কাঠমাণ্ডু, ৩১ মাৰ্চ (হি.স.)। শুকুৰবাৰে কাঠমাণ্ডুত সংঘটিত হিংসাত্মক সংঘৰ্ষ, অগ্নিসংযোগ আৰু দুজন লোকৰ মৃত্যুৰ বাবে দায়ীসকলৰ বিৰুদ্ধে আইনী ব্যৱস্থা গ্ৰহণৰ সকীয়াই দিয়ে নেপালৰ প্ৰধানমন্ত্ৰী কে পি শৰ্মা অলিয়ে। তেওঁ কয় যে প্ৰাক্তন ৰজা জ্ঞানেন্দ্ৰ শ্বাহে সংবিধান আৰু আইন উলংঘা কৰিছে। অলিয়ে কয় যে প্ৰাক্তন ৰজাই নিজকে দেশৰ সংবিধান আৰু আইনতকৈ ওপৰত বুলি গণ্য কৰে, যাৰ বাবে তেওঁ মূল্য দিব লাগিব।
সোমবাৰে সংসদৰ প্ৰতিনিধি সদনত সম্বোধন কৰি প্ৰধানমন্ত্ৰী অলিয়ে কয় যে প্ৰথমে সাধাৰণ ৰাইজক শাসন ব্যৱস্থা সলনি কৰিবলৈ তেওঁক সমৰ্থন কৰিবলৈ ভিডিঅ’ বাৰ্তা প্ৰেৰণ কৰা আৰু তাৰ পিছত ৰাজপথত হাজাৰ হাজাৰ লোকক একত্ৰিত কৰি তেওঁক আদৰণি জনোৱাটো আইনগতভাৱে ভুল। প্ৰধানমন্ত্ৰীয়ে কয় যে যিখন সংবিধানৰ অধীনত তেওঁক এতিয়াও জাতিৰ প্ৰাক্তন মুৰব্বী হিচাপে চৰকাৰী সকলো সা-সুবিধা আৰু নিৰাপত্তা দিয়া হৈছে, সেইখন সংবিধানৰ বিৰুদ্ধে তেওঁ মানুহক উচটনি দিছে।
প্ৰধানমন্ত্ৰী অলিয়ে কয় যে শুকুৰবাৰে কাঠমাণ্ডুত সংঘটিত হিংসা, অগ্নিসংযোগ, লুণ্ঠন আৰু জীৱিত সাংবাদিকক জ্বলাই দিয়াৰ বাবে কেৱল প্ৰাক্তন ৰজা জ্ঞানেন্দ্ৰই দায়ী আৰু তাৰ মূল্য তেওঁ দিব লাগিব। অলিয়ে কয় যে এই সকলোবোৰ ঘটনাৰ বাবে সাধাৰণ নাগৰিকৰ দৰেই পূৰ্বৰ ৰজাৰ বিৰুদ্ধেও আইনী ব্যৱস্থা গ্ৰহণ কৰিব লাগিব।
हिन्दुस्थान समाचार / মনোজ কুমাৰ শইকীয়া
