নতুন দিল্লী, ১৮ ছেপ্টেম্বৰ (হি.স.)। মাৰ্কেট ৰেগুলেটৰ ছিকিউৰিটিজ এণ্ড এক্সচেঞ্জ ব’ৰ্ড অৱ ইণ্ডিয়াই এখন চাৰ্কুলাৰ জাৰি কৰি সকলো তালিকাভুক্ত কোম্পানীক অভিলেখৰ তাৰিখৰ পিছত সৰ্বাধিক দুটা ব্যৱসায়িক দিনৰ ভিতৰত বোনাছ শ্বেয়াৰ জাৰি কৰিবলৈ নিৰ্দেশ দিছে। বৰ্তমানৰ ব্যৱস্থাত বোনাছ শ্বেয়াৰ ৰেকৰ্ডৰ পৰা প্ৰায় দুসপ্তাহৰ পিছতহে জাৰি কৰা হয়। চাৰ্কুলাৰ খনত স্পষ্ট কৰা হৈছে যে যদি সময়সীমা মানি চলা নহয় তেন্তে ডিফল্ট কৰা কোম্পানীসমূহে জৰিমনা ভৰিব লাগিব।
ছেবিৰ চাৰ্কুলাৰ অনুসৰি এই নিৰ্দেশনা ১ অক্টোবৰৰ পৰা কাৰ্যকৰী হ’ব। কোম্পানীসমূহে বোনাছ শ্বেয়াৰ আৰু লভ্যাংশ জাৰি কৰাৰ অভিলেখ তাৰিখ নিৰ্ধাৰণ কৰে। ৰেকৰ্ড তাৰিখ হ’ল কোম্পানীয়ে নিজৰ শ্বেয়াৰহোল্ডাৰসকলৰ বাবে বোনাছ বা লভ্যাংশৰ বাবে যোগ্যতা নিৰ্ণয় কৰা তাৰিখ। অৰ্থাৎ ৰেকৰ্ড তাৰিখৰ দিনটোত কোম্পানীটোৰ শ্বেয়াৰ শ্বেয়াৰহোল্ডাৰৰ ওচৰত উপলব্ধ হ’ব লাগে। যদিহে শ্বেয়াৰহোল্ডাৰে সেই তাৰিখৰ আগতে নিজৰ শ্বেয়াৰ বিক্ৰী কৰে, বা সেই তাৰিখৰ পিছত কোম্পানীটোৰ শ্বেয়াৰ ক্ৰয় কৰে, তেন্তে তেওঁক বোনাছ বা লভ্যাংশৰ বাবে যোগ্য বুলি গণ্য কৰা নহয়।
ছেবিয়ে নিজৰ চাৰ্কুলাৰত বোনাছ শ্বেয়াৰৰ বাবে টি+২ ট্ৰেডিং ডে’ৰ ব্যৱস্থা কৰিছে। ইয়াত টি ৰ অৰ্থ হৈছে ৰেকৰ্ড তাৰিখ। এই চাৰ্কুলাৰত বোনাছ শ্বেয়াৰ জাৰি কৰাৰ সমগ্ৰ প্ৰক্ৰিয়াৰ তথ্য দি কোৱা হৈছে যে যদি সময়সীমা মানি চলাত কোনো ধৰণৰ পলম হয়, তেন্তে কোম্পানীসমূহে জৰিমনা ভৰিব লাগিব। এই অৰ্থদণ্ড ছেবিয়ে ২০১৯ চনৰ ১৯ আগষ্টত জাৰি কৰা ছেবিৰ চাৰ্কুলাৰৰ অধীনত প্ৰদান কৰিব, য’ত কোৱা হৈছে যে ছেবিৰ মূলধন জাৰি আৰু প্ৰকাশৰ প্ৰয়োজনীয়তা (আইচিডিআৰ) নিয়মাৱলীৰ বিধানসমূহ অমান্য কৰিলে অৰ্থদণ্ড প্ৰদান কৰা হ’ব। বোনাছ শ্বেয়াৰ জাৰি কৰাৰ বাবে মানি চলিবলগীয়া প্ৰক্ৰিয়াৰ বিষয়ে তথ্য দি কোৱা হৈছে যে বোনাছ ইছ্যু কৰা কোম্পানীয়ে ছেবিৰ তালিকাভুক্ত বাধ্যবাধকতা আৰু প্ৰকাশৰ প্ৰয়োজনীয়তা (এল অ’ ডি আৰ)ৰ বিধান ২০১৫ অনুসৰি ইছ্যুৰ অনুমোদনৰ বাবে ষ্টক এক্সচেঞ্জত আবেদন কৰিব। ব’ৰ্ডৰ বৈঠকত বোনাছ ইছ্যু অনুমোদন পোৱাৰ পিছত ৫ ব্যৱসায়িক দিনৰ ভিতৰত এই প্ৰক্ৰিয়া সম্পূৰ্ণ কৰা উচিত। ইয়াৰ পিছত বোনাছ ইছ্যু জাৰি কৰা কোম্পানীয়ে প্ৰস্তাৱিত ইছ্যুৰ ৰেকৰ্ড ডেট নিৰ্ধাৰণ কৰি ষ্টক এক্সচেঞ্জক এই সন্দৰ্ভত অৱগত কৰিব।
ইয়াৰ লগতে ৰেকৰ্ড তাৰিখৰ পৰৱৰ্তী কৰ্মদিনত শ্বেয়াৰ আবণ্টন সম্পৰ্কীয় তথ্যও দিব লাগিব। বোনাছ ইছ্যু কৰা কোম্পানীটোৰ পৰা ৰেকৰ্ড ডেটৰ বিষয়ে আনুষ্ঠানিক তথ্য লাভ কৰাৰ পিছত ষ্টক এক্সচেঞ্জে ৰেকৰ্ড ডেট আৰু বোনাছ শ্বেয়াৰৰ সংখ্যা সম্পৰ্কে জাননী জাৰি কৰিব। বোনাছ শ্বেয়াৰ আবণ্টনৰ তাৰিখো এই অধিসূচনাত উপস্থিত থাকিব। ষ্টক এক্সচেঞ্জৰ দ্বাৰা অধিসূচনা জাৰি কৰাৰ পিছত বোনাছ ইছ্যু কৰা কোম্পানীয়ে ৰেকৰ্ড তাৰিখৰ পিছদিনা সকলো প্ৰাসংগিক নথি-পত্ৰ ডিপজিটৰীত জমা দিব, যাতে বোনাছ শ্বেয়াৰসমূহ ডিপজিটৰী চিষ্টেমত জমা কৰিব পৰা যায়। অৱশেষত বোনাছ ইছ্যুৰ অধীনত আবণ্টিত শ্বেয়াৰসমূহ আবণ্টনৰ পৰৱৰ্তী ব্যৱসায়িক দিনটোত ব্যৱসায়ৰ বাবে উপলব্ধ কৰা হ’ব। ইয়াত যিকোনো ধৰণৰ ত্ৰুটি গ্ৰহণযোগ্য নহ’ব। এই প্ৰক্ৰিয়া উলংঘা কৰা কোম্পানীসমূহে কঠোৰ অৰ্থ দণ্ডৰ সন্মুখীন হ’ব লাগিব।
হিন্দুস্থান সমাচাৰ / মনোজ কুমাৰ শইকীয়া
