গোলাঘাট, ০৩ নৱেম্বৰ (হি.স.)। গোলাঘাট জিলাৰ বোকাখাতৰ নাহৰজান চাহ বাগিচাত শনিবাৰে সন্ধিয়া এক জঘন্য ঘটনা সংঘটিত হয়৷ বাগিচাখনৰে এজন ৫০ উৰ্ধৰ ব্যক্তিয়ে এগৰাকী কিশোৰীক ধৰ্ষণৰ ঘটনাক লৈ বাগিচাখনত উত্তপ্ত পৰিস্থিতিৰ সৃষ্টি হয় ।
জানিব পৰা মতে বাগিচাখনৰ মনোজ নাইক (৫৫) নামৰ ব্যক্তিজনে এগৰাকী কিশোৰীক ধৰ্ষণৰ চেষ্টা চলোৱাৰ ঘটনাক কেন্দ্ৰ কৰি এই উত্তপ্ত পৰিস্থিতিৰ সৃষ্টি হয় । মনোজ নাইক নামৰ লম্পটটোৱে কিশোৰীগৰাকীক ফুচুলাই বাগিচাৰ মাজলৈ নি ধৰ্ষণৰ চেষ্টা চলোৱাৰ সময়তে স্থানীয় কেইজনমান যুৱকে প্ৰত্যক্ষ কৰি দুয়োকে অসংযত অৱস্থাত দেখি যুৱক কেইজনে লম্পট মনোজ নাইকক উত্তম-মাধ্যম দিয়ে ৷ মুৰ্মুষ অৱস্থাত লম্পট মনোজ নাইকক বাগিচাৰ চিকিৎসালয়ত ভৰ্তি কৰে ৷ ইফালে চিকিৎসালয়ত বাগিচাৰ লোকসকল সমবেত হৈ আকৌ উত্তপ্ত পৰিস্থিতিৰ সৃষ্টি কৰে ৷ ঘটনাস্থলীত বোকাখাত আৰক্ষী আৰু নিৰাপত্তাৰক্ষী উপস্থিত হৈ পৰিস্থিতি নিয়ন্ত্ৰণ কৰে ৷ ইতিমধ্যে লম্পটৰূপী মনোজ নাইকক বোকাখাত আৰক্ষীয়ে আটক কৰি সোধাপোছা অব্যাহত ৰাখিছে ৷
---------------
হিন্দুস্থান সমাচাৰ / প্ৰকাশ ডেকা