নতুন দিল্লী, ২৮ জুন (হি.স.)। দিল্লী চৰকাৰৰ স্বাস্থ্য বিভাগৰ ভিতৰত ঔষধ, অস্ত্ৰোপচাৰ সামগ্ৰী, চিকিৎসা সঁজুলি ক্ৰয়ৰ সৈতে জড়িত বহু কোটি টকীয়া কেলেংকাৰিৰ তদন্ত চলাই থকা দুৰ্নীতি নিবাৰক শাখাই বৃহৎ ব্যৱস্থা গ্ৰহণ কৰি তেতিয়াৰ স্বাস্থ্য সেৱাৰ সঞ্চালক প্ৰধান ডাঃ ভাটছালা আগৰৱালা আৰু কেন্দ্ৰীয় ক্ৰয় সংস্থা (চিপিএ)ৰ তদানীন্তন হিচাপ নিয়ন্ত্ৰক নীৰজ চোপ্ৰাক গ্ৰেপ্তাৰ কৰিছে। শনিবাৰে দুয়োকে ৰাউজ এভিনিউৰ বিশেষ আদালতত হাজিৰ কৰোৱা হয়, য’ত এচিবিয়ে সোধা-পোছাৰ বাবে এদিনীয়া আৰক্ষীৰ ৰিমাণ্ড বিচাৰিছিল।

এচিবিৰ তথ্য অনুসৰি সতৰ্কতা সঞ্চালকালয়ৰ এজাহাৰৰ পিছতে এই গোচৰটো আৰম্ভ কৰা হৈছে। অভিযোগত কেন্দ্ৰীয় ক্ৰয় সংস্থাৰ জৰিয়তে ঔষধ, অস্ত্ৰোপচাৰৰ বাবে উপভোগ্য সামগ্ৰী, চিকিৎসা সঁজুলি, আৰু অন্যান্য চিকিৎসা সামগ্ৰী ক্ৰয়ৰ ক্ষেত্ৰত বৃহৎ পৰিসৰৰ অনিয়মৰ অভিযোগ উত্থাপন কৰা হৈছে। অভিযোগ কৰা হৈছে যে কিছুমান বিষয়াই ব্যক্তিগত কোম্পানীসমূহৰ সৈতে গোপন বুজাবুজি কৰিছিল আৰু নিবিদাৰ চৰ্ত আৰু কাৰিকৰী মানদণ্ডৰ হেতালি খেলি নিৰ্বাচিত কোম্পানীসমূহৰ অনুকূল কৰিছিল। ইয়াৰ ফলত চৰকাৰী কোষাগাৰত যথেষ্ট লোকচান হয়।

তদন্তৰ পৰিসৰৰ ভিতৰত আছে পৰ্টেবল এক্স-ৰে মেচিন, বেডশ্বীট আৰু লিনেন, চি-আৰ্ম ৰেডিঅ’লজিকেল সঁজুলি, এনাস্থেচিয়া ৱৰ্কষ্টেচন, অ’ আৰ এছ, অস্ত্ৰোপচাৰৰ সামগ্ৰী, ঔষধ, আৰু অন্যান্য চিকিৎসা সামগ্ৰী ক্ৰয় কৰা। বজাৰৰ হাৰতকৈ অধিক দামত এইবোৰ ক্ৰয় কৰা বুলি এচিবিৰ অভিযোগ। তদুপৰি নিবিদাৰ চৰ্তসমূহ এনেদৰে ৰচনা কৰা হৈছিল যাতে প্ৰকৃত প্ৰতিযোগিতা নাইকিয়া হয় আৰু কেৱল নিৰ্বাচিত কোম্পানীয়েহে যোগ্যতা অৰ্জন কৰে।

এই গোচৰত ২০২৬ চনৰ ২ জুনত এচিবিয়ে দুৰ্নীতি প্ৰতিৰোধ আইন আৰু ভাৰতীয় দণ্ডবিধিৰ বিভিন্ন ধাৰাত এফআইআৰ ৰুজু কৰিছিল। তদানীন্তন চিপিএৰ কাৰ্যালয়ৰ মুৰব্বী ড০ বিনোদ কুমাৰ ৰঙাক যোৱা ১৮ জুনত গ্ৰেপ্তাৰ কৰা হৈছিল।বৰ্তমান ন্যায়িক জিম্মাত আছে।

ডাঃ ৰঙাৰ জেৰা আৰু ক্ৰয়ৰ ফাইল, চৰকাৰী নথি-পত্ৰ, আৰু অন্যান্য প্ৰমাণ পৰীক্ষাৰ সময়ত ড° বাটছালা আগৰৱাল আৰু নীৰজ চোপ্ৰাৰ ভূমিকা পোহৰলৈ আহিছিল বুলি এচিবিয়ে কয়। পৰৱৰ্তী সময়ত দুয়োৰে বিৰুদ্ধে দুৰ্নীতি প্ৰতিৰোধ আইনৰ ১৭এ ধাৰা অনুসৰি ব্যৱস্থা গ্ৰহণ কৰা হয়, যোগ্য কৰ্তৃপক্ষৰ অনুমতি সাপেক্ষে।

প্ৰাথমিক তদন্তত প্ৰকাশ পাইছে যে নিবিদা অনুমোদন, ক্ৰয় সমিতি গঠন, ক্ৰয় পদ্ধতি, বিত্তীয় অনুমোদনৰ দৰে মূল সিদ্ধান্ত বিভিন্ন পৰ্যায়ত লোৱা হৈছিল। ক্ৰয় বিলৰ তদন্ত, পেমেণ্ট প্ৰচেছিং, চৰকাৰী ধন মুকলি কৰাৰ কাম চিপিএৰ একাউণ্ট শাখাৰ জৰিয়তে চম্ভালিছিল।

এচিবিয়ে কয় যে আৰক্ষীৰ ৰিমাণ্ডৰ সময়ত অভিযুক্তক ক্ৰয়ৰ ৰেকৰ্ড, ইলেক্ট্ৰনিক প্ৰমাণ, ধনৰ ট্ৰেইল, আৰু গোচৰৰ সৈতে জড়িত অন্যান্য বিষয়া আৰু ব্যক্তিগত কোম্পানীসমূহৰ ভূমিকা সম্পৰ্কে সোধা-পোছা কৰা হ’ব। সংস্থাটোৱে বিশ্বাস কৰে যে তদন্ত আগবাঢ়ি যোৱাৰ লগে লগে অধিক ব্যক্তিৰ ভূমিকাও প্ৰকাশ পাব পাৰে।

-----------------

হিন্দুস্থান সমাচাৰ / অৰৱিন্দ