নতুন দিল্লী, ২৮ জুন (হি.স.)। কেন্দ্রীয় চৰকাৰে চিকিৎসা সঁজুলি নিৰ্মাণ পঞ্জীকৰণ, ২০১৭ৰ খচৰা সংশোধনী প্রকাশ কৰি চিকিৎসা সঁজুলিৰ বাবে অনুজ্ঞাপত্ৰ প্রস্তুত কৰাৰ প্রক্রিয়া ক্ষিপ্ৰ আৰু সৰল কৰি তুলিছে ৷ প্ৰস্তাৱিত পৰিৱৰ্তনৰ অধীনত খ শ্ৰেণীৰ চিকিৎসা সঁজুলিৰ বাবে অনুজ্ঞাপত্ৰৰ সময়সীমা ১৪০ দিনৰ পৰা ১১৫ দিনলৈ হ্ৰাস কৰা হৈছে, আৰু গ আৰু ঘ শ্ৰেণীৰ যন্ত্ৰৰ বাবে ১০৫ দিনৰ পৰা ৯০ দিনলৈ হ্ৰাস কৰা হৈছে।

কেন্দ্ৰীয় স্বাস্থ্য আৰু পৰিয়াল কল্যাণ মন্ত্ৰালয়ৰ মতে, প্ৰস্তাৱিত সংশোধনীৰ লক্ষ্য হৈছে ব্যৱসায় কৰাত সহজতা বৃদ্ধি কৰা, নিয়ন্ত্ৰণ প্ৰক্ৰিয়াক অধিক কাৰ্যক্ষম কৰা, আৰু দেশত গুণগত চিকিৎসা সঁজুলিৰ সময়মতে উপলব্ধতা নিশ্চিত কৰা। গুণগত মান, সুৰক্ষা, আৰু পৰিৱেশনৰ সৈতে জড়িত বৰ্তমানৰ মানদণ্ডসমূহ বজাই ৰখা হ’ব।

বৰ্তমানৰ নিয়ম অনুসৰি চিকিৎসা সঁজুলিসমূহক বিপদৰ ওপৰত ভিত্তি কৰি ক শ্ৰেণী, খ শ্ৰেণী, গ শ্ৰেণী, আৰু ঘ শ্ৰেণীত ভাগ কৰা হৈছে। ঘ শ্ৰেণীক সৰ্বাধিক বিপদজনক শ্ৰেণী বুলি গণ্য কৰা হয়। প্ৰতিটো শ্ৰেণীৰ উৎপাদন অনুজ্ঞাপত্ৰ আবেদন প্ৰক্ৰিয়াকৰণৰ বাবে এটা বেলেগ সময়সীমা থাকে।

প্ৰস্তাৱিত সংশোধনীত খ শ্ৰেণীৰ চিকিৎসা সঁজুলিৰ অনুজ্ঞাপত্ৰ প্ৰদানৰ সময়সীমা ১৪০ দিনৰ পৰা ১১৫ দিনলৈ হ্ৰাস কৰাৰ প্ৰস্তাৱ দিয়া হৈছে। এই শ্ৰেণীত কমৰ পৰা মধ্যমীয়া বিপদজনক যন্ত্ৰ যেনে ৰক্তচাপ নিৰীক্ষক, হাইপ’ডাৰ্মিক বেজী, আৰু পালছ অক্সিমিটাৰ আদি অন্তৰ্ভুক্ত কৰা হৈছে।

একেদৰে গ আৰু ঘ শ্ৰেণীৰ চিকিৎসা সঁজুলিৰ অনুজ্ঞাপত্ৰ প্ৰদানৰ সময়সীমা ১০৫ দিনৰ পৰা ৯০ দিনলৈ হ্ৰাস কৰাৰ প্ৰস্তাৱ দিয়া হৈছে। এই শ্ৰেণীসমূহৰ ভিতৰত উচ্চ বিপদজনক চিকিৎসা সঁজুলি যেনে কাৰ্ডিয়াক ষ্টেণ্ট, হিপ আৰু আঁঠুৰ ইমপ্লাণ্ট, আৰু অন্যান্য অস্থিৰোগ ইমপ্লাণ্ট আদি অন্তৰ্ভুক্ত।

খচৰা সংশোধনীসমূহে আবেদনৰ নিৰীক্ষণ, অধিসূচিত সংস্থাসমূহৰ দ্বাৰা অডিট, অনুসৰণ পৰীক্ষণ, আৰু অনুজ্ঞাপত্ৰ প্ৰদানকে ধৰি সমগ্ৰ প্ৰক্ৰিয়াটোৰ প্ৰতিটো পদক্ষেপৰ বাবে স্পষ্ট সময়সীমাৰ ব্যৱস্থাও প্ৰদান কৰে। ইয়াৰ ফলত নিয়ন্ত্ৰণ কাঠামোত অধিক স্বচ্ছতা, ভৱিষ্যদ্বাণীযোগ্যতা আৰু কাৰ্যক্ষমতা আহিব, যাৰ ফলত উদ্যোগ আৰু ৰোগী উভয়কে উপকৃত হ’ব।

হিন্দুস্থান সমাচাৰ / মনোজ কুমাৰ শইকীয়া