নতুন দিল্লী, ২৯ জুন (হি.স.)। কংগ্ৰেছৰ সভাপতি তথা ৰাজ্যসভাৰ বিৰোধী দলপতি মল্লিকাৰ্জুন খৰ্গেয়ে সোমবাৰে ৰাজ্যসভাৰ সদস্য হিচাপে শপত গ্ৰহণ কৰে। শেহতীয়াকৈ কৰ্ণাটকৰ পৰা উচ্চ সদনলৈ পুনৰ নিৰ্বাচিত হোৱা খৰ্গেক সংসদ ভৱনৰ সভাপতিৰ চেম্বাৰত উপ-ৰাষ্ট্ৰপতি তথা ৰাজ্যসভাৰ সভাপতি চি.পি. ৰাধাকৃষ্ণনে শপত গ্ৰহণ কৰোৱায়।

শপতগ্ৰহণৰ সময়ত উপস্থিত আছিল ৰাজ্যসভাৰ উপ অধ্যক্ষ হৰিৱংশ, সদনৰ নেতা আৰু কেন্দ্ৰীয় স্বাস্থ্য মন্ত্ৰী জে.পি. ভেনুগোপালৰ লগতে বিভিন্ন দলৰ কেইবাজনো জ্যেষ্ঠ নেতা।

উল্লেখযোগ্য যে ৮৩ বছৰীয়া খৰ্গে একেৰাহে দ্বিতীয়বাৰৰ বাবে কৰ্ণাটকৰ পৰা ৰাজ্যসভালৈ নিৰ্বাচিত হৈছে। বৰ্তমান তেওঁ ৰাজ্যসভাত বিৰোধী দলৰ নেতা হিচাপে কাৰ্যনিৰ্বাহ কৰি আছে। ৰাজহুৱা জীৱনৰ পাঁচ দশকৰো অধিক অভিজ্ঞতা থকা খৰ্গে কৰ্ণাটকৰ ৰাজনীতিত ৰাজনৈতিক যাত্ৰা আৰম্ভ কৰিছিল। ১৯৭২ চনত প্ৰথমবাৰৰ বাবে কৰ্ণাটক বিধানসভাৰ নিৰ্বাচনত জয়লাভ কৰে। পৰৱৰ্তী সময়ত তেওঁ ৯ বাৰ বিধানসভালৈ নিৰ্বাচিত হয় আৰু ৰাজ্য চৰকাৰৰ কেইবাটাও গুৰুত্বপূৰ্ণ পদবীত অধিষ্ঠিত হয়। ১৯৯৯ চনৰ পৰা ২০০৪ চনলৈ কৰ্ণাটক বিধানসভাত বিৰোধী দলৰ নেতা হিচাপেও কাৰ্যনিৰ্বাহ কৰিছিল।

ৰাষ্ট্ৰীয় ৰাজনীতিত খৰ্গে ২০০৯ আৰু ২০১৪ চনত কৰ্ণাটকৰ গুলবৰ্গা লোকসভা সমষ্টিক প্ৰতিনিধিত্ব কৰিছিল। সংযুক্ত প্ৰগতিশীল মিত্ৰজোঁট (ইউ পি এ) চৰকাৰৰ দ্বিতীয় কাৰ্যকালত তেওঁ ৰে’ল মন্ত্ৰী আৰু শ্ৰম আৰু নিয়োগ মন্ত্ৰী হিচাপে কাৰ্যনিৰ্বাহ কৰিছিল। ২০১৪ চনৰ পৰা ২০১৯ চনলৈ তেওঁ লোকসভাত কংগ্ৰেছ দলৰ নেতা আছিল। ২০২০ চনত প্ৰথমবাৰৰ বাবে ৰাজ্যসভাত প্ৰৱেশ কৰা খৰ্গে ২০২২ চনৰ অক্টোবৰ মাহত কংগ্ৰেছৰ সভাপতি হিচাপে নিৰ্বাচিত হৈছিল। বৰ্তমান তেওঁ দলৰ শীৰ্ষ সাংগঠনিক নেতৃত্বত সক্ৰিয় ভূমিকা পালন কৰাৰ লগতে সংসদৰ উচ্চ সদনত বিৰোধীৰ কণ্ঠস্বৰ হিচাপেও দায়িত্ব বহন কৰি আহিছে।

হিন্দুস্থান সমাচাৰ / মনোজ কুমাৰ শইকীয়া