নতুন দিল্লী, ২৯ জুন (হিি.স.)। ৰাষ্ট্ৰীয় শিক্ষা নীতি (এন ই পি) ২০২০ৰ লগত সংগতি ৰাখি, ২০২৬-২৭ শৈক্ষিক অধিবেশনৰ পৰা সংযুক্ত বিদ্যালয়সমূহত তিনিটা ভাষাৰ নীতি ৰূপায়ণৰ বাবে কেন্দ্ৰীয় মাধ্যমিক শিক্ষা ব’ৰ্ডে বিশদ নিৰ্দেশনা জাৰি কৰিছে।

চিবিএছইৰ তথ্য অনুসৰি নৱম শ্ৰেণীত (২০২৬-২৭) নামভৰ্তি কৰা সকলো ছাত্ৰ-ছাত্ৰীয়ে তিনিটা ভাষা অধ্যয়ন কৰিব লাগিব, কমেও দুটা ভাৰতীয় ভাষা বাধ্যতামূলক হ’ব। যদি কোনো ছাত্ৰই ইতিমধ্যে এটা ভাৰতীয় ভাষা আৰু এটা বিদেশী ভাষা অধ্যয়ন কৰি আছে তেন্তে তেওঁলোকে তৃতীয় ভাষা হিচাপে ভাৰতীয় ভাষা এটা বাছি ল’ব লাগিব। ইতিমধ্যে দুটা বিদেশী ভাষা অধ্যয়ন কৰা ছাত্ৰ-ছাত্ৰীসকলে এককালীন বিশেষ ৰেহাইৰ অধীনত সেই দুটা ভাষাত অতিৰিক্ত ভাৰতীয় ভাষা যোগ কৰাৰ অনুমতি আছে।

ব’ৰ্ডে এইটোও স্পষ্ট কৰি দিছে যে বৰ্তমান ৭, ৮, আৰু নৱম শ্ৰেণীত অধ্যয়ন কৰা ছাত্ৰ-ছাত্ৰীৰ বাবে তৃতীয় ভাষাৰ মূল্যায়ন কেৱল বিদ্যালয় পৰ্যায়ত আভ্যন্তৰীণ মূল্যায়নৰ জৰিয়তে কৰা হ’ব। এইসকল ছাত্ৰ-ছাত্ৰীয়ে দশম শ্ৰেণীত উপনীত হ’লে তৃতীয় ভাষাৰ চিবিএছই ব’ৰ্ড পৰীক্ষা নাথাকিব।

অৱশ্যে বৰ্তমানৰ ষষ্ঠ শ্ৰেণী (২০২৬-২৭) আৰু পৰৱৰ্তী বেচৰ বাবে তিনিটা ভাষাৰ নীতি সম্পূৰ্ণৰূপে কাৰ্যকৰী কৰা হ’ব। এইসকল ছাত্ৰ-ছাত্ৰীয়ে দশম শ্ৰেণীত তৃতীয় ভাষা বৰ্ড পৰীক্ষাও দিব লাগিব। ইয়াৰ বাবে এনচিইআৰটিয়ে ২২টা নিৰ্ধাৰিত ভাৰতীয় ভাষাত উপযুক্ত পাঠ্যক্ৰমৰ সামগ্ৰী যোগান ধৰিছে।

শিশুৰ স্বাৰ্থৰ প্ৰতি লক্ষ্য ৰাখি চিবিএছইয়ে বিশেষ শ্ৰেণীৰ বাবেও ৰেহাইৰ ব্যৱস্থা কৰিছে। প্ৰতিবন্ধী ছাত্ৰ-ছাত্ৰী, ভাৰতৰ বাহিৰৰ চিবিএছই বিদ্যালয়ত অধ্যয়ন কৰা ছাত্ৰ-ছাত্ৰী, আৰু বহিঃৰাজ্যৰ পৰা ভাৰতলৈ উভতি অহা বিদেশী ছাত্ৰ-ছাত্ৰীক তৃতীয় ভাৰতীয় ভাষাৰ প্ৰয়োজনীয়তাৰ পৰা ৰেহাই দিয়া হৈছে। তদুপৰি অভিভাৱকসকলে অন্য ৰাজ্যলৈ বদলি হ’লে ছাত্ৰ-ছাত্ৰীসকলে পূৰ্বতে বাছি লোৱা ভাষাৰ সংমিশ্ৰণটো আগবঢ়াই নিব পাৰিব।

ব’ৰ্ডে বিদ্যালয়সমূহক পৰামৰ্শ দিছে যে বৰ্তমানৰ শিক্ষকসকলক কাৰ্য্যক্ষম দক্ষতা, অৱসৰপ্ৰাপ্ত শিক্ষক, স্নাতকোত্তৰ প্ৰাৰ্থী, সাহোদয়া বিদ্যালয় গোটৰ জৰিয়তে শিক্ষকৰ ভাগ-বতৰা, ভাৰ্চুৱেল বা হাইব্ৰিড পাঠদানৰ বিকল্পকে ধৰি প্ৰয়োজনীয় শিক্ষকসকলক প্ৰদান কৰিবলৈ নমনীয় ব্যৱস্থা গ্ৰহণ কৰিবলৈ পৰামৰ্শ দিছে। ব’ৰ্ডে উল্লেখ কৰে যে এই নিৰ্দেশনাসমূহৰ লক্ষ্য হৈছে এন ই পি-২০২০ অনুসৰি বহুভাষিক শিক্ষাৰ প্ৰসাৰ আৰু কোনো ছাত্ৰ-ছাত্ৰীৰ শৈক্ষিক স্বাৰ্থ যাতে প্ৰভাৱিত নহয়।

হিন্দুস্থান সমাচাৰ / মনোজ কুমাৰ শইকীয়া