আগন্তুক হিন্দী ছবি ‘আৰ্যভট্টা কা জিৰ’ৰ বহু প্ৰত্যাশিত ট্ৰেইলাৰ মুক্তি পালে। ২ মিনিট ৩৮ ছেকেণ্ডৰ এই ট্ৰেইলাৰটোত বিপৰ্যয়, ভগ্ন সপোন, পাৰিবাৰিক দায়িত্ব, সমাজৰ ঠাট্টা-মস্কৰাৰ মাজত নিজৰ পৰিচয় প্ৰতিষ্ঠা কৰিবলৈ সংগ্ৰাম কৰা এজন সাধাৰণ যুৱকৰ কাহিনী। পিতৃ-পুত্ৰৰ মাজৰ আৱেগিক সম্পৰ্ক, জীৱনৰ সংগ্ৰাম আৰু কেতিয়াও হাৰ নামানিবৰ মনোভাৱক ট্ৰেইলাৰটোত শক্তিশালীভাৱে চিত্ৰিত কৰা হৈছে। ইয়াৰ আৰম্ভণি হয় এক অনন্য বিবাহ দৃশ্যৰ পৰা, য’ত এটা লঘু মুহূৰ্তৰ পিছত কাহিনীটো আগবাঢ়ি যায় মূল চৰিত্ৰ ব্ৰহ্মগুপ্ত শ্ৰীবাস্তৱ ওৰফে ‘বাগ্গু’ৰ যাত্ৰালৈ।

হিমাংশ কোহলীয়ে ছবিখনত বাগ্গুৰ চৰিত্ৰত অভিনয় কৰিছে, যাৰ জীৱনটো অহৰহ বিপৰ্যয়, প্ৰেম হেৰুৱা, পাৰিবাৰিক সংগ্ৰামৰ দ্বাৰা জুৰুলা হৈ থাকে, তথাপিও তেওঁ সাহসেৰে প্ৰতিটো প্ৰত্যাহ্বানৰ সন্মুখীন হয়। ট্ৰেইলাৰৰ আৱেগিক সংলাপ আৰু প্ৰেৰণাদায়ক বাৰ্তাই দৰ্শকক মোহিত কৰে। ছবিখনত হিমাংশ কোহলী, সোণাল্লী ছেহগাল, ৰবি কিষাণ, দৰ্শনা বানিক, ৰাজেশ শৰ্মা, গোপাল দত্ত, ইছলিন প্ৰসাদ, অলকা আমিন, নীৰজ ছুদ, আৰু শিল্পা শিন্দে গুৰুত্বপূৰ্ণ চৰিত্ৰত অভিনয় কৰিছে।

ছবিখনৰ পৰিচালক কমল চন্দ্ৰ আৰু প্ৰযোজক বীৰেন্দ্ৰ ভগত, ৰবি এছ গুপ্তা, সঞ্জয় নাগপাল, আৰু শ্বেও বালক সিং। হিমাংশ কোহলীয়ে উল্লেখ কৰে যে বাগ্গুৱে বাৰে বাৰে বিপৰ্যয়ৰ সন্মুখীন হোৱাৰ পিছতো হাৰ মানিবলৈ অস্বীকাৰ কৰা লাখ লাখ যুৱকক প্ৰতিনিধিত্ব কৰে। প্ৰযোজক বীৰেন্দ্ৰ ভগতে ইয়াক আশাবাদী কাহিনী বুলি অভিহিত কৰাৰ বিপৰীতে পৰিচালক কমল চন্দ্ৰই কয় যে ছবিখনে আত্মবিশ্বাস আৰু নতুন আৰম্ভণিৰ শক্তিৰ বাৰ্তা প্ৰেৰণ কৰে। ২০২৬ চনৰ ৭ আগষ্টত দেশজুৰি ছবিগৃহত মুক্তি পাব ‘আৰ্যভট্টা কা জিৰ’।

হিন্দুস্থান সমাচাৰ / অৰৱিন্দ