নতুন দিল্লী, ১৬ জুলাই (হি.স.)। মহাৰাষ্ট্ৰৰ কোলহাপুৰৰ ১০ মিটাৰ এয়াৰ ৰাইফল শ্বুটাৰ সোণম উত্তম মাস্কৰে এতিয়া ২০২৬ চনৰ এছিয়ান গেমছত ভাৰতক প্ৰতিনিধিত্ব কৰিবলৈ সাজু হৈছে। কিন্তু এই মাইলৰ খুঁটিলৈ তাইৰ যাত্ৰাৰ আঁৰত নিহিত হৈ আছে তাইৰ পিতৃ আৰু পৰিয়ালৰ সংগ্ৰামৰ অপৰিসীম ত্যাগৰ কাহিনী।
ছেপ্টেম্বৰ মাহত জাপানৰ আইচি-নাগোয়াত অনুষ্ঠিত হ’বলগীয়া ২০ সংখ্যক এছিয়ান গেমছত ভাৰতীয় শ্বুটিং দলৰ অংশ হ’ব ২৩ বছৰীয়া সোণম। ১৭ ছেপ্টেম্বৰৰ পৰা ৩ অক্টোবৰলৈ অনুষ্ঠিত হ’ব শ্বুটিং প্ৰতিযোগিতা।
সোণমে আনুষ্ঠানিক বিবৃতিত ব্যাখ্যা কৰে যে ক’ভিড-১৯ মহামাৰীৰ পিছত তেওঁৰ পৰিয়াল আৰ্থিক অসুবিধাৰ সন্মুখীন হৈছিল। তাইক পেছাদাৰী শ্বুটিং সঁজুলিৰ প্ৰয়োজন আছিল যদিও খৰচটো আছিল এক উল্লেখযোগ্য প্ৰত্যাহ্বান। তাইৰ পিতৃ উত্তম মাৰুতি মাস্কৰে নিজৰ এটা সম্পত্তি বিক্ৰী কৰি জীয়েকৰ সপোন পূৰণ কৰিছিল।
সোণেমে কয় যে, এটা সময়ত আমাৰ পৰিয়ালটোৱে আৰ্থিক অসুবিধাৰ মাজেৰে পাৰ হৈছিল, বিশেষকৈ লকডাউনৰ সময়ত। যেতিয়া স্পষ্ট হৈ পৰিছিল যে মোক আগুৱাই যাবলৈ মোৰ নিজৰ শ্বুটিং সঁজুলিৰ প্ৰয়োজন, তেতিয়া দেউতাই এটা সম্পত্তি বিক্ৰী কৰি দিছিল যাতে আমি কিনিব পাৰো। আমাৰ পৰিয়ালৰ বাবে এইটো এটা ডাঙৰ সিদ্ধান্ত আছিল, কিন্তু তেওঁলোকে মোক সদায় সমৰ্থন কৰিছিল।
সোণমে বুজাই দিলে যে তেওঁ কেতিয়াও কল্পনা কৰা নাছিল যে তেওঁ শ্বুটিংক পেছা হিচাপে গ্ৰহণ কৰিব। ২০১৮ চনত মুম্বাইৰ টোলানী কলেজ অৱ কমাৰ্চত অধ্যয়ন কৰি থকা অৱস্থাত প্ৰথমবাৰৰ বাবে শ্বুটিঙৰ দায়িত্ব লয়। তেখেতে কয় যে, মই সদায় ক্ৰীড়াৰ প্ৰতি আগ্ৰহী আছিলো। মই দবাও খেলিছিলো। মই নতুন কিবা এটা চেষ্টা কৰাৰ সিদ্ধান্ত লৈছিলো আৰু চখ হিচাপে শ্বুটিং আৰম্ভ কৰিছিলো। লাহে লাহে মই বুজি পাইছিলো যে এইখিনিতে মই কেৰিয়াৰ গঢ়িব বিচাৰো।
ক’ভিড-১৯ মহামাৰীয়ে তেওঁৰ প্ৰাৰম্ভিক যাত্ৰাত বাধাৰ সৃষ্টি কৰিছিল যদিও ২০২১ চনত কলহাপুৰ শ্বুটিং ৰেঞ্জত গুৰুতৰভাৱে অনুশীলন কৰিবলৈ আৰম্ভ কৰে।
সোণমে তেওঁৰ কেৰিয়াৰৰ আটাইতকৈ উল্লেখযোগ্য কৃতিত্বৰ উল্লেখ কৰিছে ২০২৪ চনত নতুন দিল্লীত অনুষ্ঠিত হোৱা আই এছ এছ এফৰ বিশ্বকাপৰ ফাইনেলত লাভ কৰা ৰূপৰ পদক। দিল্লীত ঘৰুৱা দৰ্শকৰ সন্মুখত বিশ্বকাপৰ ফাইনেলত ৰূপৰ পদক জয় কৰাটো মোৰ কেৰিয়াৰৰ অন্যতম স্মৰণীয় মুহূৰ্ত। সেই অভিজ্ঞতা মোৰ লগত সদায় থাকিব।
কায়ৰো বিশ্বকাপকে ধৰি আন্তঃৰাষ্ট্ৰীয় প্ৰতিযোগিতাত আকৰ্ষণীয় প্ৰদৰ্শনৰ পিছত ভাৰতীয় ৰে’লৱেক প্ৰতিনিধিত্ব কৰাৰ সুযোগো লাভ কৰে।
সম্প্ৰতি বিদেশী প্ৰশিক্ষক ফাৰ্নিক থমাছ আৰু ভাৰতীয় প্ৰশিক্ষকৰ তত্বাৱধানত এছিয়ান গেমছৰ বাবে প্ৰস্তুতি চলাই আছে সোণমে।
এছিয়ান গেমছৰ প্ৰস্তুতি ভালদৰে চলি আছে। মই মোৰ বিদেশী প্ৰশিক্ষক ফাৰ্নিক থমাছ আৰু ভাৰতীয় প্ৰশিক্ষকৰ সৈতে অবিৰতভাৱে অনুশীলন কৰি আছো। আমাৰ সমগ্ৰ মনোযোগ প্ৰতিযোগিতাৰ বাবে নিজকে সম্ভৱপৰ উত্তম পদ্ধতিৰে প্ৰস্তুত কৰাত।
লগতে তেওঁৰ পৰিয়াল আৰু তেওঁক সহায় কৰা সকলো অনুষ্ঠান-প্ৰতিষ্ঠানৰ প্ৰতিও কৃতজ্ঞতা জ্ঞাপন কৰে সোণমে।
তেখেতে কয়, এই যাত্ৰাত মোক সহায় কৰা সকলোৰে প্ৰতি মই অত্যন্ত কৃতজ্ঞ। মোৰ পৰিয়ালে মোক প্ৰতিটো খোজতে সহায় কৰিছিল। লগতে অ'জিকিউ, নেচনেল ৰাইফল এছ'চিয়েচন, নেচনেল চেণ্টাৰ অৱ এক্সেলেন্স অৱ স্প'ৰ্টছ অথৰিটি অৱ ইণ্ডিয়া, ইণ্ডিয়ান ৰে'লৱে, আৰু মোৰ সমগ্ৰ সহায়ক কৰ্মচাৰী দলক ধন্যবাদ, যিয়ে মোক সদায় উৎসাহিত কৰিছিল আৰু মোক এজন উন্নত খেলুৱৈ হ'বলৈ সহায় কৰিছিল।
-----------------
হিন্দুস্থান সমাচাৰ / অৰৱিন্দ
