-মৃতকৰ ভিতৰত চাৰিটা শিশু আৰু এজন বৃদ্ধ ব্যক্তিও আছে

কলকাতা, ০১ এপ্ৰিল (হি.স.)। পশ্চিম বংগৰ দক্ষিণ ২৪ পৰগনা জিলাৰ পথাৰপ্ৰতিমা অঞ্চলৰ এটা ফটকা কাৰখানাত সোমবাৰে নিশা সংঘটিত হয় এক বৃহৎ বিস্ফোৰণ। যাৰ বাবে একেটা পৰিয়ালৰ আঠজন সদস্যৰ মৃত্যু হয়। নিহতসকলৰ ভিতৰত চাৰিটা শিশুও আছে, ইয়াৰে দুটাৰ বয়স এবছৰতকৈও কম। ঘটনাৰ পিছত প্ৰশাসনৰ ভূমিকাক লৈ প্ৰশ্ন উত্থাপন হৈছে। স্থানীয় লোকে অভিযোগ কৰে যে সেই ঘৰটোত দীৰ্ঘদিন ধৰি অবৈধ ফটকা নিৰ্মাণ হৈ আছিল।

সোমবাৰে নিশা পাথৰপ্ৰতিমাৰ ধোলাহাট থানা এলেকাৰ অন্তৰ্গত দক্ষিণ ৰায়পুৰ অঞ্চলত তীব্ৰ বিস্ফোৰণৰ সৈতে অগ্নিকাণ্ড সংঘটিত হয়। বিস্ফোৰণৰ ফলত ঘৰটোত অগ্নিকাণ্ড সংঘটিত হয় আৰু পৰিয়ালটোৰ ৮ জন সদস্যৰ থিতাতে মৃত্যু হয়। মৃত লোক কেইজনৰ ভিতৰত আছে ৬৫ বছৰীয়া অৰবিন্দ বানিক, ৮০ বছৰীয়া প্ৰভাৱতী বানিক, ২৮ বছৰীয়া সান্ত্বনা বানিক, ৯ বছৰীয়া অৰ্ণব বানিক, ৮ মহীয়া অস্মিতা বানিক, ছয় বছৰীয়া অনুষ্কা বানিক আৰু ছমহীয়া অংকিত বানিক। ইফালে তুষাৰ বানিকৰ পত্নী ৰূপা বানিক গুৰুতৰভাৱে অগ্নিদগ্ধ হয় যদিও পিছত তেওঁৰো মৃত্যু হয়।

স্থানীয় ৰাইজৰ মতে, এই ঘৰত দীৰ্ঘদিন ধৰি ফটকা নিৰ্মাণ হৈ আছিল। কিন্তু প্ৰশাসনে কয় যে পৰিয়ালটোৰ সেউজীয়া ফটকা (পৰিৱেশ অনুকূল ফটকা) নিৰ্মাণৰ অনুজ্ঞাপত্ৰ আছিল। তথাপিও এই অনুজ্ঞাপত্ৰৰ আৱৰণত অবৈধ ফটকা নিৰ্মাণ কৰা হৈছিল বুলি অঞ্চলটোৰ লোকসকলে সন্দেহ প্ৰকাশ কৰিছে। দুৰ্ঘটনাৰ পিছত প্ৰশাসন আৰু আৰক্ষীৰ ভূমিকাক লৈ ক্ষোভৰ সৃষ্টি হৈছে। মানুহে কয় যে যদি এই অবৈধ ফটকা নিৰ্মাণৰ কাম আগতে বন্ধ কৰা হ’লহেঁতেন তেন্তে এই দুৰ্ঘটনা এৰাই চলিব পৰা গ’লহেঁতেন। এই বিষয়ত প্ৰতিক্ৰিয়াৰ বাবে কেইবাবাৰো জিলা আৰক্ষী বিষয়াৰ সৈতে যোগাযোগ কৰা হৈছিল যদিও সকলোৱে মৌনতা অৱলম্বন কৰিছিল।

ইফালে, মঙলবাৰে পুৱা অঞ্চলটোৰ বিধায়ক সমীৰ জানাই কয় যে পৰিয়ালটোৰ বৈধ অনুজ্ঞাপত্ৰ আছে আৰু ফটকা ঘৰৰ পৰা আঁতৰত থকা ঠাইত নিৰ্মাণ কৰা হৈছিল যদিও ঘৰটোতো কিছু ফটকা ৰখাৰ ফলত দুৰ্ঘটনা সংঘটিত হয়। ঘটনাৰ লগে লগে উদ্ধাৰ হয় ৬ জন লোকৰ মৃতদেহ। ফৰেনছিক বিশেষজ্ঞৰ এটা দল উপস্থিত হৈ ঘটনাৰ তদন্ত কৰি নমুনা সংগ্ৰহ কৰি বিস্ফোৰণৰ কাৰণ জানিব পাৰিব। প্ৰশাসনে এই সন্দৰ্ভত পুংখানুপুংখ তদন্তৰ নিৰ্দেশ দিছে।

হিন্দুস্থান সমাচাৰ / মনোজ কুমাৰ শইকীয়া