নতুন দিল্লী, ১৭ জুলাই (হি.স.)। আগন্তুক আই এছ এছ এফ বিশ্বকাপত ভাৰতক প্ৰতিনিধিত্ব কৰিব গগন নৰং স্প’ৰ্টছ প্ৰমোচন ফাউণ্ডেশ্যন (গান ফৰ গ্ল’ৰী)ৰ চাৰিগৰাকী শ্বুটাৰে।
২০ জুলাইৰ পৰা ২৯ জুলাইলৈ চীনৰ হাংঝৌত অনুষ্ঠিত হ’বলগীয়া এই সন্মানীয় প্ৰতিযোগিতাত ভাৰতীয় শ্বুটাৰসকলে বিশ্বৰ শ্ৰেষ্ঠ খেলুৱৈৰ বিৰুদ্ধে প্ৰতিদ্বন্দ্বিতা কৰিব। ইলাভেনিলে মহিলাৰ ১০ মিটাৰ এয়াৰ ৰাইফল আৰু ১০ মিটাৰ এয়াৰ ৰাইফল মিক্সড টিম ইভেণ্টত অংশগ্ৰহণ কৰাৰ বিপৰীতে ৰুদ্ৰাক্ষই পুৰুষৰ ১০ মিটাৰ এয়াৰ ৰাইফল আৰু ৫০ মিটাৰ ৰাইফল থ্ৰী পজিচন ইভেণ্টত অংশগ্ৰহণ কৰিব।
এইবোৰৰ লগতে ফাউণ্ডেশ্যনৰ উদীয়মান শ্বুটাৰ সাক্ষী সুনীল পাডেকাৰ (মহিলাৰ ১০ মিটাৰ এয়াৰ ৰাইফল) আৰু শ্বাহু তুষাৰ মানে (পুৰুষৰ ১০ মিটাৰ এয়াৰ ৰাইফল)ও ভাৰতীয় দলৰ অংশ। ঘৰুৱা প্ৰতিযোগিতাত আকৰ্ষণীয় প্ৰদৰ্শন আৰু একাডেমীত বিস্তৃত প্ৰশিক্ষণৰ অন্তত দুয়োগৰাকী খেলুৱৈয়ে বিশ্বকাপত প্ৰৱেশ কৰিব।
বিগত তিনি বছৰ ধৰি গান ফৰ গ্ল’ৰী একাডেমীৰ সৈতে জড়িত সাক্ষী সুনীল পাডেকাৰে শেহতীয়াকৈ ৰাষ্ট্ৰীয় অভিলেখ গঢ়ি নিজৰ প্ৰতিভা প্ৰদৰ্শন কৰিছে। বিশ্বকাপৰ পূৰ্বে ফাউণ্ডেচনে প্ৰকাশ কৰা এক বিবৃতিত তেওঁ কয় যে, মোৰ মনোযোগ এটা এটাকৈ শ্বটৰ ওপৰত থাকিব। এই পদ্ধতিয়ে মোৰ বাবে এতিয়ালৈকে ভাল কাম কৰিছে। আমি যোৱা কেইসপ্তাহমানত কাৰিকৰী দিশত ব্যাপকভাৱে কাম কৰিছো, আৰু মই মোৰ প্ৰস্তুতি আৰু মোৰ সামৰ্থ্যৰ ওপৰত আত্মবিশ্বাসী। প্ৰতিখন প্ৰতিযোগিতাই এক শিক্ষণৰ সুযোগ, আৰু মই বিশ্বৰ শ্ৰেষ্ঠৰ বিৰুদ্ধে নিজকে পৰীক্ষা কৰিবলৈ উৎসাহিত।
পুৰুষৰ শ্বুটাৰ শ্বাহু তুষাৰ মানেও বিগত ডেৰ-দুবছৰ ধৰি গান ফৰ গ্ল’ৰী একাডেমীত প্ৰশিক্ষণ লৈ আছে। শেহতীয়াকৈ এয়াৰ ৰাইফলৰ পৰীক্ষাত ৰাষ্ট্ৰীয় অভিলেখ গঢ়ি তোলা শ্বাহুৱে কয় যে তেওঁৰ লক্ষ্য কেৱল নিজৰ শ্ৰেষ্ঠ প্ৰদৰ্শনৰ ওপৰত গুৰুত্ব দিয়া। তেওঁ কয়, মই কোনো নিৰ্দিষ্ট লক্ষ্য লৈ বিশ্বকাপলৈ যোৱা নাই। শেহতীয়াকৈ যেতিয়া মই মোৰ শ্ৰেষ্ঠ প্ৰদৰ্শন কৰিছিলো তেতিয়া মই কেৱল খেলখন উপভোগ কৰি আছিলো আৰু বৰ্তমানৰ ওপৰত গুৰুত্ব দি আছিলো। এইবাৰো একে মানসিকতাৰে কাষ চাপিম। যদি মই মোৰ ৰুটিন অনুসৰণ কৰি প্ৰতিটো মুহূৰ্ত উপভোগ কৰি শ্বুট কৰো তেন্তে ফলাফল স্বয়ংক্ৰিয়ভাৱে আহিব। পদক জয় কৰাটো নিশ্চিতভাৱে বিশেষ হ'ব, কিন্তু মোৰ অগ্ৰাধিকাৰ হ'ল মোৰ সম্পূৰ্ণ সম্ভাৱনাৰে প্ৰদৰ্শন কৰা।
হাংঝোত অনুষ্ঠিত হ’বলগীয়া আই এছ এছ এফ বিশ্বকাপ ভাৰতীয় ৰাইফল শ্বুটাৰসকলৰ বাবে আন্তঃৰাষ্ট্ৰীয় অভিজ্ঞতা লাভৰ এক গুৰুত্বপূৰ্ণ সুযোগ হ’ব। আগন্তুক বৃহৎ আন্তঃৰাষ্ট্ৰীয় চেম্পিয়নশ্বিপৰ প্ৰস্তুতিৰ বাবে ভাৰতীয় খেলুৱৈসকলৰ বাবেও এই প্ৰতিযোগিতাখন অতি গুৰুত্বপূৰ্ণ বুলি বিবেচিত হৈছে।
হিন্দুস্থান সমাচাৰ / অৰৱিন্দ
