নতুন দিল্লী, ২৯ মাৰ্চ (হি.স.)। আম আদমী পাৰ্টিৰ আহ্বায়ক তথা দিল্লীৰ মুখ্যমন্ত্ৰী অৰবিন্দ কেজৰিৱালক গ্ৰেপ্তাৰ কৰাৰ বিৰুদ্ধে আজি (শুকুৰবাৰে) বিৰোধী ইণ্ডি মিত্ৰজোঁটৰ প্ৰতিবাদৰ পৰিপ্ৰেক্ষিতত আৰক্ষীয়ে বিজেপিৰ মুখ্য কাৰ্যালয়লৈ যোৱা পথত বেৰিকেড লগাইছে। সকলোতে বৃহৎ সংখ্যক আৰক্ষীক মোতায়েন কৰা হৈছে। ইয়াৰ উপৰিও মধ্য দিল্লীৰ বহু ঠাইত অৰ্ধসামৰিক বাহিনীৰ জোৱানকো মোতায়েন কৰা হৈছে। ইয়াৰ ভিতৰত দীনদয়াল উপাধ্যায় মাৰ্গৰ আশে-পাশে থকা অঞ্চল আৰু আই টি অ’ এলেকাও আছে।
বৰ্তমান কেজৰিৱাল প্ৰৱৰ্তন সঞ্চালকালয়ৰ জিম্মাত আছে। দিল্লী চৰকাৰৰ কথিত আবকাৰী নীতিৰ সৈতে জড়িত ধন সৰবৰাহৰ গোচৰত ২১ মাৰ্চত তদন্তকাৰী সংস্থাটোৱে কেজৰিৱালক গ্ৰেপ্তাৰ কৰিছিল। ভাৰতীয় জনতা পাৰ্টিৰ মুখ্য কাৰ্যালয়ত ভাৰতীয় মিত্ৰজোঁটৰ কৰ্মীসকলে কেজৰিৱালৰ গ্ৰেপ্তাৰ আৰু নিৰ্বাচনী বণ্ডৰ বিষয়ক লৈ প্ৰতিবাদ সাব্যস্ত কৰিব বুলি বৃহস্পতিবাৰে ঘোষণা কৰিছিল আম আদমী পাৰ্টিয়ে। দিল্লী আৰক্ষীয়ে জনোৱা মতে, দীনদয়াল উপাধ্যায় মাৰ্গ আৰু ইয়াৰ দাঁতিকাষৰীয়া অঞ্চলত ১৪৪ নং ধাৰাত নিষেধাজ্ঞা জাৰি কৰা হৈছে। এই পথত প্ৰতিবাদকাৰীক বাধা দিয়া হ’ব। আৰক্ষীয়ে জনোৱা মতে, বৰ্তমান আইটিঅ’ আৰু মিণ্টো ৰোডৰ পৰা বিজেপিৰ মুখ্য কাৰ্যালয়লৈ যোৱা পথটো খোলা আছে। প্ৰয়োজনৰ সময়ত ইয়াক বন্ধ কৰি দিয়া হ’ব।
উল্লেখযোগ্য যে ৰাজধানীত কেজৰিৱালক গ্ৰেপ্তাৰ কৰাৰ পিছত এসপ্তাহ ধৰি আম আদমী পাৰ্টিয়ে প্ৰতিবাদ সাব্যস্ত কৰি আহিছে। আম আদমী পাৰ্টি, তৃণমূল কংগ্ৰেছ, কংগ্ৰেছ, দ্ৰাবিদা মুনেত্ৰ কাঝাগম, সমাজবাদী পাৰ্টিকে ধৰি একাংশ বিৰোধী দলে লোকসভা নিৰ্বাচনত বিজেপিৰ বিৰুদ্ধে যুঁজিবলৈ মিত্ৰতা কৰিছে। ৩১ মাৰ্চত ৰামলীলা মৈদানতো বৃহৎ সমাৱেশৰ কথা ঘোষণা কৰিছে মিত্ৰজোঁটৰ।
হিন্দুস্থান সমাচাৰ/মুকুন্দ/মনোজ
