতা হ্ৰাস কৰিব পাৰে।

মুখ্যমন্ত্ৰীয়ে কয় যে এইটো নিশ্চিতভাৱে প্ৰত্যাহ্বানমূলক, কিন্তু সঠিক কৌশল আৰু উদ্ভাৱনৰ জৰিয়তে ইয়াক সম্ভৱ কৰি তুলিব পৰা যাব। তেওঁ কেন্দ্ৰীয় চৰকাৰৰ পৰা দাবী জনায় যে মহম্মদ ইউনুছৰ এই উচটনিমূলক বক্তব্যক সহজভাৱে ল’ব নালাগে, কাৰণ ইয়াত গভীৰ কৌশলগত উদ্দেশ্য আৰু দীৰ্ঘদিনীয়া এজেণ্ডা প্ৰতিফলিত হৈছে।

हिन्दुस्थान समाचार / Monoj Kumar Saikia