–সুৰক্ষা আৰু স্বাচ্ছন্দ্য বৃদ্ধি
গুৱাহাটী, ৩১ মাৰ্চ (হি.স.)। উত্তৰ-পূব সীমান্ত ৰে'লৱেই বালুৰঘাট-হাওড়া এক্সপ্ৰেছৰ বাবে এলএইচবি (লিংক হফমান বুছ) ডবা প্ৰৱৰ্তন কৰিছে,যি যাত্ৰীসকলৰ সুৰক্ষা আৰু স্বাচ্ছন্দ্য বৃদ্ধি কৰে। এই উন্নীত ৰে'লখন ৩০ মাৰ্চ,২০২৫ তাৰিখে বালুৰঘাট ৰে'ল ষ্টেচনত কেন্দ্ৰীয় ৰাজ্যিক শিক্ষা আৰু উত্তৰ-পূৰ্ব্বাঞ্চলৰ উন্নয়ন মন্ত্ৰী, ড০ সুকান্ত মজুমদাৰ, বুধৰায় টুডু, সদস্য পশ্চিম বংগ বিধান সভা আৰু ৰেলৱেৰ জ্যেষ্ঠ বিষয়াবৰ্গৰ দ্বাৰা শুভাৰম্ভ কৰা হয়।
ড০ মজুমদাৰে তেওঁৰ ভাষণত পশ্চিমবংগত ৰে'লৰ আন্তঃগাঁথনি উন্নত কৰাৰ ক্ষেত্ৰত চৰকাৰৰ সমৰ্পণৰ কথা উল্লেখ কৰে।তেওঁ গুৰুত্ব আৰোপ কৰে যে বালুৰ ঘাটৰপৰা যাত্ৰা আৰম্ভ কৰা ৰে'লসমূহত এল এইচ বি ডবা প্ৰৱৰ্তন কৰাৰ পৰিণাম স্বৰূপে ৰে'ল সংযোগ যথেষ্ট বৃদ্ধি পাব আৰু অঞ্চলটোৰ আৰ্থ-সামাজিক বিকাশত অৰিহণা যোগাব।
পৰম্পৰাগত আইচিএফ ডবাৰ পৰিৱৰ্তে এলএইচবি ডবালৈ পৰিৱৰ্তন ৰেল বিকাশৰ এক গুৰুত্বপূৰ্ণ সফলতা হিচাপে পৰিগণিত কৰে। এই আধুনিক ডবাসমূহ বৰ্ধিত সুৰক্ষা সুবিধা প্ৰদান কৰাৰ বাবে নিৰ্মাণ কৰা হৈছে, যাৰ ভিতৰত আছে এক এন্টি-টেলিস্কোপিক গাঁথনি যি সংঘৰ্ষৰ ক্ষেত্ৰত গুৰুতৰ ক্ষতি প্ৰতিহত কৰিব পাৰে। উন্নত চাচপেনশ্বন প্ৰণালীৰ বাবে যাত্ৰীসকলে অধিক আৰাম অনুভৱ কৰিব পাৰিব যি এক সুগম যাত্ৰা নিশ্চিত কৰে। ইয়াৰ উপৰিও, এলএইচবি ডবাসমূহউচ্চ গতিত পৰিচালন কৰিবলৈ সক্ষম, যি ভ্ৰমণৰ সময় হ্ৰাস কৰে আৰু এক মনোৰম ভ্ৰমণৰ অভিজ্ঞতাৰ বাবে নান্দনিকভাৱে উন্নত ইন্টেৰিয়ৰ প্ৰদান কৰে।
যাত্ৰীসকলে এতিয়া এক সুৰক্ষিত আৰু অধিক আৰামদায়ক যাত্ৰাৰ বাবে অপেক্ষা কৰিব পাৰিব, কিয়নো এলএইচবি ডবাসমূহ আধুনিক সুবিধাৰে সজ্জিত আৰু দুৰ্ঘটনাৰ প্ৰভাৱ হ্ৰাস কৰাৰ বাবে নিৰ্মাণ কৰা হৈছে। এই পদক্ষেপে যাত্ৰীৰ সুৰক্ষা আৰু সেৱাৰ উৎকৰ্ষতাৰ প্ৰতি ভাৰতীয় ৰে'লৱেৰ দৃঢ় প্ৰতিশ্ৰুতিৰ ওপৰতে গুৰুত্ব আৰোপ কৰিছে।
হিন্দুস্থান সমাচাৰ / আলোক চক্ৰৱৰ্তী
