মেনিলা, ০৮ জুন (হি.স.)। দক্ষিণ ফিলিপাইনছত সোমবাৰে পুৱা ৭.৮ ৰিখটাৰ স্কেলৰ এক শক্তিশালী ভূমিকম্পত কমেও ১৯ জন লোকৰ মৃত্যু হোৱাৰ লগতে ১৩৪ জন লোক আহত হয়। অসংখ্য অট্টালিকা ক্ষতিগ্ৰস্ত হোৱাৰ লগতে কিছুমান ভাঙি যায়। ভূমিকম্পৰ পিছত সমগ্ৰ এছিয়াতে চুনামীৰ সতৰ্কবাণী জাৰি কৰা হৈছিল যদিও পিছত বেছিভাগ অঞ্চলৰ বাবে এই সতৰ্কবাণী প্ৰত্যাহাৰ কৰা হৈছিল।

ফিলিপাইনছৰ চৰকাৰী সংবাদ সংস্থা ফিলিপাইনছ নিউজ এজেন্সী আৰু আমেৰিকাৰ ভূতাত্ত্বিক জৰীপৰ তথ্য অনুসৰি সোমবাৰে পুৱা স্থানীয় সময় অনুসৰি মিন্দানাও দ্বীপৰ ওচৰত সংঘটিত হয় এই ভূমিকম্প। ফিলিপাইনছৰ আগ্নেয়গিৰিবিজ্ঞান আৰু ভূমিকম্পবিজ্ঞান প্ৰতিষ্ঠানে প্ৰকাশ কৰা অনুসৰি মূল কম্পনৰ পিছত এঘণ্টাৰো অধিক সময় ধৰি আফটাৰশ্বক অনুভৱ কৰা হৈছিল।

দক্ষিণ মিন্দানাওৰ ৭ কোটি ২২ লাখ জনসংখ্যাৰ চহৰ জেনেৰেল ছান্টোছৰ আটাইতকৈ বেছি ক্ষতি হৈছে। ইফালে, পিএইচআইবিওএলচি-এ প্ৰকাশ কৰা অনুসৰি দক্ষিণৰ চহৰ ছোক্সচাৰজেন (Soccsksargen)ত ভূমিকম্পৰ তীব্ৰতা তেওঁলোকৰ স্কেলত “অতি উচ্চ” জুখিছিল। চৰকাৰী ছ’চিয়েল মিডিয়াত এটা পোষ্টত দেখা গৈছে যে জনপ্ৰিয় ফাষ্ট ফুড চেইন জলিবি ৰেষ্টুৰেণ্ট থকা তিনিমহলীয়া অট্টালিকা এটা ভাঙি পৰাৰ ফলত ধ্বংসাৱশেষ আৰু ধূলিৰ ডাৱৰে আগুৰি ধৰিছে। আন আন ছবিত দেখা গৈছে যে অট্টালিকাৰ ব্যাপক ক্ষতিসাধন হৈছে, য’ত খিৰিকী ছিঙি যোৱা আৰু চাল ভাঙি যোৱা আদিও দেখা গৈছে। স্থানীয় আৰক্ষীৰ মুখপাত্ৰ ৰবাৰ্ট ডুগনে কয় যে চহৰখনৰ ছেইণ্ট এলিজাবেথ হাস্পতালতো যথেষ্ট ক্ষতিসাধন হোৱাৰ ফলত ৰোগী আৰু চিকিৎসা কৰ্মীক খালী কৰিবলগীয়া হৈছে।

ফিলিপাইনছৰ ৰাষ্ট্ৰপতি ফাৰ্ডিনাণ্ড মাৰ্কছ জুনিয়ৰে কয় যে দুৰ্যোগৰ পিছতেই উদ্ধাৰ আৰু সাহায্য সংস্থা সক্ৰিয় কৰা হয়। লগতে ক্ষতিগ্ৰস্ত অঞ্চলৰ বিদ্যালয়সমূহ বন্ধ কৰাৰ নিৰ্দেশ দিয়ে। চৰকাৰী পৰিসংখ্যা অনুসৰি বিদ্যালয়ৰ প্ৰথম দিনাই প্ৰায় ৩২ লাখ ছাত্ৰ-ছাত্ৰী আৰু ১ লাখ ২৮ হাজাৰ শিক্ষক-কৰ্মচাৰী এই দুৰ্যোগৰ ফলত ক্ষতিগ্ৰস্ত হয়।

অফিচ অৱ চিভিল ডিফেন্সৰ উপ-মুখপাত্ৰ ডিয়েগো অগাষ্টিন মাৰিয়ানোৰ মতে, এতিয়ালৈকে ১৯ জন লোকৰ মৃত্যু হৈছে, য’ত ১৬ জন ছ’কচছাৰ্গেন অঞ্চলত আৰু ৩ জন ডাভাও অঞ্চলত মৃত্যু হৈছে। অৱশ্যে এই পৰিসংখ্যা আনুষ্ঠানিকভাৱে এতিয়াও নিশ্চিত কৰা হৈছে।

ভূমিকম্পৰ ঠিক পিছতেই ফিলিপাইনছ, ইণ্ডোনেছিয়া আৰু এছিয়াৰ আন কেইবাটাও অঞ্চলত চুনামীৰ সতৰ্কবাণী জাৰি কৰা হয়। পিছলৈ বেছিভাগ অঞ্চলৰ বাবে সতৰ্কবাণী প্ৰত্যাহাৰ কৰা হৈছিল যদিও জাপানৰ দক্ষিণ উপকূলীয় অঞ্চল আৰু কিছুমান দ্বীপৰ বাবে সতৰ্কবাণীৰ পৰামৰ্শ প্ৰযোজ্য হৈয়েই আছিল। স্থানীয় কৰ্তৃপক্ষই ৰাইজক বিল আৰু নদীৰ মুখৰ পৰা আঁতৰি থাকিবলৈ পৰামৰ্শ দিছে।

কৰ্তৃপক্ষই মানুহক শান্ত হৈ থাকিবলৈ, আফটাৰশ্বকৰ বাবে সজাগ হ’বলৈ আৰু কেৱল চৰকাৰী তথ্যৰ ওপৰত নিৰ্ভৰ কৰিবলৈ আহ্বান জনাইছে। যুদ্ধৰ ভিত্তিত সাহায্য আৰু উদ্ধাৰ অভিযান চলি আছে, আৰু মৃত্যুৰ সংখ্যা বৃদ্ধি পোৱাৰ সম্ভাৱনা আছে।

হিন্দুস্থান সমাচাৰ / মনোজ কুমাৰ শইকীয়া