নিউয়ৰ্ক, ১৭ এপ্ৰিল (হি.স.)। এগৰাকী পৰ্ণ ষ্টাৰক মুখ বন্ধ কৰি ৰখাৰ অৰ্থে গোপনে ধন দিয়াৰ অভিযোগত মঙলবাৰে পুনৰ নিউয়ৰ্কৰ আদালতত উপস্থিত হয় আমেৰিকাৰ প্ৰাক্তন ৰাষ্ট্ৰপতি ড’নাল্ড ট্ৰাম্প। এই গোচৰৰ শুনানিৰ বাবে জুৰীৰ সদস্য নিৰ্বাচনৰ প্ৰক্ৰিয়া চলি আছে। জুৰীৰ বাৰজন সদস্য আৰু ছয়জন বিকল্প সদস্য নিৰ্বাচন কৰা হ’ব। মানহাটানত এই গোচৰৰ ঐতিহাসিক বিচাৰৰ প্ৰথম দিন সোমবাৰে কোনো জুৰি নিৰ্বাচন কৰিব পৰা নগ’ল।
এই বিষয়টোৰ সন্দৰ্ভত কেইবা ডজন লোকে কয় যে তেওঁলোকে এই বিষয়ত নিৰপেক্ষ হ’ব পাৰে বুলি অনুভৱ কৰা নাছিল, তাৰ পিছত তেওঁলোকক বাছনি প্ৰক্ৰিয়াৰ পৰা বাদ দিয়া হৈছিল। আন কেইবা ডজন সম্ভাৱ্য জুৰিক সোধা-পোছা কৰা হৈছে। মঙলবাৰে পুৱা আদালতৰ কক্ষত উপস্থিত হয় ট্ৰাম্প। আমেৰিকাৰ এজন প্ৰাক্তন ৰাষ্ট্ৰপতিৰ সৈতে জড়িত এইটোৱেই সম্ভৱত প্ৰথম অপৰাধমূলক বিচাৰ আৰু ট্ৰাম্পৰ চাৰিটা অভিযোগনামাৰ ভিতৰত প্ৰথমটো গোচৰৰ শুনানি গ্ৰহণ কৰা হৈছে। সম্ভৱতঃ নৱেম্বৰ মাহত অনুষ্ঠিত হ’বলগীয়া ৰাষ্ট্ৰপতি নিৰ্বাচনত দেশখনে ভোটদানৰ পূৰ্বে ৰায়দান কৰা প্ৰথমটো গোচৰ হ’ব পাৰে। ট্ৰাম্পে পৰ্ণ তাৰকা ষ্টৰ্মি ডেনিয়েলছক ধন দিয়াৰ এই গোচৰটো ২০১৬ চনৰ পৰাই আৰম্ভ হৈছে। সেই সময়ত ট্ৰাম্পৰ এজন পৰ্ণ ষ্টাৰৰ লগত প্ৰেমৰ সম্পৰ্ক থকাৰ কথা প্ৰকাশ পাইছিল আৰু এই বিষয়টো লুকুৱাবলৈ তেওঁ ষ্টৰ্মীক ১ লাখ ৩০ হাজাৰ ডলাৰ দিছিল বুলি অভিযোগ উঠিছে । প্ৰাক্তন ৰাষ্ট্ৰপতিৰ কোম্পানীয়ে এই ধন তেওঁৰ অধিবক্তা মাইকেল কোহেনক দিছিল । ট্ৰাম্প এই বছৰৰ ৰাষ্ট্ৰপতি নিৰ্বাচনত ৰিপাব্লিকান পাৰ্টিৰ সম্ভাৱ্য প্ৰাৰ্থী আৰু ৰাষ্ট্ৰপতি জো বাইডেনৰ পৰা প্ৰত্যাহ্বানৰ সন্মুখীন হোৱাৰ সম্ভাৱনা আছে। ট্ৰাম্পে ব্যৱসায়িক তথ্যপাতি হেৰফেৰ কৰাৰ ৩৪টা গুৰুতৰ অপৰাধৰ অভিযোগত নিজকে দোষমুক্ত বুলি অভিহিত কৰিছে। অভিযুক্তসকলে কয় যে কোহেনক দিয়া ধন ট্ৰাম্পৰ প্ৰকৃত উদ্দেশ্য লুকুৱাবলৈ আইনী মাচুল হিচাপে ভুলকৈ ৰিপৰ্ট কৰা হৈছিল আনহাতে ট্ৰাম্পৰ অধিবক্তাই কয় যে এইটো আচলতে আইনী খৰচ আছিল আৰু ইয়াত কোনো ধৰণৰ লুকঢাক কৰা হোৱা নাছিল।
হিন্দুস্থান সমাচাৰ/ অজিত/মনোজ
