ইছলামাবাদ, ০৪ জানুৱাৰী (হি.স.)। পাকিস্তানৰ অস্থিৰ খাইবাৰ পখতুনখোৱা প্ৰদেশৰ কুৰ্ৰম জিলাৰ উপ আয়ুক্ত জাভেদুল্লাহ মেহছুদ আজি বাগান অঞ্চলত গুলীচালনাত আহত হয়। জিলাখনৰ দুটা জনজাতীয় সংগঠনৰ মাজত সশস্ত্ৰ সংঘাতৰ অন্ত পেলোৱাৰ ক্ষেত্ৰত উপ আয়ুক্ত মেহছুদে গুৰুত্বপূৰ্ণ ভূমিকা পালন কৰি আছে।
জিঅ’ নিউজ চেনেলৰ খবৰ অনুসৰি যোৱা ১ জানুৱাৰীত বাগান অঞ্চলত যুদ্ধংদেহী জনজাতিসমূহৰ মাজত হোৱা শান্তি চুক্তিৰ পিছত আজি পুনৰ অশান্ত অঞ্চলটোত হিংসাত্মক পৰিস্থিতিৰ সৃষ্টি হয়। অঞ্চলটোত শান্তি ঘূৰাই অনাৰ প্ৰচেষ্টাত গুৰুত্বপূৰ্ণ ভূমিকা গ্ৰহণ কৰা উপাযুক্ত গৰাকীক চিকিৎসালয়লৈ লৈ যোৱা হৈছে।
জানিব পৰা মতে, জিলা উপাযুক্ত মেহছুদৰ নেতৃত্বত অত্যাৱশ্যকীয় সামগ্ৰী কঢ়িয়াই অনা বাহনৰ কনভয় আজি পাৰাচিনাৰলৈ ৰাওনা হৈছে। কনভয় তাল-পাৰাচিনাৰ পথত উপস্থিত হোৱাৰ লগে লগে কনভয়ৰ ওপৰত হোৱা গুলীচালনাত আহত হয় মেহছুদ। মন কৰিবলগীয়া যে ১ জানুৱাৰীত স্বাক্ষৰিত শান্তি চুক্তিৰ পিছত সকলো পক্ষই পাৰাচিনাৰলৈ সাহায্য প্ৰেৰণ কৰিবলৈ সন্মত হৈছিল।
এই গুলীচালনাৰ ঘটনা সন্দৰ্ভত খাইবাৰ পখতুনখোৱাৰ মুখ্য সম্পাদক নদীম আছলাম চৌধুৰীয়ে কয় যে কনভয়ৰ নিৰাপত্তা নিশ্চিত কৰাৰ লগতে চুক্তিসমূহ মানি চলাটো নিশ্চিত কৰাৰ বাবে শান্তি সমিতিসমূহৰ দায়িত্ব আছে। এই সমিতিসমূহত স্থানীয় বাসিন্দা, জনজাতীয় বয়োজ্যেষ্ঠ আৰু সকলো সম্প্ৰদায় আৰু সম্প্ৰদায়ক প্ৰতিনিধিত্ব কৰা ৰাজনৈতিক নেতাসকল অন্তৰ্ভুক্ত কৰা হৈছে।
চৰকাৰী সূত্ৰই প্ৰকাশ কৰা অনুসৰি স্থানীয় বাসিন্দাসকলে পৰ্যায়ক্ৰমে ১৫ দিনৰ ভিতৰত অস্ত্ৰ-শস্ত্ৰ গতাই দিয়াৰ প্ৰতিশ্ৰুতি দিছে। এমাহৰ ভিতৰত বাংকাৰসমূহ ধ্বংস কৰাৰ লক্ষ্য। এই জিলাখনত যুদ্ধবিৰতি কাৰ্যকৰী কৰাৰ বাবে জিৰগাত দীৰ্ঘদিনীয়া আলোচনা চলি আহিছে। যোৱা ২২ নৱেম্বৰৰ পৰা কুৰৰাম জিলাৰ আলিজাই আৰু বাগান জনজাতীয় সংগঠনৰ মাজত সংঘৰ্ষ আৰম্ভ হৈছিল, য’ত পাৰাচিনাৰৰ সমীপত যাত্ৰীবাহী ভ্যানৰ কনভয় আক্ৰমণ কৰা হৈছিল। এই আক্ৰমণত ৪৭ জন লোক নিহত হয়।
हिन्दुस्थान समाचार / মনোজ কুমাৰ শইকীয়া
