নতুন দিল্লী, ০৮ জানুৱাৰী (হি.স.)। আন্তঃগাঁথনি, সেউজ শক্তি আৰু আঞ্চলিক উন্নয়নৰ প্ৰসাৰৰ লক্ষ্যৰে অন্ধ্ৰ প্ৰদেশৰ বিশাখাপট্টনমত বুধবাৰে প্ৰধানমন্ত্ৰী নৰেন্দ্ৰ মোদীয়ে দুই লাখ কোটিৰো অধিক মূল্যৰ বিভিন্ন প্ৰকল্পৰ শুভাৰম্ভ আৰু আধাৰশিলা স্থাপন কৰে।
এই উপলক্ষে প্ৰধানমন্ত্ৰী মোদীয়ে কয় যে আমাৰ অন্ধ্ৰপ্ৰদেশ এখন সম্ভাৱনা আৰু সুযোগৰ সৃষ্টিৰ ৰাজ্য। যেতিয়া অন্ধ্ৰৰ এই সম্ভাৱনাসমূহ বাস্তৱায়িত হ’ব, তেতিয়া অন্ধ্ৰ প্ৰদেশো উন্নত হ’ব আৰু তেতিয়াহে ভাৰতো এখন উন্নত ৰাষ্ট্ৰ হ’ব। গতিকে অন্ধ্ৰ প্ৰদেশৰ উন্নয়ন আমাৰ দৃষ্টিভংগী আৰু অন্ধ্ৰ প্ৰদেশৰ জনসাধাৰণৰ প্ৰতি সেৱা আমাৰ সংকল্প। তেওঁ কয় যে অন্ধ্ৰপ্ৰদেশ ইয়াৰ উদ্ভাৱনী স্বভাৱৰ বাবেই তথ্য-প্ৰযুক্তি আৰু প্ৰযুক্তিৰ ইমান ডাঙৰ কেন্দ্ৰ। এতিয়া অন্ধ্ৰ ভৱিষ্যতৰ প্ৰযুক্তিবিদ্যাৰ কেন্দ্ৰবিন্দু হোৱাৰ সময়।
তেওঁ কয় যে অন্ধ্ৰ প্ৰদেশে ২০৪৭ চনৰ ভিতৰত ৰাজ্যখনক ২.৫ ট্ৰিলিয়ন ডলাৰৰ অৰ্থনীতি হিচাপে গঢ়ি তোলাৰ লক্ষ্য নিৰ্ধাৰণ কৰিছে। এই লক্ষ্যত উপনীত হ’বলৈ চন্দ্ৰবাবু নাইডুৰ চৰকাৰে আৰম্ভ কৰিছে স্বৰ্ণ অন্ধ্ৰ @২০৪৭। ইয়াত কেন্দ্ৰৰ এন ডি এ চৰকাৰে ৰাজ্যখনক সম্পূৰ্ণ সহায় আগবঢ়াব। গতিকে কোটি কোটি টকাৰ প্ৰকল্প দিয়াৰ ক্ষেত্ৰত অন্ধ্ৰ প্ৰদেশক অগ্ৰাধিকাৰ দিছে কেন্দ্ৰীয় চৰকাৰে।
প্ৰধানমন্ত্ৰীয়ে কয় যে অন্ধ্ৰপ্ৰদেশ ইয়াৰ উদ্ভাৱনী মনোভাৱৰ বাবেই তথ্য-প্ৰযুক্তি আৰু প্ৰযুক্তিৰ এক প্ৰধান কেন্দ্ৰ। এতিয়া অন্ধ্ৰপ্ৰদেশ নতুন, ভৱিষ্যতৰ প্ৰযুক্তিৰ কেন্দ্ৰবিন্দু হোৱাৰ সময়। আমি উদীয়মান প্ৰযুক্তিৰ ক্ষেত্ৰত অগ্ৰণী ভূমিকা ল’ব লাগিব, যেনে সেউজ হাইড্ৰ’জেনৰ ব্যৱহাৰ, যিটো ভৱিষ্যতৰ এক গুৰুত্বপূৰ্ণ ক্ষেত্ৰ।
তেওঁ কয় যে ২০২৩ চনত ৰাষ্ট্ৰীয় সেউজ হাইড্ৰজেন অভিযান আৰম্ভ কৰা হৈছিল। ২০৩০ চনৰ ভিতৰত ৫০ লাখ মেট্ৰিক টন সেউজ হাইড্ৰজেন উৎপাদন কৰাৰ লক্ষ্য ৰাখিছো। ইয়াৰ বাবে প্ৰথম অৱস্থাত দুটা সেউজ হাইড্ৰজেন হাব আৰম্ভ কৰা হ’ব। ইয়াৰে এটা হাব বিশাখাপট্টনমত স্থাপন কৰা হ’ব।
প্ৰধানমন্ত্ৰীয়ে কয় যে আমাৰ চৰকাৰে নগৰায়নক সুযোগ হিচাপে লয়। আমি অন্ধ্ৰপ্ৰদেশক নতুন যুগৰ নগৰায়নৰ নিদৰ্শন হিচাপে গঢ়ি তুলিব বিচাৰো। এই সপোন পূৰণৰ বাবে আজি কৃষ্ণপট্টনম ঔদ্যোগিক চহৰ (ক্ৰিছ চিটি)ৰ আধাৰশিলা স্থাপন কৰা হৈছে।
তেওঁ কয় যে আমি সাগৰৰ সৈতে জড়িত সুযোগসমূহ সম্পূৰ্ণৰূপে ব্যৱহাৰ কৰিবলৈ মিছন মোডত ব্লু ইকনমিক প্ৰচাৰ কৰিছো। অন্ধ্ৰত মীন পালনৰ লগত জড়িত আমাৰ ভাই-ভনীসকলৰ উপাৰ্জন আৰু ব্যৱসায় বৃদ্ধি হোৱা উচিত। আমি সম্পূৰ্ণ সংবেদনশীলতাৰে এই দিশত কাম কৰি আছো। আমি মাছমৰীয়াসকলক কিষাণ ক্ৰেডিট কাৰ্ডৰ দৰে সুবিধা প্ৰদান কৰিছো। সাগৰত সুৰক্ষাৰ বাবেও আমি গুৰুত্বপূৰ্ণ পদক্ষেপ গ্ৰহণ কৰিছো।
এই উপলক্ষে প্ৰধানমন্ত্ৰীৰ সৈতে মঞ্চত অন্ধ্ৰপ্ৰদেশৰ মুখ্যমন্ত্ৰী এন. চন্দ্ৰবাবু নাইডু, উপ-মুখ্যমন্ত্ৰী পৱন কল্যাণকে ধৰি বহু বিশিষ্ট ব্যক্তি উপস্থিত থাকে। প্ৰকল্পসমূহ আৰম্ভ কৰাৰ পূৰ্বে প্ৰধানমন্ত্ৰীয়ে নাইডু আৰু কল্যাণৰ সৈতে ছিৰিপুৰম জংচনৰ পৰা বিশাখাপট্টনমৰ অন্ধ্ৰ বিশ্ববিদ্যালয় খেলপথাৰলৈ ৰোড শ্ব’ অনুষ্ঠিত কৰে।
হিন্দুস্থান সমাচাৰ / মনোজ কুমাৰ শইকীয়া
