জেনেভা, ০১ ডিচেম্বৰ (হি.স.)। বিশ্বজুৰি মানৱ অধিকাৰ সংগঠন আৰু প্ৰব্ৰজনকাৰী সম্প্ৰদায়ে বাংলাদেশত সংখ্যালঘুৰ ওপৰত বৃদ্ধি পোৱা হিংসাত্মক আক্ৰমণ আৰু নিৰ্যাতনৰ বিষয়টো উত্থাপন কৰিছে। ৰাষ্ট্ৰসংঘৰ সংখ্যালঘু বিষয়ৰ মানৱ অধিকাৰ পৰিষদৰ মুখ্য কাৰ্যালয়ত অনুষ্ঠিত হোৱা ১৮ সংখ্যক অধিবেশনত অংশগ্ৰহণ কৰি এই সংগঠনসমূহৰ প্ৰতিনিধিয়ে বাংলাদেশত হিন্দু, বৌদ্ধ, খ্ৰীষ্টান, আৰু জনজাতীয় গোটসমূহৰ ওপৰত আক্ৰমণৰ বিশদ বিৱৰণ দাঙি ধৰি উদ্বেগ প্ৰকাশ কৰে। সকলো সংগঠনে ৰাষ্ট্ৰসংঘক শীঘ্ৰে হস্তক্ষেপ কৰি বাংলাদেশৰ সংখ্যালঘুসকলৰ সুৰক্ষা নিশ্চিত কৰিবলৈ আহ্বান জনায়।
অধিবেশনত নিজৰ মতামত দাখিল কৰা সংস্থাসমূহৰ ভিতৰত আছিল ব্যুৰো অৱ হিউমেন ৰাইটছ এণ্ড জাষ্টিছ (বি এইচ আৰ জে), কেয়াৰছ গ্ল’বেল, নাইছ ফাউণ্ডেশ্যন, হিউমেন ৰাইটছ কংগ্ৰেছ ফৰ বাংলাদেশ (এইচ আৰ চি বি এম), ফ্ৰান্সৰ জাষ্টিছ মেকাৰছ বাংলাদেশ (জে এম বি এফ), ছুইজাৰলেণ্ডৰ চেকুলাৰ বাংলাদেশী প্ৰব্ৰজনকাৰী, গ্ল’বেল ডাইস্পোৰা কমিউনিটি (বাংলাদেশ), অল ইউৰোপিয়ান মুক্তি যোদ্ধা সংগঠন, ইণ্টাৰনেশ্যনেল ফ’ৰাম ফৰ চেকুলাৰ বাংলাদেশ (ছুইটজাৰলেণ্ড), প্ৰ’বাছি টাংগাইল কালচাৰ ফ্ৰেংকফৰ্ট, আৰু অন্যান্য।
বক্তাসকলে কয় যে ১৯৭১ চনত স্বাধীনতাৰ পিছৰে পৰা বাংলাদেশৰ সংখ্যালঘু সম্প্ৰদায়সমূহে সামাজিক আৰু প্ৰশাসনিক বৈষম্যৰ সন্মুখীন হৈ আহিছে যদিও ২০২৪ চনৰ পৰা পৰিস্থিতি অধিক ভয়াৱহ হৈ পৰিছে। ২০২৪ চনৰ আগষ্ট মাহত হাছিনা চৰকাৰৰ পতনৰ পিছত অধ্যাপক মহম্মদ ইউনুছৰ নেতৃত্বত অন্তৱৰ্তীকালীন চৰকাৰৰ অধীনত উগ্ৰ উপাদানৰ প্ৰভাৱত সংখ্যালঘুসকলৰ সুৰক্ষা আৰু অধিক দুৰ্বল হৈ পৰিছে।
মানৱ অধিকাৰ সংগঠনৰ মতে, যোৱা এটা বছৰত ১৫৪ জন হিন্দুক হত্যা, ১৯৭ গৰাকী মহিলা ধৰ্ষণ, হাজাৰ হাজাৰ ঘৰ-দুৱাৰ আৰু ব্যৱসায়িক প্ৰতিষ্ঠানত আক্ৰমণ, ভাঙি-ছিঙি, জুই লগাই দিয়া হৈছে। শ শ মন্দিৰ আৰু গীৰ্জাক লক্ষ্য কৰি লোৱা হৈছিল। ২০২৪ চনৰ ছেপ্টেম্বৰ মাহত খাগ্ৰাজাৰী আৰু ৰঙামাটিত পাহাৰীয়া জনজাতিসকলৰ ওপৰত আক্ৰমণৰ ফলত ছয়জন লোকৰ মৃত্যু হোৱাৰ লগতে এশৰো অধিক লোক আহত হোৱাৰ বিপৰীতে ৩৭৫খনতকৈও অধিক দোকান লুটপাত হয়।
প্ৰতিনিধিসকলে অভিযোগ কৰে যে অন্তৱৰ্তীকালীন চৰকাৰৰ কাৰ্যকালত হিন্দু বিষয়া আৰু শিক্ষকসকলক চৰকাৰী পদৰ পৰা পদ্ধতিগতভাৱে অপসাৰণ কৰা হৈছিল। কেইবাজনো জ্যেষ্ঠ বিষয়া আৰু ১৬৯ জনতকৈ অধিক শিক্ষকক পদত্যাগ কৰিবলৈ বাধ্য হোৱা বা সেৱাৰ পৰা বৰ্খাস্ত কৰাৰ কাণ্ডৰ ওপৰত আলোকপাত কৰা হয়। আৰক্ষী বিভাগৰ পৰা হিন্দু বিষয়াক অপসাৰণ কৰাৰো খবৰ ওলাইছিল।
সাংস্কৃতিক স্বাধীনতাৰ ওপৰত বৃদ্ধি পোৱা বাধাক লৈও সন্মিলনখনে গুৰুতৰ উদ্বেগ প্ৰকাশ কৰে। বক্তাসকলে জনোৱা মতে, সংগীত, নৃত্য, আৰু সাংস্কৃতিক অনুষ্ঠানত বাধা দিয়া হৈছে, আৰু শিল্পী আৰু লেখকক আক্ৰমণ কৰা হৈছে। তদুপৰি ইস্কনৰ সৈতে জড়িত চিন্ময় কৃষ্ণ দাস প্ৰভুক অভিযোগ নোহোৱাকৈ এবছৰতকৈও অধিক সময় কাৰাগাৰত ৰখাৰ বিষয়টোও তীব্ৰভাৱে উত্থাপন কৰা হয়।
বি এইচ আৰ জেৰ সভাপতি দিপন মিত্ৰই উল্লেখ কৰে যে বাংলাদেশত সংখ্যালঘু জনসংখ্যাক তেওঁলোকৰ ধৰ্মীয় পৰিচয়ৰ ভিত্তিত নিৰ্মূল কৰা হৈছে। তেওঁ চিন্ময় কৃষ্ণ দাস প্ৰভুক শীঘ্ৰে মুকলি কৰি দিয়াৰ লগতে ঈশ্বৰ নিন্দা কৰাৰ ভুৱা অভিযোগত আক্ৰমণ বন্ধ কৰাৰ দাবী জনায়।
এইচ আৰ চি বি এমৰ জয়া বৰ্মনে উল্লেখ কৰে যে ১৯৭১ চনত ৩০% সংখ্যালঘু জনসংখ্যা আজি ৯%তকৈও কমলৈ হ্ৰাস পাইছে, মূলতঃ ৰাজ্যিক পৰ্যায়ৰ বৈষম্যৰ বাবে। সংগঠনটোৱে ২০২২ চনত সংখ্যালঘুৰ ওপৰত হোৱা অত্যাচাৰৰ বিশদ নথি-পত্ৰ আন্তঃৰাষ্ট্ৰীয় অপৰাধ আদালতত দাখিল কৰিছিল।
हिन्दुस्थान समाचार / অৰৱিন্দ
